Rê mờ tiah kơh bơnơm xã Phước Bình, kơnhoàl Bác Ái, càr Ninh Thuận tàm ală ngai mờr tus ngai sa tềp do, tŭ chi brê gam mŭt tàm kàl căt nha pa den sươn chi sa plai, geh: plai bung kơmhò tơlir 300 tờm, 50 tờm sầu riêng, plai côm côm hìu bơnhă ồng Katơr Quỳnh dê tàm thôn Hành Rạc 2 kung gam tơlir niam ngan sơl. Tàm tŭ sươn sầu riêng gam geh bơkàu den sươn tờm plai bung gam ơm kơ̆p ngai tơnhàu tàm kàl sa tềp do. Wă rò bol hi tàm hìu sơmang pa lơh jơh 1 tơmàn đong geh lơh rềp kềng tơn mờ hìu rơng ờs mờng bơh yau kòn cau Rơglai dê, cau đảng viên neh rlau 30 sơnam Đảng chờ hờp ngan pà gĭt: Lài do, hìu bơnhă ồng kung bè uă làng bol ndai tàm ù tiah xã Phước Bình mìng tam tờm điều mờ ală tờm phan tam lơyah ngai lơm, bè tơngời, khuah den tàng cồng nha lơh sa ờ geh uă. Bơh tŭ geh gơnoar ătbồ tiah do hòi jà tam gơl chi tam, hìu bơnhă ồng neh khin cha tam gơl mờr 2 lồ ù nàng tam tờm plai bung kơmhò tơlir, sầu riêng mờ plai côm côm pơgồp bal mờ broă lơh lòt nhơl ƀòn brê bơnơm sươn gơ ai priă jền rlau 150 tơlak đong dồ nam. Bơh hơ̆, ồng hòi jà mờ pơlam làng bol tam gơl lơh sa nàng bơtàu tơnguh rài kis. Ồng Katơr Quỳnh, yal: Cau đảng viên pal lòt lài, sồ siă sang, sàng goh tiah ơm kis, gùng lòt pal tơlir, sàng goh mờ uă mƀur chi. Gùng lơh broă lòt nhơl mờ ƀơ̆ ƀơl ir den ñcau lòt. Bơh bơta gĭt wă tus bơta wă wờng bơh he dê, pal mblàng yal hòi jà nàng làng bol in iăt kơno mờ lơh jăt den he pal lơh lài. He lơh lài jơh ai he in, ai oh kòn he dê in tơnơ̆ hơ̆ rề ơnàng lơh uă broă do tus jơh gùt mpồl bơtiàn.

Ngài mờ hơ̆ dồ êt là hìu rơng bơh hìu bơnhă Đảng viên gam kơnòm să dê là bi Katơr Chinh. Hìu bơnhă bi Katơr Chinh kung là dùl tàm ală hìu bơnhă lơh lài bơcri priă bơtàu tơnguh broă lơh lòt nhơl mpồl bơtiàn. Bi Chinh pà gĭt, năc lòt nhơl tus ndo, bơdìh mờ broă lòt còp sươn chi sa plai, gam geh sa ală phan sa ờs mờng bơh yau bơh kòn cau Rơglai dê, bè: piang prùng, iar buh, ka dà buh...sền ală jơnau tam ya ờs mờng bơh yau bơh kòn cau Rơglai, kòn cau Cru dê...Bi Katơr Chinh, yal: Đah bol oh kung geh sơl tiah lơh bal mpồl nàng bơtàu tơnguh lòt nhơl mpồl bơtiàn bơh Chapi 1 tus Chapi 6. Tŭ do, bol oh kung gam pơnđơl pràn lơh ngan lơh niam wơl hìu kù gơ in niam nàng drơng jơnau kờñ bơh năc lòt nhơl dê tus nhơl tàm dơ̆ sa tềp. Mpồl tờm bơh oh dê geh 2 nă đảng viên, oh là cau phŏ mpồl mờ 5 nă cau ndai nàng drơng năc lòt nhơl in. Bơdìh hơ̆ tai gam geh 13 nă cau nàng lơh đơs crih tam ya.

Kơrnoăt Pơrjum dờng Đảng ƀộ xã Phước Bình, kơnhoàl Bác Ái neh geh kơnòl broă mờ broă lơh tàm broă lơh geh wơl mờ ngui niam bơta pràn làng bol tus bal bơtàu tơnguh lơh sa- mpồl bơtiàn tiah do dê. Hòi jà làng bol tam gơl bồ tơngoh kơlôi sơnơng, broă ơm kis bal mờ ƀòn lơgar tus bal lơh jăt broă lơh “Lòt nhơl ƀòn brê bơnơm mờ niam chài mpồl bơtiàn”, mờ mpồl cau tờm là ală đảng viên kòn cau Rơglai. Tơnơ̆ tŭ mblàng yal, hòi jà, tus tŭ do, jơh gùt xã Phước Bình, kơnhoàl Bác Ái neh geh 120 hìu bơnhă kòn cau Rơglai tus lơh bal, tàm hơ̆ geh 60 hìu bơnhă nàng kờñ lơh geh ală jơnau sồr mờ geh jơnau kờñ tus bal bơtàu tơnguh lòt nhơl mpồl bơtiàn. Đảng ủy mờ Ủy ƀan Ñân zân xã Phước Bình neh geh jơnau pơlam gùng lơh ală broă drơng ai broă lơh in bơh bơnah dong kờl bơh Dà lơgar dê mờ làng bol tă is bơcri lơh, bè: lơh hìu rơng ờs mờng bơh yau; hìu jă brê, lơh niam wơl ù tiah ƀòn lơgar, crăp phan ngui khòm tơrgùm sồ siă brih brơm, kƀàng yal, kƀàng sơñio pơlam gùng...

