VOV4.K’ho- Tơngai bơh nam 2006- 2021, Dăk Nông là càr rƀah ngan rlau jơh tiah Tây Nguyên. Càr kung gam geh uă broă lơh nàng pơn jăt tai tơrmù rƀah mhar mờ kơ̆ kơl jăp. Jăt khà kờp bơh Tổng kụk Tơrgùm kờp dê, Tơngai bơh nam 2006- 2021, Dăk Nông là càr lam lài tiah Tây Nguyên mờ là dùl tàm 10 càr tơrmù rƀah mhar ngan rlau jơh gùt lơgar bal mờ broă tơrmù geh 18,3% khà hìu bơnhă rƀah.

Tam gơl rơndăp tăp sèng chi tam neh dong uă hìu bơnhă làng bol tàm càr Dăk Nông klàs bơh rƀah

Lơh jăt Nghị địñ sồ 07 nam 2021 cih tơl jơnau sồr ƀah uă gah tơngai bơh nam 2021- 2025, (tơl jơnau sồr ƀah pa), càr Dăk Nông tŭ do gam rlau 18 rbô 200 hìu bơnhă rƀah, geh tus 11,2% khà hìu tàm ù tiah càr dê. Tàm hơ̆, 2/3 khà hìu rƀah là cau jơi bơtiàn kòn cau dùl êt nă cau. Tỉñ ủy Dăk Nông neh ai lơh jăt Kơrnoăt, Ủy ƀan Ñân zân càr ai lơh jăt broă rơndăp lơh lơh broă geh jơnau kờñ tơrmù êt ngan rlau jơh là bơh 3% hìu bơnhă rƀah pah nam, uă rlau bàr dơ̆ pơndrờm mờ broă jàu bơh broă lơh dà lơgar dê. Jơnau kờñ bơh Dăk Nông dê gam uă rlau gơwèt mờ tiah jơi bơtiàn kòn cau dùl êt nă cau tŭ geh broă jàu tơrmù bơh 5% rlau hơđang. Càr lơh ngan tus nam 2025 sền bal ờ gam hìu bơnhă rƀah jăt tơl jơnau sồr ƀah pa tai.

Cau mblàng Lơ Mu K’Yến