Tàm dơ̆ lơh broă, kwang đơng lam bồ càr Nghệ An neh đơs ală mpồl broă geh gơrềng tus broă dong kờl bè atbồ priă jền- kes priă Dà lơgar; gùng dà broă lơh bè atbồ tiah drà, phan kwơ tàm ù, tiah ơm kis; gùng dà broă lơh bè atbồ bơcri priă; bơtàu tơnguh lơh sa dà lềng; rơndăp kwang bàng lơh broă, ...

Đơs đơng lam dơ̆ lơh broă, Củ tịc Quôk hội ồng Vương Đình Huệ đơs sùm, Nghị quyết sồ 39 bơh Ƀộ Cíñ trị dê neh jàu ai Đảng đoàn Quôk hội in kờp sền, ai lơh jat bơtơl bàr pe gùng dà broă lơh, broă dong kờl krơi is nàng bơt bơtàu càr Nghệ An bơtàu tơnguh tơl làm, di broă, di anih, di pal mờ rơndăp broă lơh bơtàu tơnguh lơh sa- mpồl bơtiàn bơh gùt lơgar dê, rơndăp ù tiah Dà lơgar mờ rơndăp ù tiah tiah đah Tô tàm gùl Dà lơgar mờ jat kềng gah Dà lềng tàm gùl lơgar; mơkung geh gùng dà broă lơh, broă dong kờl uă nàng bơtàu tơnguh ƀòn dờng Vinh gơ gơs anih tờm lơh sa- niam chài bơh tiah đah Tô tàm gùl lơgar dê. Củ tịc Quôk hội sồr, càr Nghệ An kờp sền wơl ală gùng dà broă lơh mờ ală adat pa geh Quôk hội ai lơh jat rơ̆p geh mut ngui ngan ngồn, nàng pleh tàm rơndăp rơndồl tàm Nghị quyết; ală gùng dà  broă lơh tŭ lơh sir pal gàr niam bơta ƀuơn lơh jat mờ gơtùi lơh jat. Tơnơ̆ pơrjum do, Ủy ƀan Tài cíñ Kes priă bơh Quôk hội dê tus bal mờ Ƀộ Kế hoạc mờ Đầu tư mờ nùs nhơm geh kơnòl uă ngan rlau jơh nàng lơh sir, gờñ yal mờ Ủy ƀan Thường vụ Quôk hội mờ Quôk hội in.