Bal mờ uă bơta pa, tơngŏ rài kis niam chài krơi is kơnhoà ù tiah ƀòn yau dà lơgar dê; mơkung ai tơl bơta ai ală tiah mờ làng bol gùt lơgar bơyai lơh tơn ală broă lơh geh kwơ ngan wèt tus nggu rơyas mò pàng, kah rơngai dà kơlhề dờng ngan bơh mò pàng dê.

Tàm phan lời wơl niam chài jơi bơtiàn dê, Hìu duh khuai Bơtau Hùng mờ ngai Duh kah bơtau Hùng là jơnau pơrya bơh nùs nhơm kờñ gơboh dà lơgar mờ bơta pràn tam klăc dờng jơh gùt làng bol. Pin dờn duh kah Bơtau Hùng neh gơ gơs là bơhiàn niam chài krơi is, adat bơhiàn bơh cau Việt Nam he dê. Bulah lơh broă lơi, ơm tàm tiah lơi, tơl nă làng bol cau kòn ù tiah Việt Nam ndrờm kah tus nggu rơyas, kah tus mò pàng mờ nùs nhơm jơh nùs duh rơngòt, kah rơngal. Nam 2023, Bơyai lơh duh kah Bơtau Hùng mờ Tơngleh Niam chài mờ Lòt nhơl ƀòn yau dà lơgar geh càr Phú Thọ bơyai lơh bơh ngai 20 tus 29/04 nam 2023 hơ̆ là bơh ngai 01 tus ngai 10/03 nam Qúy Mão tàm ƀòn dờng Việt Trì, Tiah Tềl lời wơl kah yau Hìu duh khuai Bơtau Hùng mờ ală kơnhoàl, ƀòn drà tàm càr.

Bơnah bơyai lơh duh khuai geh càr Phú Thọ sồr lơh pal ki ngàm, yŭ rơyùm, gơcèng nùs nhơm mpồl bơtiàn, tơrgùm tàm ală broă lơh tờm: Bơyai lơh duh kah Bàp bơh sơnrờp Lạc Long Quân mờ pơdơng bơkàu tàm Rùp mòn “Wa Hồ tơm bơh bơr mờ kwang bàng, cau ling Mpồl ling dờn lam lài”; Bơyai lơh chu ñàng tàm ală tiah tềl duh kah Bơtau Hùng, ală cau tiơng pơnrơ, cau kwang ling rài Bơtau Hùng tàm ù tiah càr dê. Bơyai lơh chu ñàng kah kơlôi ală Bơtau Hùng bơh ală kơnhoàl, ƀòn dờng, ƀòn drà tàm càr dê.

Bal mờ ală broă bơyai lơh duh kah ờs mờng bơh yau, ală broă lơh bơnah lơh chờ nam do geh uă bơta pa, gơ jăt bal pơgồp bal mờ lòt nhơl, lơh gơs ală broă lơh Tơngleh Niam chài- Lòt nhơl, tơngŏ bơhiàn niam chài krơi is kơnhoàl ù tiah ƀòn yau dà lơgar dê. Pơnrơ là broă lơh Sơnđờm mŭt lơh “Bơyai lơh chờ Hìu duh khuai Bơtau Hùng mờ Tơngleh Niam chài- Lòt nhơl ƀòn yau dà lơgar nam 2023” mờ “Tơngleh phan lời wơl niam chài ờ di mờ phan bơna geh UNESCO cih mat” tàm tŭ 8 jiơ mang ngai 21/04/2023 tàm Ƀlàng dờng Bơtau Hùng; Cribơyai Dunia “Cribơyai lòt nhơl, niam chài, phan lời wơl mờ bơta bơtàu tơnguh kơ̆ kơl jăp lơgar Việt Nam dê”; Pơrlòng Re dà soài mờ tê mờ pơrlòng mpàn was ntàu tềng tơnau dà Sươn nhơl Văn Lang; Pơrlòng coh plai Kup Bơtau Hùng; pơrlòng nhơl bơlai ală mpồl pràn gùt lơgar tàm pìt kŭp Bơtau Hùng; bơyai lơh drà Lòt nhơl tiah đah tô mat tơngai mŭt dà lơgar nam 2023; Bơyai lơh drà ràng tơlik kă bro kông thương tiah đah tô mat tơngai lik mờ Phú Thọ nam 2023; Pơrlòng Niam chài Phan sa ƀòn yau dà lơgar dê; Bơyai lơh chờ sàl niam chài mờ Pơrlòng đơs crih tam ya làng bol drơng Duh kah Bơtau Hùng.

Bơdìh mờ ală broă lơh niam chài, tàp pràn să jan, lòt nhơl pah nam, nam do, gam geh lơh ală broă lơh niam bơnĕ is ndai, pơgồp bal niam ngan đah ală broă lơh niam chài ờs mờng bơh yau mờ rài pa tŭ do geh bơta pràn lơh gơrề uă, bè: Ràng tơlik “Phan lời wơl niam chài, lòt nhơl ală kơnhoàl ù tiah càr lơgar yau Việt Nam”; Lơh chờ àu kăp kơnòm dềt Việt Nam “Kah tus nggu rơyas”; soh àu kăp jơi bơtiàn Việt Nam ai cau in sền; Pơrlòng coh rơndeh coh srơh ală mpồl Việt Trì pờ ơnàng; bơyai lơh mpồl Farmtrip “Gùng lòt nhơl rùp să Dòr bơnơm”...Bơh hơ̆, dong năc lòt nhơl geh sền gŏ broă lơh pin dờn duh khuai Bơtau Hùng mờ ală phan bơna lòt nhơl mùl gŏ is gơ jăt bal mờ niam chài tiah ƀòn yau dà lơgar dê.

Kwơmàng nam do, càr Phú Thọ pơn jăt tai hòi jà ală hìu bơnhă tàm ù tiah càr dê rơcăng is sơlàu piang pal niam ngan, ram mhŭ nàng kah kơlôi, kah rơngal dà kơlhề dờng màng mò pàng bơh jơi bơtiàn dê tàm ngai 10 nhai 03 nam he. Ngai Duh kah Bơtau Hùng ngai 10 nhai 03 nam he pah nam neh gơ gơs là anih pơrgon đah hwềng bơh tơl nă làng bol lơgar Việt Nam dê, cèng uă bơta kwơ niam chài ờs mờng bơh yau kờñ gơboh dà lơgar, tơngŏ nùs nhơm gĭt ưn ngài jrô ơnàng ală Bơtau Hùng mờ ală rơnàng cau lài do neh geh dà kơlhề crơng mòn mờ sền gàr dà lơgar; mơkung bơ̆t bơtàu pràn kơldang mpồl tam klăc dờng jơh gùt jơi bơtiàn Việt Nam tàm bơ̆t bơtàu mờ sền gàr Dà lơgar.