Ơm tàm nggùl suơn kruac, kuê̆t gơs tơlir tềng hơ đơm jơng bơnơm ồs Nam Kar, bi Nguyễn Thị Mai, kwang atbồ Hợp tak xã lơh sa suơn sre- brê bơnơm hữu kơ Quảng Phú, xã Quảng Phú, kơnhoàl Kông Nô ờ huĭ ală ngai pal klờ tơl pơnai lŭ nàng jòi ù tam chi. Bi pà git, nàng gơtùi tam kruac, kuê̆t tàm tiah ù lŭ bơnơm ồs, broă lơh là pal kơ̆ dơn lơh gơlik dùl tap nhơt, chi che bơ tơl mƀùr ù in pah nam. Kơnờm bơta khin cha tàm broă lơh sa mờ gùng lòt, tơnơ̆ 5 nam, bi neh lơh geh cồng nha tàm bă ù lŭ ro kơnrañ. Rlau 4 lồ kruac, kuê̆t ai cồng nha tơnhàu mờr 100 tấn pah nam, geh ală mpồl lơh bal kĭ jơnau hơ pơrgon blơi tơn tàm suơn mờ giă ờ tam gơl là 35 rbô đông dùl kĭ. Plai kruac, plai kuê̆t tŭ do geh tac tàm ală siêu thị tàm ƀòn dờng Hồ Chí Minh, Bình Dương, Hà Nội mờ ală càr rềp bal. Bơh cồng nha do, bi Mai lơh bal mờ ală hìu bơnhă lơh sa suơn sre tàm do, lơh Hợp tak xã lơh sa suơn sre hữu kơ, ai geh broă lơh rlau 50 nă cau in mờ priă lơh geh kờp bal 10 tơlak đông dùl nhai: “Bơh 20 nam tac bro kơnuh, plai chi den añ geh cau blơi là cau lơgar Nhờk kung geh ală jơnau tam pà bè mờng chài. Hơ̆ sồng bơh tàm sră pơ àr, bơh bơta geh ngan kơlôi sơnơng tai den tŭ tam he pal khin cha. Hợp tak xã kung gam rề ơnàng bă ù hơ̆ sồng dong kờl lơh niam ală mpồl, ală cau dùl nă să gam geh jơnau kờñ lơh sa kloh niam. Hơ̆ sồng kung gam kờñ rề ơnàng, bơtờp sơntìl mờ geh bơtàu tơnguh tiah tam nàng lơh gơs tiah tam krơi is tàm kông viên điạ cất gùt plai ù”.

Kung brồ guh bơta bơta geh ngan tac bro hìu tac dà kơphe kloh niam, bi Đậu Thị Nguyệt ơm tàm tổ zân phố 4, thị trấn Dăk Mâm, kơnhoàl Krông Nô neh bơtàu tơnguh lơh Hợp tak xã Tín true coffe. Tŭ do, hợp tak xã geh 7 nă cau tàm mpồl mờ lơh bal mờ 20 hìu bơnhă làng bol tam kơphe hữu kơ, tac tàm drà kă bro 8 bơta phan kơphe ƀòk, mờ gam kơlôi sơnơng 2, 3 bơta phan bơh bơkàu mờ kơ mhò kơphe. Bi Nguyệt pà git: “Hời rơ hời lơh ndang, bơsram ndang hơ̆ sồng lơh Hợp tak xã cèng tus phan sàng goh ai jơh tơl nă cau in, cau ngui geh hùc kơphe kloh niam, he kung ờ duh pal blơi phan ờ git anih lơh gơlik tàm bơdìh den tàng kung iang nùs ngan. Añ kơp kờñ làng bol tàm hợp tak xã dùl nùs bal, hợp tak xã kung lơh ngan, brồ guh bơh dềt gơs dờng, lơh bè lơi nàng geh broă lơh ai tơl nă cau in bal mờ priă jền lơh geh kơ̆ kơljap”.

Jat bi Nguyễn Thị Mai, Củ tịc Mpồl cau ùr thị trấn Dăk Mâm, kơnhoàl Krông Nô pà git, ală broă lơh cau ùr sơrlèt gan kal ke bơtàu tơnguh lơh sa geh cồng nha neh cèng wơl ală bơta gơ rề niam ngan, dong oh mi cau ùr pin dờn rlau tai tàm broă ai tơnggŏ gơnoar broă, bơta kuơ he dê tàm hìu bơnhă mờ mpồl bơtiàn: “Loh làng là cồng nha lơh geh bè lơh sa, bè priă jền lơh geh den gơnoar broă, bơta kuơ bơh cau ùr dê geh tơnguh uă rlau. Bơh ală broă lơh sơn rờp do den ală kâp mpồl geh ai ală jơnau bơsram mờng chài nàng he geh dùl broă lơh niam ngan rlau jơh nàng he lam lơh ală broă lơh tơnơ̆, bal mờ bơta kơp kờñ là gơ wèt mờ ală cau ùr geh jơnau bơceh pa, geh bơta kờñ gơboh, geh bơta jơh nùs den he geh dong kờl jơh pràn nàng ală oh mi cau ùr hơ̆ in lơh geh cồng nha tàm jơnau kờñ mờ ală bi hơ̆ neh rơ wah”.

Mò H’Vi Êban, Củ tịc Mpồl tam klac ùr càr Dăk Nông pà git, nàng sơlơ tơnguh bơta pin dờn, bơta lơh tờm is bơh cau ùr dê, tơngai lài, ală kâp mpồl cau ùr tàm càr bơyai lơh uă broă lơh ngan ngồn, bơceh pa, di mờ bơta geh ngan. Uă broă lơh sơn đờm mut lơh broă, gròi sền, lòt bal dong kờl cau ùr ờ sô gam lơh geh cồng nha. Dong oh mi cau ùr geh tai bơta niam nàng brồ guh, bơh mpồl ala mat Ngân hàng cíñ sác xã hội mờ kes priă tŭ niam broă lơh, mpồl cau ùr ală kâp neh ai rlau 1 rbô tơmàn đông, ai rlau 23 rbô nă cau tàm mpồl cau ùr in càn nàng bơtàu tơnguh lơh sa: “Tàm tơngai tus, Mpồl tam klac cau ùr càr kung geh pơn jat tai lam lơh broă lơh cau ùr brồ guh lik klàs rƀah, lơh tờm rài kis. Mùl màl, bol hi geh lam lơh niam Rơndap broă lơh dong kờl cau ùr sơn đờm mut lơh broă bơh nam 2017 tus nam 2025. Bơdìh hơ̆ tai, bol hi kung geh pơgồp bal mờ ală gah lơh broă geh gơnoar nàng bơto broă lơh mờ pơlam, yal tơnggit jòi broă lơh jat jơnau kờñ bơh drà kă bro cau lơh broă dê mờ bol hi kung dong kờl cau ùr geh càn mờ ngui ală bơnah priă càn nàng tơrmù rƀah mờ bơtàu tơnguh lơh sa”.

Mờ bơta rơcang lài, ngac ngar, bơceh pa, pin dờn, cau ùr Dăk Nông gam hời rơhời ai gŏ gơnoar broă he dê tŭ lơh tờm ală broă lơh bơtàu tơnguh lơh sa, tơnguh priă jền lơh geh mờ lơh gơlik bơta gơ rề tàm mpồl bơtiàn.