Ngai 18/11, tàm dơ̆ tơngkah kir sơn rai 40 nam Ngai cau pơgru Việt Nam, jờng rơ ală cau, mpồl cau pơgru pơn rơ jak tàm Dăk Nông, kwang đơng lam bồ Ủy ƀan Ñân zân càr Dăk Nông đơs nền: càr geh pơn jat tai sền gròi bơcri uă rlau tai ai broă lơh bơto bơtê in, jơh bal bè phan bơna mờ nùs nhơm dong ală cau pơgru in sơr lèt gan bơta kal ke nàng lơh jat gơnoar broă bơto bơtê kòn bơnus.

Di dơ̆ tơngkah Ngai Cau pơgru Việt Nam, kwang đơng lam bồ càr Dăk Nông neh pà phan ưn ngài ală kwang bàng, cau pơgru neh jơh tơngai lơh broă, ală cau pơgru jak ngan; pà bằng khen ai 35 nă cau pơgru mờ ală mpồl cau pơn rơ jak geh uă bơta tă pơgồp ai broă bơto bơtê càr in. Đơs gờm chờ tàm dơ̆ bơyai lơh, ồng Hồ Văn Mười, Củ tịc Ủy ƀan Ñân zân càr Dăk Nông, đơs sùm, tàm bơta lơh sa- mpồl bơtiàn càr dê gam uă bơta kal ke, mơya gah bơto bơtê neh sùm tam gơl pa broă lơh atbồ, tam gơl pa broă bơto bơtê mờ bơsram, lơh jat geh cồng nha ală jơnau kờñ, kơnòl broă, pơgồp bơnah tàm cồng nha bơtàu tơnguh bal bơh càr dê.