VOV4.K’ho- Mang ngai 26/03, tàm Hìu đơs crih dờng Hà Nội, Đoàn ơruh Pơnu Kộng sản Hồ Chí Minh dà lơgar, Kes priă Dong kờl Bơta jak cau kơnòm să Việt Nam bơyai lơh Dơ̆ jàu Khà jờng Muh mat cau kơnòm să Việt Nam pơnrơ jak nam 2021. Mpồl bơyai lơh neh sac rwah mờ jàu khà jờng 10 muh mat cau kơnòm să Việt Nam pơnrơ jak mờ 9 muh mat cau kơnòm să Việt Nam gơn kơnờm nam 2021.

Do là ală ơruh pơnu, kơnòm dềt pơnrơ jak mờ cồng nha pơnrơ ngan, jak ngan tàm ală gah broă bơsram sră, kơlôi sơnơng jak chài, tàp pràn să jan, lơh broă lơh sa, sền gàr Dà lơgar. Tàm dơ̆ bơyai lơh jàu khà jờng, ală muh mat cau kơnòm să Việt Nam pơnrơ jak geh dơ̆ tìp măt, lơh kwèng, yal tơngit bal mờ cau sền in tàm 3 tơngume “Kơ̆p kờñ mờ Kơ̆p kờñ ngan”, “Sơrlèt gan kal ke tă pơgồp dà kơlhề” mờ “Cồng nha lơh geh tă pơgồp dà kơlhề”. Mờ ală jơnau yal bềng jơnau lơh gơdan, ală muh mat cau kơnòm să Việt Nam ờ mìng tơngŏ geh nùs nhơm, bồ tơngoh lam lài tàm jơh ală bơta bơh rài kis mpồl bơtiàn dê mờ gam là bơta sùm lơh ngan brồ guh bơceh lơh nàng tă pơgồp tàm bơta bơtàu tơnguh mờ lơh jăt ngan ngồn jơnau kơ̆p kờñ ngan dờng pràn pas sơm bơh dà lơgar dê.

Cau mblàng Lơ Mu K’Yến