VOV4.K’ho- Pa do, Ủy ƀan Ñân zân càr Dăk Nông bơyai lơh pơrjum tàm lùp “Bơtàu tơnguh lơh sa mpồl bơtiàn càr Dăk Nông” jat broă lơh pơrjum tơn mờ pờ tơlik tàm internet mờ ală cau khoa họk, cau jak chài Viện kơlôi sơnơng bơtàu tơnguh Phương Đông.  

Lài mờ dơ̆ pơrjum, ală kwang bàng neh lòt sền ngan ngồn tàm 2, 3 anih gơ wèt Kông viên điạ cất gùt plai ù UNESCO Dăk Nông, broă lơh lơh sa tàm càr, sền ală sră nggal bè rơndap ù tiah bơtàu tơnguh lơh sa mpồl bơtiàn bơh càr dê. Tàm gùng mut hờ tiah đah jum bơh Tây Nguyên dê tơrbŏ mờ tiah đah jum mat tơngai lik dà lơgar, càr Dăk Nông geh bơtô bauxit mờ khà bauxit uă ngan tàm dunia, là tiah ơm lài ngan tàm gùt lơgar bè bơtàu tơnguh ală bơta năng lượng gơlik wơl bè đèng mat tơngai, đèng càl. Geh rlau 380 rbô lồ ù, uă ngan là ù bazan mƀùr niam ngan, dà li la, trồ tiah noat mrềt, gơ dờp mờ uă bơta chi tam jŏ nam, chi sa plai, bơtàu tơnguh ròng phan mờ broă lơh dờng ngan. Uă ù tiah niam tiơng pơn rơ geh is, ù tiah gam bè ờs mờ kuơmàng là ală rơgồng bơnơm ồs jòng ngan rlau jơh Đông Nam Á, mờ uă jơi bơtiàn kòn cau gam prap gàr ală bơta niam chài krơi is ngan.

Ală kwang bàng lòt sền ngan ngồn tàm tơnau dà Tào Dung

Ală cau jak chài đơs là, Dăk Nông geh ală bơta ƀuơn krơi is bè ù tiah, trồ tiah, là ù tiah prap gàr nàng bơtàu tơnguh jŏ tơngai. Bơta kòl yan tàm bơtàu tơnguh bơh càr dê tŭ do là phan bơna tơrbŏ gùng lòt ờ niam, rài lơh sa gam dềt mờ rah rài, lơh sa suơn sre ờ geh bơta tam gơl pa, cau lơh broă ờ huan uă... Nàng lam lơh ngan ngồn bơta kơp kơnờm lam Dăk Nông bơtàu tơnguh, Giáo sư Tiến sỹ Trình Quang Phú, Kwang atbồ, Củ tịc Hội đồng Khoa họk Viện kơlôi sơnơng bơtàu tơnguh Phương Đông đơs loh, bơdìh mờ broă bơsong ală bơta kòl yan, Dăk Nông pal sơlơ tơnguh broă yal tơnggit rùp hin tus mờ gùt lơgar mờ dunia, bơh ală phan niam chài, jơnau cih, lơma,...: “Tàm jơh ală tơngume do den añ mìng kờñ ală oh mi gròi sền tus bơta yal tơnggit, broă yal tơnggit bol he dê dùl êt ir. Gơtùi đơs là bol hi lài mờ tŭ tus ndo pal sồr oh mi tàm cơldŭ lơh broă pờ jơh ală păng internet sền geh sră nggal, jơnau tơnggit lơi, mơya ờ geh, dùl êt ngan”.

Giáo sư Tiến sỹ Trình Quang Phú đơs nền broă sơlơ yal tơnggit rùp hin bè Dăk Nông

Tiến sỹ Trần Du Lịch, cau jak chài lơh sa, lài do là Phó Kwang atbồ Mpồl kwang bàng Quôk hội ƀòn dờng Hồ Chí Minh đơs là, mờ ală bơta ƀuơn, bơta pràn geh is he dê, Dăk Nông gơtùi brồ guh pràn kơldăng tŭ geh broă lơh ngan ngồn gơtùi gơ hòi gơ jà ală bơta pràn bơcri priă: “Pal ai tơnggŏ bơta kơp kơnờm bơtàu tơnguh bơh Dăk Nông dê bơh ală broă lơh ngan gơ hòi gơ jà ală cau bơcri priă tàm lơgar mờ lơgar ndai, lơh gơlik dùl bơta bơcri priă pa tàm jơh ală gah broă lơh. Ală oh mi pal hòi jà 2, 3 mpồl lam lài tàm tơl gah, lơh gơlik bơta niam, dăn să yơ, pal pleh ală pơrjum bềng ală cau pơcri priă tus kĭ cih kah mìng kờñ yal tơnggit, PR gời, ờ cau lơi bài lơh. Dơ̆ 2 ngan là pal tơnguh pràn jak gơ hòi gơ jà bơcri priă, tài PCI bơh Dăk Nông dê lơyah ir; bè mpồl cau drơng broă den lơh bè lơi ală kwang đơng lam bồ pal mblàng jơh bơta kơp kơnờm bơtàu tơnguh Dăk Nông ai làng bol mờ jơh gùt anih lơh broă cíñ trị in. Bol he pal loh làng tàm broă rơndap ù tiah, ală kơrnuat bơcri priă, broă lơh dong kờl... pal lơh gơlik bơta pin dờn ai mpồl lơh sa kă bro mờ làng bol in. Kuơmàng là gơ wèt mờ làng bol den pal gơtùi ai gŏ ală rơndap broă hơ̆ bơtàu tơnguh den lài ngan là geh kuơ ai làng bol tàm hơ̆ in, do là broă nàng gơtùi dờp geh bơta ring bal bơh làng bol dê, ngan là lơh nhơl chờ”.

Tiến sỹ Trần Du Lịch: Mờ ală bơta pràn geh is, Dăk Nông gơtùi brồ guh pràn kơldang

Dơ̆ pơrjum tàm lùp jơnau đơs ală cau jak chài khà dùl bơh dà lơgar dê bè ală gah lơh sa, bơto bơsram, khoa họk kỹ thuật ai gŏ bơta lơh ngan bơh Đảng ƀộ, gơnoar atbồ càr Dăk Nông dê tàm broă jòi gùng dà lam càr brồ guh, lam lơh ngan ngồn jơnau kờñ mờ Nghị quyết pơrjum dờng Đảng ƀộ càr Dăk Nông dơ̆ 12, tơngai lơh broă bơh nam 2020 tus nam 2025 neh ai tơlik, là lơh ngan gơ gơs càr di mơ bơtàu tơnguh tàm nam 2025 mờ càr bơtàu tơnguh niam tàm nam 2030 bơh tiah Tây Nguyên dê.

Cau mblàng K’Duẩn