Ồng Y Dẫn Êban (kòn cau Rơđê) là đảng viên pơrjum tàm Ci ƀộ thôn Đoàn Thành 2, xã Hòa Đông, kơnhoàl Krông Pách, càr Dăk Lăk. Sa tềp pa do, hìu bơnhă chờ hờp ngan tài bơh ală bơta phan lơh geh bơh suơn sre geh kàl tơnhào uă, tăc geh giă mờ ngan ngồn dờp bơnah priă dờng 3 tơmàn 400 tơlak đong ai ù bơh Rơndăp broă lơh gùng rơndeh lòt mhar Khánh Hòa - Buôn Ma Thuột. Bơh priă jền do, ồng tă mờr 500 tơlak đong blơi rơndeh ôtô drơng broă lòt rê, rlau 2 tơmàn 900 tơlak đong gam wơl den ồng bơcri priă blơi 2 lồ ù tam kơphê tàm bơrlŭ bal mờ sầu riêng lơh geh priă jền ai tơngai tơnơ̆ do in. Broă blơi rơndeh mờ bơcri priă tai lơh suơn mìr neh geh hìu bơnhă kờp sền nền nòn ngan mờ dùl nùs bal tŭ gĭt ù tiah mờ tờm chi gơtìp ai wơl drơng broă lơh rơndăp broă lơh dê. Đảng viên Y Dẫn, yal: “Hìu añ geh kờp jơh 8 sào 4 ù tam kơphê, sầu riêng, tiêu mờ bàr pe tờm chi sa plai, priă lơh geh pah nam kờp bal 300 tơlak đong. Tŭ geh gùng dà broă lơh tàm nam 2021, tài bơh añ là đảng viên, mờ ală cau tàm hìu bơnhă kung ndrờm là đảng viên lơm den dùl nùs ngan mờ gùng dà broă lơh lơh gùng bơh Dà lơgar dê, bol añ kờp sền wơl mờ geh Dà lơgar dờp priă jền, kơ̆p kờñ là hìng nau do geh gùng lòt den broă lòt rê ƀuơn ƀoài rlau, ƀuơn tìp mat lơh kwèng bal, kă bro ƀuơn rlau tai”.

Hìu bơnhă đảng viên Y Ngắt Niê, ơm tàm xã Ea Yông, kơnhoàl Krông Pác kung geh rlau 500 thơk vuông ù mờ rlau 70 tờm kơphê ơm tàm mpồl ai ù drơng broă lơh rơndăp broă lơh gùng rơndeh lòt mhar Khánh Hòa- Buôn Ma Thuột. Bi pà gĭt, bơh bă ù mờ ală tờm chi tam do, hìu bơnhă geh dờp 120 tơlak đong priă ù. Jơh ală khà priă do geh ngui tàm broă bơcri priă lơh sa, tìm sơlo pa ai hìu jòng in. Hìu bơnhă kung là dùl tàm ală hìu bơnhă lam lài tàm xã Ea Yông lơh jat broă kờp sền, đo was, mờ lơh jat broă lơh ai priă ai ù mờ gờñ tàm jàu ù tiah. Đảng viên Y Ngắt, đơs:“Geh gùng dà broă lơh hòi jà jàu ù nàng lơh gùng rơndeh lòt mhar Khánh Hoà - Buôn Ma Thuột den hìu bơnhă añ kung dùl nùs bal sơl, dờp priă jền ai ù. Tài bơh he là đảng viên den kung lơh jat nùs nhơl lam lài, lơh lài nàng làng bol in sền bal tàm hơ̆ mờ lơh jat nàng geh gùng lòt niam, ƀuơn ngan lòt rê tàm rài tơnơ̆ do. Mờ añ kung hòi jà làng bol tàm ƀòn mờ geh bă ù gơtìp ai lơh gùng den kung mhar ngan dùl nùs bal lơh jat mờ jàu ù mờ khi ndrờm chờ hờp ngan, dùl nùs ring bal mờ broă ai priă, dờp ù”.

Rơndăp broă lơh gùng rơndeh lòt mhar Khánh Hòa - Buôn Ma Thuột, tơngai lơh broă dơ̆ 1 gơl lòt gan kơnhoàl Krông Pác geh bơta jòng 33,3 kơi sồ, bă ù ai ù lơh broă lơh bơt bơtàu dê là rlau 255 lồ. Rlau 2 rơbô hìu bơnhă gơwèt 8 xã geh ù ai lơh gùng gơtìp gơrềng. Ủy ƀan Ñân zân kơnhoàl neh lơh 9 dơ̆ ai ù, kờp jơh khà priă rlau 344 tơmàn đong. Jơh bă ù ai lơh gùng tàm kơnhoàl dê neh geh jàu ai ală mpồl lơh broă mut lơh gùng lòt lam lơh broă rơndăp lơh dê.

Jat ồng Phạm Văn Hà – Phó Củ tịc Ủy ƀan Ñân zân xã Hòa Đông, ù tiah tàm tiah kơnhoàl Krông Pác đơs bal mờ xã Hòa Đông đơs is uă ngan là ù bazan, gơ dờp ngan mờ tam kơphê, tiêu, ngan là sầu riêng ai priă lơh geh uă ngan. Tơl lồ gơtùi lơh geh priă jền bơh 800 tơlak đong tus 1 tơmàn 200 tơlak đong dùl nam. Bulah cồng nha lơh sa cèng wơl uă ngan, mơya tŭ geh gùng dà broă lơh ai ù drơng broă lơh gùng rơndeh lòt mhar, làng bol dùl nùs bal lơh jat, lòt lài tàm broă do là ală đảng viên tàm hơ̆ geh đảng viên là làng bol jơi bơtiàn dồ ết nă cau tàm xã dê. Ồng Phạm Văn Hà, đơs:“Tàm khà 152 hìu bơnhă tàm xã Hòa Đông geh ù lơh gùng rơndeh lòt mhar lòt gan, den geh mờr nggùl khà hìu bơnhă làng bol jơi bơtiàn dồ ết nă cau, mờ geh uă hìu bơnhă là kwang bàng, đảng viên. Sền bal ală hìu bơnhă kwang bàng, đảng viên den ndrờm lòt lài tàm broă lơh tàm jàu ù lơh rơndăp broă lơh. Pơn rơ bè hìu bơnhă ồng Y Dẫn, hìu bơnhă do geh bă ù uă mờr 1 lồ ù ai lơh gùng, ồng jơh nùs ngan dong kờl broă kờp sền mờ ai priă. Ală đảng viên ndai kung bè hơ̆ sơl”.

Mờ gùng dà broă lơh “đảng viên lòt lài ƀòn lơgar jat bơh ngkời” bơh ală đảng viên tàm xã Hòa Đông mờ Ea Yông gơwèt kơnhoàl Krông Pác, càr Dăk Lăk, broă ai ù tàm jàu ù lơh gùng ai ală mpồl lơh broă lơh rơndăp lơh gùng rơndeh lòt mhar Khánh Hòa - Buôn Ma Thuột in neh geh lơh gờñ ngan rlau jơh pơndrờm mờ ală kơnhoàl ndai tàm càr Dăk Lăk dê.