Thôn Trăng Nó Kon Blo, xã Đăk Kôi, kơnhoàl Kon Rẫy, càr Kon Tum geh 120 hìu bơnhă jơh ală làng bol ndrờm là kòn cau Sơdàng lơm. Nàng dong kờl làng bol tàm thôn tam gơl bơta kơlôi sơnơng, broă lơh brồ guh tàm lơh broă lơh sa, gơguh tai priă lơh geh bơtàu tơnguh rài kis, Ci ƀộ thôn Trăng Nó Kon Blo gĭt nền 21 nă đảng viên pal lam lài lơh krơh. Bơh ală broă lơh lài bơtàu tơnguh lơh sa hìu bơnhă lơh geh cồng nha niam bơh đảng viên dê, bè: ngui sơntìl kòi pa, sền gàr di bơta chài ai cồng nha lơh geh uă; ala tờm bùm blàng mờ tờm kơphê, kau su...làng bol tàm thôn, ngan là 35 hìu gơ wèt hìu rƀah bơsram lơh jăt. Bi Y Xanh, Kwang ătbồ Mpồl Tam klăc cau ùr xã Đăk Kôi, là dùl nă đảng viên pơrjum tàm thôn Trăng Nó Kon Blo pà gĭt, kơnờm geh ală đảng viên ià tê sơñio broă, jơh nùs jơh tồr bơto pơlam, ală hìu bơnhă rƀah gơ wèt rƀah ngan rlau jơh ƀòn, bè A Dĩa, A Thế, A Long...tŭ do neh pin dờn, khin cha bơcri priă bơtàu tơnguh lơh sa lơh geh tai priă jền ai hìu bơnhă in. Bi Y Xanh, đơs: Ală đảng viên sùm lòt tus hìu bơnhă nàng mblàng yal ală hìu bơnhă mờ he drơng kơnòl tàm broă bơtàu tơnguh lơh sa kung bè ală gùng dà broă lơh bơh Đảng mờ adat boh lam Dà lơgar dê. Pơlam làng bol in tam gơl bơta gĭt wă kung bè là bơta gĭt wă tàm broă tam gơl rơndăp tăp sèng chi tam phan ròng gơ jăt bal mờ Dơ̆ hòi jà Lơh tam gơl bơta kơlôi sơnơng broă lơh bơh làng bol jơi bơtiàn dùl êt nă cau dê, lơh ai làng bol jơi bơtiàn dùl êt nă cau in brồ guh klàs bơh rƀah kơ̆ kơl jăp jŏ jòng.

Đăk Kôi là xã tiah sar lơgar ngài bơh kơnhoàl Kon Rẫy mờ kờp jơh khà kờp làng bol là 3 rbô 400 nă cau, tàm hơ̆ kòn cau Sơdàng geh tus 94%. Ồng Trương Hồng Doanh, Ƀí thư Đảng ủy xã Đăk Kôi pà gĭt, tus lồi nam 2022 xã gam tus 285 hìu rƀah geh tus rlau 34% hìu làng bol. Tềng đăp bơta geh ngan do, Đảng ủy xã neh jơh nùs lơh pràn Dơ̆ hòi jà “Lơh tam gơl bơta kơlôi sơnơng, broă lơh bơh làng bol jơi bơtiàn dùl êt nă cau dê, lơh ai làng bol jơi bơtiàn dùl êt nă cau in brồ guh klàs bơh rƀah kơ̆ kơl jăp”. Gĭt nền gơnoar broă lơh krơh bơh đảng viên dê, Đảng ủy xã Đăk Kôi jàu kơnòl ai 15 Ci ƀộ mờ mùl màl là tus 187 nă đảng viên bơh xã dê in, tàm hơ̆ kwơmàng sền gròi tus gơnoar broă lam lài lơh krơh bơh ală đảng viên cau jơi bơtiàn dùl êt nă cau dê. Ồng Trương Hồng Doanh, đơs: Đảng ƀộ xã tŭ do kờp bè khà đảng viên là cau jơi bơtiàn dùl êt nă cau den geh tus uă ngan, mờ 156 nă đảng viên geh tus 83,42%. Mờ gơnoar broă là dùl nă đảng viên den ală oh mi đảng viên tàm do sùm lơh niam geh nùs nhơm lam lài lơh krơh bơh cau đảng viên dê. Lam lơh dơ̆ lam sồr lơh tam gơl bơta kơlôi sơnơng, broă lơh, lơh ai làng bol jơi bơtiàn dùl êt nă cau in brồ guh lik klàs bơh rƀah kơ̆ kơl jăp tàm ală nam do ală oh mi đảng viên bơh ală ci ƀộ ƀòn lơgar mờ kwơmàng là đảng viên là cau jơi bơtiàn dùl êt nă cau neh lam lơh mblàng yal hòi jà làng bol lơh jăt tus bal niam ngan.

