Tiến sĩ bi Trương Thanh Tùng, Cau ătbồ mpồl kơlôi sơnơng sơnơm pa gơ wèt Viện Kơlôi sơnơng gơguh jak Phenikaa, pơgru bơto Gah sơnơm tơm ba, Hìu bơsram Đại họk Phenikaa ƀòn dờng Hà Nội là mut măt pơnrơ ngan tàm mpồl ală cau jak chài kơnòm să lơgar Việt Nam mờ dunia dê, tài bơh bi neh geh uă broă lơh jak chài geh bơngă gơrềng tus dunia. Dùl tàm khà hơ̆ là broă lơh kơlôi sơnơng wèt tus kơlôi gơlik lơh ală bơta sơnơm pa bal mờ ală kòp lơh bơtờp. Pal sền ngăc là tơnơ̆ uă nam bơsram mờ kơlôi sơnơng tàm lơgar bơdìh, Tiến sĩ bi Trương Thanh Tùng neh săc rwah dô rê wơl hờ ƀòn lơgar tờm nàng ơm kis mờ tă pơgồp. Jăt Tiến sĩ bi Trương Thanh Tùng đơs, bè Wa Hồ neh geh tŭ đơs: Ơruh pơnu là cau tờm rài tơnơ̆ do bơh dà lơgar dê. Den tàng bè hơ̆, bi kờñ rê wơl hờ ƀòn lơgar tờm, ngui ală bơta gĭt wă neh geh bơsram tàm ală lơgar jak chài, kơlôi sơnơng, bơceh lơh ală bơta sơnơm pa ala sơnơm kháng siñ. Tiến sĩ bi Trương Thanh Tùng, pơgru Hìu bơsram Đại họk Phenikaa Hà Nội yal bè ală jơnau kờñ kơlôi sơnơng ală sơnơm kháng siñ, bè do: Añ kờñ cau Việt Nam bol he dê tàm rài tơnơ̆ do rơ̆p ờ gŏ ngòt broă ngui uă ir sơnơm kháng siñ tai. Kung bè geh ală bơta săc rwah ndai, ngui ală phan bơna mờ bol hi kơlôi sơnơng lơh gơlik geh uă nàng ờ gơtìp dră wơl sơnơm kháng siñ, dong kờl geh ală cau kòp gơtìp sơndră sơnơm. Jơnau kờñ kơlôi sơnơng dơ̆ mờ añ gam lơh là geh đau bàr pe cồng nha ngan ngồn hơ̆ là kơlôi sơnơng ală bơta sơnơm sơm kòp sơndră wơl kòp ung thư ƀă tàm. Ală bơta sơnơm do dilah gơtùi tăc geh tàm drà den digơlan rơ̆p tơrmù priă tă ai cau kòp ung thư in, sơm kòp ung thư niam rlau, tơn jŏ bơta kis ai cau kòp in kung bè gơ ờ geh bơta khih.

Ai gơ wèt mờ cau chài kơnòm să bi Nguyễn Thị Ngọc Hà, măt tơmoh là Hà Myo, sùm bơceh lơh, pơgồp bal gùng đơs crih bơh yau mờ Rap, mờ gùng đơs crih điện tử EDM, ai gùng đơs crih bơh yau tus rềp rlau mờ ală bơyô kơnòm să. Jơnau mờ Ngọc Hà kơ̆p kờñ ngan rlau jơh là gơtùi cèng niam chài Việt Nam tơ ƀă pơnì bal mờ ală lơgar dờng pràn tàm 5 kơnhoàl ù tiah gùt plai ù bè Wa Hồ kơ̆p kờñ sùm, nàng gơ̆p bơyô dunia in gŏ geh dùl Việt Nam gơguh jak, mŭt gơrờm bal mơya kung gam cèng sơl dùl bơta kwơ ờs mờng bơh yau niam chài krơi is. Yal bè ală lơh ngan tàm bơta pơgồp bal đơs xẩm mờ rap mờ gùng đơs crih điện tử EDM, bi Nguyễn Thị Ngọc Hà, đơs: 02 nam do añ lời tŭ jiơ nàng bơsram bàr pe bơta gùng đơs crih bơh yau Việt Nam dê. Tàm hơ̆ geh đơs xẩm, geh đơs xoan Phú Thọ dê, jơnau đơs pơnđik tiah đah jum tàm gùl lơgar dê mờ bàr pe jơnau đơs pơnđik ală jơi bơtiàn dùl êt nă cau bơh Việt Nam dê. Añ neh pơyua tus cau iăt cau sền in bàr pe jơnau lơh gùng đơs crih, bè xẩm do mờ xoan Phú Thọ den geh “Jơnau nhơl í a yàng pà”; jơnau đơs pơnđik kòn cau Mường mờ măt hòi là “Pờng ùr Khọt”. Bơta mờ añ kơ̆p kờñ ngan rlau jơh là gùng đơs crih ờs mờng bơh yau bơh Việt Nam dê gơ tus gơ in uă mờ cau iăt cau sền mờ añ kung geh ală jơnau kơ̆p kờñ tŭ añ geh đơs dùl anih lơh đơs crih dunia mờ sền cau iăt cau sền dunia tam ya rơya bal jăt ală jơnau ntas bơh gùng đơs crih bơh yau Việt Nam dê.

