VOV4.K’ho- Mho ngai 16/03, tàm ƀòn dờng Hồ Chí Minh, Củ tịc lơgar ồng Nguyễn Xuân Phúc neh tus bal Dơ̆ bơyai lơh jàu pà Sră jờng rơ Khin cha jak chài Mpồl ling klàng phàu crong làng bol ai ƀồc ồng Lữ Minh Châu in, lài do là Phó Kwang ătbồ Mpồl lơh broă priă jền dờng màng N2683, Kwang ătbồ dờng Ngân hàng Dà lơgar Việt Nam. Ala măt Kwang bàng đơng lam bồ Đảng, Dà lơgar, Củ tịc lơgar ồng Nguyễn Xuân Phúc neh ki ngàm ngan jàu Sră jờng rơ Khin cha jak chài Mpồl ling klàng phàu crong làng bol ai cau ala măt hìu bơnhă ƀồc ồng Lữ Minh Châu in.

Đơs tàm dơ̆ Bơyai lơh, Củ tịc lơgar ồng Nguyễn Xuân Phúc đơs loh: Gơtùi đơs tàm tŭ tơngai bơta tam lơh cui rơcai ngan tàm tiah tam lơh đah jum dà lơgar, mờ gơnoar broă là Phó Kwang ătbồ Mpồl lơh broă priă jền dờng màng, ồng Lữ Minh Châu bal mờ ală oh mi lơh broă bal tàm Mpồl lơh broă priă jền dờng màng neh rơcăng lài, bơceh lơh, khin cha ngan lơh jăt niam kơnòl broă tă pơgồp jơnau đơs ai Mpồl lơh broă lơh sa priă jền dà lơgar Kục tiah đah jum dà lơgar in, ờ gŏ ngòt bòl glar kal ke, khin cha jak chài, ngac ngar ngan sơrlèt gan ală bơta gròi sền kràñ ngan bơh bol sò tơm dê nàng jun ndơ̆p niam ờdo ờdă ngan gĭt nđờ rhiang tơlak dolar Mỹ, ai pà sơrbac mhar ngan ai tiah lam lài tam lơh in, drơng di tŭ ai ală jơnau kờñ bơh kăc màng tiah đah jum dà lơgar dê, lơh gơs jak ngan kơnòl broă geh Ƀộ Cíñ trị, Đảng Dà lơgar mờ Cíñ phủ dê pin dờn mờ jàu kơnòl.

Cau mblàng Lơ Mu K’Yến