Thôn 4, xã Phước Cát 2 ơm ngài tiah tờm kơnhoàl Cát Tiên 40 kơi sồ, bal mờ mờr 50 hìu bơnhă, 160 nă làng bol ndrờm là cau jơi bơtiàn dùl êt nă cau. Là dùl nă cau kòn bơh ƀòn lơgar dê, đảng viên bi Điểu K’Điệp sùm kơlôi sơnơng bal mờ ală bơta kal ke, ờ hềt jak chài ngan tàm rài kis mờ lơh broă sa bơh làng bol dê. Bơh nam 2016, tŭ lơh Kwang ătbồ Ƀan Lơh broă mặt trận thôn 4, bi neh lơh niam gơnoar broă là cau lơh kòn gùng đah ală kâp ủy Đảng, gơnoar ătbồ tiah do mờ làng bol, wèt tus bơ̆t bơtàu rài kis niam bơnĕ rlau. Mùl màl, Điểu K’Điệp neh bal mờ kwang bàng tàm thôn lam lơh uă broă lơh pơgồp bal mblàng yal, hòi jà dipal, sùm lòt tus tơl hìu nàng bơto yal ală gùng dà, broă lơh, jơnau sồr bơh Đảng dê mờ adat boh lam bơh Dà lơgar dê nàng làng bol in gĭt loh mờ lơh jăt. Mơkung lùp nàng gĭt nền jơnau kơlôi sơnơng, bơta kơ̆p kờñ bơh làng bol dê nàng di tŭ dan mờ yal mờ kâp ủy, gơnoar ătbồ tiah do in. Điểu K’Điệp pà gĭt, kờñ làng bol dòn kơnờm mờ lơh jăt den să tờm he pal lơh krơh lơh lài. Điểu K’Điệp, đơs: He mblàng yal làng bol in tơryăng tơryồng lơh sa, tam gơl chi tam phan ròng. Bè tờm điều, dilah mờ neh kra jŏ sơnam ir den he pal tam gơl mơya ờ gŏ di tam gơl dùl ròt. Dilah tam 1 lồ den he tam gơl 1 sào mơ gời, tài bơh tam gơl jơh den mbơh ai phan nàng sa. Hơ̆ sồng sre kung bè hơ̆ sơl, mblàng yal làng bol in pal sền kòp, tu lơh aniai mơya lơh sre pal lơh dùl dơ̆ bal. Ai bè broă deh dùh di kơrhia tàm hìu bơnhă den he kung mblàng yal là pal geh broă rơndăp lơh deh dùh di kơrhia, den bơh dùl tus 2 nă kòn lơm, bañ deh kòn dơ̆ pe.

Tam gơl bồ tơngoh kơlôi sơnơng bơh ală broă lơh dềt, rài kis cau jơi bơtiàn dùl êt nă cau tàm thôn 4, xã Phước Cát 2 dê neh geh bơta tam gơl uă ngan, ală adat bơhiàn bơngơl gơla ờ gam kwơ tai geh sang sơrbì jơh. Tŭ do, hìu lơi kung rơcăng tàm broă lơh sa lơm, ngui bơta jak chài măy mok dê tàm broă tam pham. Muh mat tiah làng bol ơm kis kung ngai sơlơ tam gơl pa. Ală gơl gùng ha pah rơđiàh ngan, hìu đam tơl hìu bơnhă sùm sàng goh, rơndăp tăp sèng niam, wàng ròng phan geh lơh sàng goh ngan...

Lơh sa kơ̆ kơl jăp, làng bol lơh wơl mờ sền gàr ală bơhiàn ờs mờng bơh yau niam chài krơi is jơi bơtiàn he dê. Ală mpồl cing mồng, tam ya, mpồl coh plai cau klau, mpồl nhơl bơlai cau klau mờ cau ùr bơh thôn 4 dê sùm tus bal jơh nùs mờ lơh geh uă cồng nha jơnhoa tàm ală dơ̆ pơrlòng bơh xã, kơnhoàl dê bơyai lơh. Bi Điểu K’Điệp, yal: Làng bol tàm do mpồl cing mồng kung geh sơl, mpồl tam ya kung geh; tàñ sơ̆ tai, gam uă ngan cau chài gĭt tàñ sơ̆. He mblàng yal làng bol in là bañ sang, pal prăp gàr. Bơhiàn niam chài pơnrơ is bơh he dê gơ dê, pal gĭt sền gàr gơ.

Jăt ồng Đường Bình Độ, Củ tịc Ủy ƀan Mặt trận Dà lơgar Việt Nam xã Phước Cát 2, đơs: thôn 4 là thôn tiah sar lơgar ngài, gùng lòt kal ke ngan, rài kis lơh sa kal ke ngan. Tŭ do, thôn neh geh bơta bơtàu tơnguh kơ̆ kơl jăp bè ală bơta, tàm hơ̆ pơnrơ ngan rlau jơh là bơ̆t bơtàu ƀòn lơgar pa mờ tơrmù rƀah kơ̆ kơl jăp. Làng bol neh gĭt wă pơđơl pràn lơh ngan bơ̆t bơtàu rài kis hờm ram. Cồng nha do geh bơta tă pơgồp uă ngan bơh Đảng viên kơnòm să bi Điểu K’Điệp dê, Kwang ătbồ Ƀan Lơh broă Mặt trận thôn 4: Mblàng yal, hòi jà làng bol lơh jăt ală gùng dà broă lơh mờ jơnau sồr bơh Dà lơgar dê là niam ngan. Bè bơtàu tơnguh lơh sa den tàm ală nam do, làng bol tàm thôn 4 jơh nùs lơh broă lơh sa, rài kis lơh sa geh tơnguh uă, broă lơh jơi bơtiàn kung geh lam lơh jơh nùs sơl. Tàm ală nam do, să tờm bi Điểu K’Điệp sùm jơh nùs hòi jà làng bol lơh jăt niam bè ală srơh, bè srơh bơ̆t bơtàu ƀòn lơgar pa bal mờ ală srơh bơh xã mờ kơnhoàl dê lam lơh.

Bal mờ ală tă pơgồp uă ngan tàm bơ̆t bơtàu ƀòn lơgar pa, Điểu K’Điệp neh chờ hờp geh Ủy ƀan Mặt trận dà lơgar Việt Nam càr Lâm Đồng jờng rơ mờ pà Sră jờng rơ là Kwang ătbồ Ƀan Lơh broă Mặt trận tiah jơi bơtiàn dùl êt nă cau pơnrơ tơngai bơh nam 2016- 2021.