Tàm trồ tơngai duh trơ ồl ngan bơh kàl prang dê, ơm tàm nggùl suơn kơphê, Thiếu tá Nguyễn Phúc Thuận, Pôs đồng ling sền gàr tiah nhàr lơgar Dăk Lao, Mpồl ling sền gàr tiah nhàr lơgar càr Dăk Nông jơh nùs ngan bơto pơlam làng bol thôn Dăk Thọ, xã tiah nhàr lơgar Dăk Lao, kơnhoàl Dăk Mil in bơta chài sơng ka sền gàr phan tam tàm kàl prang mờ rcang sih tam phan tŭ mut tàm kàl mìu. Nam do, trồ prang dờng ro kơn rañ, lòt tus hìu cau lơi, bi kung tơngkah làng bol tuh dà tềm pềr, ngui di pal nàng geh dà ngui tus lồi kàl prang. Tơngai tŭ do, tờm kơphê gơlik geh bàr pe bơta tu kòp aniai, ngan là ñui, bi bal mờ kwang bàng gah dong kờl lơh sa suơn sre bơto pơlam làng bol broă rcang lài kơryan bè lơi ai gơ in geh cồng nha.

Nam do, giă kơphê gơguh uă ngan, uă hìu bơnhă làng bol gam geh broă rơndăp lơh tam pa wơl. Bi sùm tơngkah làng bol rơ wah sơntìl di ngan, pleh mờ broă blơi sơntìl ờ niam, ờ gàr niam bơta pràn gơs. Geh Pôs đồng ling sền gàr tiah nhàr lơgar xã Dăk Lao sồr rê tus bal pơrjum bal mờ Ci ƀộ thôn Dăk Thọ, xã Dăk Lao, Thiếu tá Nguyễn Phúc Thuận sùm pơnđơl pràn lơh ngan jơh nùs nàng pơgồp bơnah lơh tam gơl bơta kơlôi sơnơng lơh broă sa, bơtàu tơnguh rài kis ai làng bol in. Thiếu tá Nguyễn Phúc Thuận, đơs: “Nàng gàr niam ai tờm sơntìl, phan ròng in di pal, den añ neh jòi gĭt, pơgồp bal mờ Mpồl cau lơh broă sa xã, kơnhoàl dê kơlôi sơnơng ală tờm sơltìl di pal nàng bơyai bal mờ làng bol in tam. Ai cau bơsram dờng rê cribơyai bal mờ làng bol ală broă lơh di pal nàng làng bol in gơtùi mut ngui. Añ kung khin cha sồr ală kwang bàng lòt tàm ù tiah, lòt tàm thôn nàng tus bal dong kờl ală hìu bơnhă kal ke”.

Ồng Nguyễn Khắc Chinh, Ƀí thư Ci ƀộ thôn Dăk Thọ, xã tiah nhàr lơgar Dăk Lao, kơnhoàl Dăk Mil, càr Dăk Nông pà gĭt, bơh ngai Thiếu tá Nguyễn Phúc Thuận geh jàu kơnòl broă tus bal pơrjum Ci ƀộ, neh dong ai thôn in uă ngan broă lơh geh kwơ. Ală dơ̆ pơrjum Ci ƀộ thôn sơlơ duh hồl ngan. Uă Nghị quyết geh ngan mờ rài kis, lơh sa geh Ci ƀộ sồr mờ lam lơh geh cồng nha. Ală đảng viên tàm Ci ƀộ kung gĭt loh rlau tai bè gơnoar, kơnòl broă bơh he dê. Uă đảng viên neh pơnđơl pràn lơh ngan tàm broă bơtàu tơnguh lơh sa nàng lơh krơh ai làng bol in. Uă hìu bơnhă bơh hơ̆ mờ neh khin cha tam gơl rơndăp tăp sèng, tam li la uă phan tam, tam phan jŏ nam, phan ròng, rài kis pah ngai sơlơ bơtàu tơnguh. Thôn gam uă hìu bơnhă kal ke, Thiếu tá Thuận bal mờ Ci ƀộ thôn ñă ntào hòi jà, tă pơgồp bal lơh 4 nơm hìu bơta nđàc. Jat ồng Nguyễn Khắc Chinh, bơh ală broă lơh bơh Thiếu tá Thuận dê lơh, làng bol tàm tiah nhàr lơgar ngai sơlơ pin dờn, kờñ gơboh ală cau ling geh griăt tơlir:“Thiếu tá Thuận là dùl nă kwang bàng kơnòm să, jơh nùs ngan, pơnđơl pràn ngăc ngar tàm tơl gah broă, broă lơh. Tơngkah Ci ƀộ kung bè làng bol tàm thôn tàm broă tam phan, lơh jat niam broă sền gàr tiah nhàr lơgar. Kờñ gơboh uă ngan”.

