Bè Anih Jơnau đơs Việt Nam dê neh yal, drim ngai 25/07, tàm Hìu pơrjum Thống Nhất, ƀòn dờng Hồ Chí Minh mờ ƀòn tờm tàm thôn Lại Đà, xã Đông Hội, kơnhoàl Đông Anh, ƀòn dờng Hà Nội, Mpồl Duh broă Đảng Dà lơgar, Quôk hội, Củ tịc lơgar, Cíñ phủ, Anih duh broă Mặt trận dà lơgar Việt Nam mờ hìu bơnhă neh yŭ rơyùm ki ngàm bơyai lơh Dơ̆ ies ƀồc ồng Nguyễn Phú Trọng, Tổng Ƀí thư Mpồl Duh broă Đảng Kộng sản Dà lơgar, jăt broă lơh Dà lơgar ies tơ̆p ƀồc. Dơ̆ ies ƀồc Tổng Ƀí thư ồng Nguyễn Phú Trọng geh bơyai lơh tàm nùs nhơm ki ngàm, ngoh rơngăc ngan.

Tàm nùs nhơm kah sơnđàc pơlai soh ngan gĭt lơh, Mpồl kwang bàng Mpồl Duh broă Đảng Dà lơgar bơh ồng Tô Lâm, Kwang bàng Ƀộ Cíñ trị, Củ tịc lơgar Kộng hoà Xã hội Củ nghĩa Việt Nam lơh Kwang ătbồ Mpồl lam bồ mŭt còp ies ƀồc ồng Nguyễn Phú Trọng, Tổng Ƀí thư. Mpồl kwang bàng Cíñ phủ bơh ồng Phạm Minh Chính, Kwang bàng Ƀộ Cíñ trị, Thủ tướng Cíñ phủ lơh Kwang ătbồ mpồl mŭt còp ies mờ tam pà bal bơta muăt jrùm mờ hìu bơnhă ƀồc ồng Nguyễn Phú Trọng. Kah sơnđàc ngan gĭt lơh ƀồc ồng Nguyễn Phú Trọng, Tổng Ƀí thư, Mpồl kwang bàng Củ tịc lơgar Kộng hoà Xã hội Củ nghĩa Việt Nam bơh ồng Tô Lâm, Kwang bàng Ƀộ Cíñ trị, Củ tịc lơgar lơh Kwang ătbồ mpồl mŭt còp ies mờ tam pà bal bơta muăt jrùm mờ hìu bơnhă ƀồc Tổng Ƀí thư ồng Nguyễn Phú Trọng. Mpồl kwang bàng Quôk hội bơh ồng Trần Thanh Mẫn, Kwang bàng Ƀộ Cíñ trị, Củ tịc Quôk hội lơh Kwang ătbồ mpồl mŭt còp ies ƀồc Tổng Ƀí thư ồng Nguyễn Phú Trọng mờ tam pà bal bơta muăt jrùm mờ hìu bơnhă ồng dê.