Lơh jăt Broă rơndăp lơh Bơtàu tơnguh lòt nhơl mpồl bơtiàn lơh tơrlòng lài tàm ù tiah xã Phước Bình tơngai bơh nam 2019- 2022, khà năc lòt còp tus ală tiah lòt nhơl ƀòn brê bơnơm, niam chài tàm ù tiah xã Phước Bình neh geh bơta bơtàu tơnguh uă ngan, ngan là tàm ală ngai ơm rlô, ngai lơh chờ. Pah nam, Phước Bình wă rò bơh 5 rbô tus 7 rbô dơ̆ năc lòt nhơl lòt còp sền nàng gĭt. Làng bol tàm do neh tam gơl bồ tơngoh kơlôi sơnơng tàm broă lơh bal lơh sa bơtàu tơnguh lơh sa hìu bơnhă in. Mò Pi Năng Thị Cô, Phó Ƀí thư Đảng ủy xã Phước Bình, kơnhoàl Bác Ái, pà gĭt: Kwơmàng là tam gơl sơntìl chi tam. Bơh hơ̆ tus tŭ do là tam gơl loh làng tơn, làng bol gĭt kă bro, gĭt lơh uă broă. Tàm do geh 4 jơi bơtiàn oh mi ơm kis bal, geh cau Yoan, Prum, Rơglai, Cru mơya tam klăc bal ngan, krơi ngan mờ lài. Tŭ do tam gơl uă ngan.

Jăt tàm cồng nha neh lơh geh, Ủy ƀan Ñân zân kơnhoàl Bác Ái, càr Ninh Thuận pơn jăt tai geh broă rơndăp lơh pa tơngai bơh nam 2023- 2025, mờ wèt sền tus nam 2030 bè bơtàu tơnguh lòt nhơl tàm ù tiah kơnhoàl dê. Tàm hơ̆, tơrgùm rề ơnàng, lơh gơs bàr pe bơta phan bơna lòt nhơl mpồl bơtiàn tàm xã Phước Bình. Ngan là tàm nam 2024 do, lam lơh jăt rơndăp broă lơh sồ 06 bơh Broă lơh jơnau kờñ dà lơgar dê bè bơtàu tơnguh lơh sa- mpồl bơtiàn tiah làng bol jơi bơtiàn dồ êt nă cau mờ tiah kơh bơnơm. Ồng Trần Văn Toàn, Kwang ătbồ Cơldŭ lơh broă Niam chài Yal tơngĭt jơnau kơnhoàl Bác Ái, càr Ninh Thuận pà gĭt, broă lơh lòt nhơl mpồl bơtiàn là dồ bơta ƀươn jơnau tơl pràn bơh kơnhoàl dê mờ là bơta pa tàm tam gơl pràn kơldang rơndăp tăp sèng bơnah lơh sa bơh kơnhoàl dê. Ồng Trần Văn Toàn, đơs: Pơn jăt tai tàm nam 2024 do pa rề ơnàng tus bàr pe hìu bơnhă nàng bơtàu tơnguh lòt nhơl mơkung neh geh lài ală hìu tàm nam 2022, 2023 pơn jăt tai lơh sir, lơh gơs gơcèng bơta mờng chài rlau, ai tơmŭt lơh broă jăt jơnau pal jăt, ătbồ lam lơh geh bơta jak chài mờ geh bơta pràn lơh gơrề rlau tàm mpồl bơtiàn, nàng dong làng bol tàm sơm băt tê bal bơtàu tơnguh lòt nhơl mpồl bơtiàn.

Nàng pơgồp bơnah ai Phước Bình bơtàu tơnguh gơ gơs ƀòn lòt nhơl mpồl bơtiàn mùl gŏ is mờ rề ơnàng lơh uă tus ală ƀòn lòt nhơl mpồl bơtiàn ndai bơh càr Ninh Thuận dê tàm tơngai tus, ală đảng viên kòn cau Rơglai tàm xã Phước Bình, kơnhoàl Bác Ái rơ̆p pơn jăt tai yờ tơnguh gơnoar broă bơh he dê tàm broă hòi jà làng bol bal mờ xã tus bal lơh jăt bơ̆t bơtàu broă lơh “Lòt nhơl ƀòn brê bơnơm mờ niam chài mpồl bơtiàn”.