Gơrề uă Dơ̆ hòi jà “Lơh tam gơl bơta kơlôi sơnơng, broă lơh bơh làng bol jơi bơtiàn dùl êt nă cau dê, lơh ai làng bol jơi bơtiàn dùl êt nă cau in brồ guh klàs bơh rƀah kơ̆ kơl jăp” bơh Tỉñ ủy càr Kon Tum dê sồr lơh, Huyện ủy kơnhoàl Kon Rẫy neh lơh jăt ngan ngồn tơngume dơ̆ hòi jà mờ geh uă broă lam lơh jăt. Tàm 43 thôn jơi bơtiàn dùl êt nă cau ală đảng viên tơrgùm hòi jà, bơto pơlam hìu jơi bơtiàn dùl êt nă cau rƀah mờ mờr ndrờm bè rƀah ngui geh cồng nha bơta pràn bơh hìu bơnhă dê, priă càn nàng bơtàu tơnguh lơh sa; dơ̆ ngui dipal nàng tềm pềr priă jền bơcri wơl tàm broă lơh sa; yal tơngĭt bè ală bơta sơntìl chi tam, phan ròng dipal; hòi jà hìu bơnhă jơi bơtiàn dùl êt nă cau lơh tam gơl sươn rhàng; tus bal lơh broă tàm ală hợp tak xã, mpồl lơh broă bal tam tờm chi lơh sơnơm, bơtàu tơnguh lơh broă sa sươn sre sàng goh...Ồng Nguyễn Văn Thủy, Phó Củ tịc Ủy ƀan Ñân zân kơnhoàl Kon Rẫy, đơs nền dơ̆ hòi jà neh cèng wơl cồng nha loh làng ngan tàm bơtàu tơnguh lơh sa- mpồl bơtiàn bơh kơnhoàl dê. Ồng Nguyễn Văn Thủy, đơs: Làng bol neh geh uă tam gơl tàm broă lơh, tàm bơta đòm jăt ngui bơta jak chài tàm broă lơh sa kung bè ròng phan lơh ai rài kis làng bol in tàm tiah ƀòn lơgar ngai sơlơ geh bơta tam gơl pa, mờ kwơmàng là làng bol jơi bơtiàn dùl êt nă cau. Bơh broă lam lơh jăt ală broă lơh sa, hơ̆ sồng pơgồp bal lơh jăt ală broă lơh jơnau kờñ dà lơgar dê ai làng bol jơi bơtiàn dùl êt nă cau in neh lơh gơlik geh ală bơta gơ tam gơl loh làng ngan mờ cồng nha ngan rlau jơh tàm bơta geh ngan hơ̆ là rài kis mờ bơta kơlôi sơnơng bơh cau jơi bơtiàn dùl êt nă cau dê neh geh ală tam gơl mpờl gŏ loh làng ngan.

Jăt ồng Nguyễn Quang Thạch, Ƀí thư Huyện ủy kơnhoàl Kon Rẫy, càr Kon Tum yal, tơnơ̆ rlau 2 nam lam lơh jăt, Dơ̆ hòi jà “Lơh tam gơl bơta kơlôi sơnơng, broă lơh bơh làng bol jơi bơtiàn dùl êt nă cau dê, lơh ai làng bol jơi bơtiàn dùl êt nă cau in brồ guh lik klàs bơh rƀah kơ̆ kơl jăp” neh rơhời lơh gơdờp tus bơta gĭt wă bơh làng bol dê, cèng wơl cồng nha geh kwơ ngan. Geh rlau 30% hìu bơnhă jơi bơtiàn dùl êt nă cau là hìu rƀah, hìu mờr ndrờm bè hìu rƀah tàm ù tiah kơnhoàl Kon Rẫy tam gơl bơta kơlôi sơnơng, sang rơhời bơhiàn bơngơl gơla, ờ gŏ kơldìng kơ̆p kơnờm wơl ir tàm bơta dong kờl bơh Dà lơgar dê, pơđơl pràn is brồ guh klàs bơh rƀah kơ̆ kơl jăp; rlau 39% khà hìu gĭt ngui bơta jak chài măy mok tàm broă lơh sa, săc rwah sơntìl chi tam, phan ròng geh priă jền lơh sa uă mờ dipal; mờr 17% khà hìu geh rài kis phan bơna mờ nùs nhơm geh bơtàu tơnguh geh priă lơh geh jơnhoa rlau mờ khà priă lơh geh kờp bal làng bol jơi bơtiàn dùl êt nă cau tàm kơnhoàl dê.

Gàr niam cồng nha neh lơh geh nàng Dơ̆ hòi jà “Lơh tam gơl bơta kơlôi sơnơng, broă lơh bơh làng bol jơi bơtiàn dùl êt nă cau dê, lơh ai làng bol jơi bơtiàn dùl êt nă cau in brồ guh lik klàs rƀah kơ̆ kơl jăp” gơ lòt mŭt ngan ngồn tàm uă broă, geh cồng nha mờ geh kwơ ngan, Huyện uỷ kơnhoàl Kon Rẫy gĭt nền dùl tàm ală broă lơh kwơmàng là pơn jăt tai tơnguh uă gơnoar broă, kơnòl broă bơh kwang bàng tàm kâp ủy drơng kơnòl broă ci ƀộ, đảng viên drơng kơnòl broă hìu, mpồl hìu mờ cau geh bơnhă pin dờn, pơnrơ tàm mpồl bơtiàn.