Tus ƀòn Mỹ Khương, xã Mỹ Tịnh An, kơnhoàl Chợ Gạo, càr Tiền Giang cau lơi kung gĭt lơm ồng Lê Văn Thủy, 58 sơnam, dùl nă cau đảng viên cau lơh broă sa lơh sa jak kâp gùt lơgar. Ồng tŭ do là cau tờm sươn ơnàng 01 lồ 08 sàu ù tam plai thanh long mìng gơ lơm. Ồng Thủy pà gĭt, hìu bơnhă ồng lài do tam kòi geh cồng nha lơh sa ờ uă den tàng tam gơl tus tam tờm thanh long kơnồng bò mờr 30 nam do. Bơh nam 2012, geh bơta bơto sồr, bơto pơlam bơh gah lơh broă ờs mờng dê, ồng sơnđờm tam jăt tơl jơnau sồr Vietgap dê hơ̆ sồng tus Global Gap jăt gùng dà lơh bal mờ Hợp tak xã Mỹ Tịnh An nàng tăc mờ lơgar ndai.

Kơnờm tơryăng tơryồng jơh nùs jơh tồr tàm tŭ lơh broă mờ gĭt ngui bơta chài măy mok tàm broă lơh sa den tàng sươn plai thanh long bơh hìu bơnhă ồng Thủy dê sùm lơh geh cồng nha mờ bơta niam. Kờp bal pah nam, sươn plai thanh long do geh plai pe kàl, gơ ai plai bơh 50 tus 60 tấn. Jơh ală plai thanh long ồng dê ndrờm geh Hợp tak xã Mỹ Tịnh An blơi jơh bal mờ giă kas rlau mờ giă drà kă bro bàr pe rbô đong dùl kĭ. Kàl prang nam do, sươn plai thanh long bơh ồng Lê Văn Thủy dê pa tơnhàu geh 20 tấn plai, tăc bal mờ giă 22 rbô đong dùl kĭ, lơh geh 450 tơlak đong. Ồng Lê Văn Thủy, yal: Kờñ lơh sa jăt tơl jơnau sồr bơh Global Gap dê kwơmàng là he kờñ pal tam gơl bơhiàn mờng kwèng lơh sa bơh he dê halà ờ, pal kơlôi tus bơta niam sàng goh phan sa, bơta niam ai cau ngui sa in. Tŭ do, bol he pal lơh sa jăt ală broă lơh sàng goh, tàm tŭ ƀồm sơnơm, ơn phơng he pal ngui sơnơm hữu kơ, ală cế phẩm siñ họk ai gơ in lơh niam wơl ù, cèng wơl bơta nđiơm gơs ai ù in nàng he geh phan bơna niam sàng goh mờ bơta niam dipal mờ jơnau kờñ bơh cau ngui sa dê.

Bơta pal cih dờp ngan gơwèt mờ đảng viên ồng Lê Văn Thủy là bồ tơngoh kơ̆p kờñ jơh nùs lơh ngan, bơceh lơh tàm tŭ lơh broă lơh sa. Tàm tŭ uă cau lơh broă sa tàm tiah do ur ar tam plai thanh long kơnồng pơrhê den ồng đềt mềr wơl mờ tờm thanh long kơnồng bò. Tài bơh jăt ồng đơs, plai thanh long kơnồng bò, ờ huan gơtìp bơtờp kòp, cồng nha lơh geh uă mờ drà kă bro Mỹ, câu Âu kờñ ngan plai do. Tơngai lài, bulah plai thanh long geh tŭ tơngai tăc ờ yòm ngan, giă gơmù uă ngan mơya ồng ờ gŏ dil nùs mờ pơn jăt tai bơcri priă, tơnguh niam sươn chi. Ồng Nguyễn Văn Nam, Củ tịc Ủy ƀan Ñân zân xã Mỹ Tịnh An pà gĭt, ồng Lê Văn Thủy là dùl nă đảng viên pơnrơ tàm broă lơh broă sa tàm tiah do. Ồng Nguyễn Văn Nam, yal: Ồng Thủy tam jăt broă lơh VietGap mờ Hợp tak xã tam jăt ală broă bơto pơlam den tàng cồng nha lơh geh mờ bơta niam uă ngan. Tŭ do, broă lơh tam jăt phan bơh ồng dê cồng nha lơh geh jơnhoa rlau uă ngan. Dơ̆ bàr là ồng tuh dà mờ bec, ƀồm, klài sơnơm hoài ding dà tuh ờ duh kờñ  pal cèng dinh rơsềt den tàng lờih lờm ngan, tềm pềr tŭ tơngai lơh broă den tàng cồng nha lơh geh uă ngan. Tŭ do, dilah plai thanh long kơnồng bò giă tăc rlau 15 rbô đong dùl kĭ den gơ niam ngan.

Bơh broă lơh tam plai thanh long kă bro, hìu bơnhă ồng Lê Văn Thủy neh gơ gơs pas sơm mờ priă lơh geh pah nam pơgăp 1 tơmàn 500 tơlak đong. Nam 2020, ồng chờ hờp geh Thủ tướng Cíñ phủ pà Sră jờng rơ bè cồng nha lơh geh tàm broă lơh broă sa. Bơdìh mờ cau lơh broă sa do kung geh Mpồl Cau lơh broă sa dà lơgar Việt Nam, Ủy ƀan Ñân zân càr Tiền Giang pà uă sră jờng rơ bè cồng nha lơh geh jak ngan tàm broă lơh Mpồl dê mờ tàm pơrlòng lơh broă lơh sa.

Ờ mìng lơh broă jak mờ đảng viên ồng Lê Văn Thủy gam lơh Kwang ătbồ Mpồl Cau lơh broă sa ƀòn Mỹ Khương, xã Mỹ Tịnh An. Tơngai lài, ồng jơh nùs ngan mờ ală broă lơh mpồl broă lơh srơh, broă lơh niam dong kờl mpồl bơtiàn tàm tiah do, bè dong cau lơh broă sa rƀah bòl glar kal ke, lơh gùng lơh rbàng lòt rê. Să tờm ồng neh tus bal pà is 30 dơ̆ mhàm dong kờl cau. Ồng Lê Văn Thủy, đơs: Là làng bol Việt Nam mờ tàm sơnam mờr 60 sơnam geh ơm tàm mpồl Đảng dê, hơ̆ là bơta chờ hờp dờng ngan. Mìng is să tờm añ bulah gơ lơyài mơya añ đơs ngan nùs nhơm cíñ trị añ dê, kờñ gơboh rài ătbồ, kờñ gơboh Đảng, Dà lơgar...tàm tơngai gam wơl, añ rơ̆p lơh ngan lơh jơh ală bơta lơi, lài ngan là pal kis ai să tờm in dòn song, kis niam, kis ai hìu bơnhă, ai ƀòn lơgar, ai dà lơgar in, bơsram krơh Hồ Chí Minh dê gơ in niam ngan nàng lời wơl krơh niam ai oh kòn, kòn sau in đòm jăt.

Tàm sơnam mờr 60 sơnam mơya nùs nhơm hàm kờñ ngan lơh broă lơh sa bal mờ broă lơh tam tờm thanh long tăc mờ lơgar ndai gơwèt mờ đảng viên “cau lơh broă sa” ồng Lê Văn Thủy kung gam jơh nùs jơh tồr tơryăng tơryồng ngan. Ồng pà gĭt, gam pràn den să tờm kung gam pơn jăt tai tus bal lơh broă mờ hìu bơnhă, jơh nùs lơh ngan lơh pas bơh tờm thanh long nàng lơh krơh ai oh kòn kòn sau in đòm jăt.