Jơh nùs “3 ơm bal, 4 lơh bal” nàng “mìu ñàc den sù jŏ”, dong làng bol tàm tiah nhàr lơgar tam gơl broă lơh kơlôi sơnơng broă lơh, bơtàu tơnguh rài kis là kơnòl broă bơh ală đảng viên ling sền gàr tiah nhàr lơgar dê geh sồr rê pơrjum bal mờ Ci ƀộ thôn, ƀòn tiah nhàr lơgar Dăk Nông. Ală broă lơh, broă lơh bè lơh sa bè hòi jà, dong kờl làng bol ròng siam kơnrồ me, tam kơphê, sầu riêng, tiêu sàng goh halà ală broă lơh gàr niam rài kis mpồl bơtiàn bè kòn ròng pôs đồng ling sền gàr tiah nhàr lơgar, hòi jà làng bol tơn jơh bau gờñ... neh jat sền mờ bơta krơi is, ală bơta geh ngan bơh tiah do dê. Mò H’Xuân, Phó Ƀí thư Huyện ủy kơnhoàl Dăk Mil, càr Dăk Nông pà gĭt,  Mpồl ling sền gàr tiah nhàr lơgar ai kwang bàng đảng viên rê lơh Phó Ƀí thư xã, tus bal pơrjum Ci ƀộ ală thôn, ƀòn tàm tiah nhàr lơgar bơh kơnhoàl dê ngan ngồn mờ geh cồng nha ngan. Mò H’ Xuân, pà gĭt: “Gơwèt mờ mpồl ling sền gàr tiah nhàr lơgar jơh gùt kơnhoàl den kung neh lơh geh uă broă lơh, broă lơh geh tam pà uă tiah ngan. Ală broă lơh hơ̆ geh lơh gơrề uă, mờ làng bol tàm ù tiah gùt kơnhoàl jờng rơ uă ngan. Pơgồp bơnah tàm broă lơh bơt bơtàu ƀòn lơgar Dăk Mil, kwơ màng là lơh jat ală Nghị quyết bơh Đảng dê bè bơtàu tơnguh lơh sa mpồl bơtiàn mờ bơt bơtàu lơngăp lơngai, sền gàr Dà lơgar tàm ù tiah kơnhoàl dê”.

Đại tá ồng Bùi Đức Chính, Phó Cíñ ủy Mpồl ling sền gàr tiah nhàr lơgar càr Dăk Nông pà gĭt, lơh jat jơnau sồr bơh Tỉñ ủy càr, Cỉ thị bơh Ƀan Thường vụ Đảng ủy Mpồl ling sền gàr tiah nhàr lơgar, Mpồl ling sền gàr tiah nhàr lơgar càr Dăk Nông neh yal tơngĭt 57 nă đảng viên pơrjum tàm 55 Ci ƀộ thôn, ƀòn; 146 nă đảng viên drơng 367 hìu bơnhă tàm tiah nhàr lơgar. Ală đảng viên Pôs đồng ling sền gàr tiah nhàr lơgar neh lơh jat niam gơnoar broă cribơyai tă pơgồp bal, dong kấp ủy, Ci ƀộ thôn, ƀòn gàr niam bơta pal jat, gùng dà broă lơh, bơta niam ală dơ̆ pơrjum bơh Ci ƀộ dê.

Mờ ală broă lơh làng bol chài, ală broă lơh geh ngan mờ geh cồng nha neh pơgồp bơnah bơtàu tơnguh rài kis bơh làng bol dê, bơt bơtàu bơta tam klăc bal poăc mhàm ling klàng làng bol tàm tiah nhàr lơgar. Rềp làng bol, sơlơ tơnguh tai bơta pràn tàm làng bol là ală bơta nàng Mpồl ling sền gàr tiah nhàr lơgar càr Dăk Nông in sền gàr tiah nhàr lơgar lơngăp lơngai mờ ngai sơlơ bơtàu tơnguh.