“Tiah lơi kờñ ơruh pơnu geh, broă lơi kal ke ơruh pơnu lơh” jơnau nting tơngkah gơ wèt mờ ơruh pơnu bơh Wa Hồ dê sùm là jơnau sơñio gùng ai bi Y Xim Ndu in, kòn cau M’Nông ơm tàm kơnhoàl Lăk, càr Dăk Lăk. Tơnơ̆ tŭ bơsram jơh Đại họk, bi Y Xim Ndu neh jơh nùs lơh ngan wơl rê wơl mờ ù tiah brê ro kơnrañ ngan bơh ƀòn lơgar tờm nàng sơnđờm mŭt lơh broă, jòi broă lơh broă sa. Tàm hơ̆ bi khin cha lòt lài tàm gah broă lòt nhơl lòt sền nàng gĭt brê bơnơm, niam chài mờ phan sa kòn cau; prăp gàr, sền gàr mờ yal tơngĭt niam chài ờs mờng bơh yau kòn cau dê, kwơmàng là niam chài cing mồng Tây Nguyên. Tŭ do, mpồl lơh sa kă bro bơh bi Y Xim Ndu dê lơh gơlik geh priă jền sùm ai 10 nă đoàn viên, ơruh pơnu tàm tiah do in. Bi Y Xim Ndu, đơs: Añ kờn ngui tơn ală bơta ƀươn neh geh lài tàm ƀòn lơgar bè brê bơnơm geh is, mpồl cau lơh broă tàm ƀòn. Bal mờ bơta kơ̆p kờñ tŭ sơnđờm mŭt lơh broă tàm ƀòn lơgar rơ̆p lơh geh bơta pin dờn, bơta gơn kơnờm pơn jờng ai uă bơyô kơnòm să ndai in lòt bal lơh bal tàm ală tŭ bơ̆t bơtàu mờ bơtàu tơnguh lơh sa. Tus mờ Pơrjum dờng ơruh pơnu gơguh jak lơh jăt jơnau Wa Hồ dê nam 2023, añ kơ̆p kờñ rơ̆p lơh kwèng geh mờ uă cau bơyô kơnòm să, sùm là ală cau lam lài lơh krơh, sùm bơsram tàp bè nùs nhơm, bồ tơngoh, bơsram tàp bè bơta gĭt wă bơta ngăc ngar nàng gơtùi bal mờ gơ̆p tam klăc mờ bơ̆t bơtàu, bơtàu tơnguh ƀòn lơgar tờm he dê.     

Do mìng là 3 tàm rlau 400 nă ơruh pơnu pơnrơ jak, là ală krơh pơnrơ tàm broă bơsram sră mờ lơh jăt bồ tơngoh, nùs nhơm, rài kis mờ broă lơh Hồ Chí Minh dê tus bal Pơrjum dờng ơruh pơnu gơguh jak lơh jăt jơnau Wa Hồ dê dơ̆ 07, khi là ală ơruh pơnu jak tàm mờng chài lơh broă, bềng jơnau bơceh lơh mờ geh “Bơta kơ̆p kờñ dờng ngan” bal mờ nùs nhơm khin kơlôi, khin lơh, khin kong kơnòl; kis geh bơta kơ̆p kờñ, tă pơgồp ai dà lơgar in.