Pơrjum Kwang bàng Kâp dờng đah Asean mờ lơgar Australia dơ̆ 3 jờng rơ lam lơh jăt Broă rơndăp lơh lơh broă tơngai bơh nam 2020- 2024. Tàm nam 2022, kờp jơh priă geh bơh kă bro 2 gah geh 101 tơmàn dolar Mỹ, tàm tŭ FDI bơh lơgar Australia dê mŭt tàm Asean geh rlau 2 tơmàn dolar Mỹ. Thủ tướng lơgar Australia ồng Anthony Albanese đơs nền sền kwơmàng Asean, hơ lam lơh jăt Broă rơndăp lơh lơh broă bal lơh sa Tiah đah măt tơngai lik câu Á tus nam 2040, lơh gơlik bơta gơn kơnờm ai gĭt gơ̆p Tam klăc lơh broă bal jŏ jòng tơl làm đah Asean mờ Australia.

Tàm Pơrjum Kwang bàng Kâp dờng Asean mờ Liên hợp quôk dơ̆ 13, ală gah yal tơngĭt bơta wèt sền mờ hơ yờ tơnguh nùs nhơm uă lơgar, sền dờng màng adăt boh lam, sơlơ pơgồp bal sơrlèt gan mờ ală bơta lòng gùt plai ù. Tổng Thư kĭ Liên hợp quôk ồng Antonio Guterres đơs sùm, Liên hợp quôk kờñ bơta lòt bal ală mpồl uă lơgar, bè Asean mờ sồr lơh pràn lơh broă bal 2 gah tàm broă lơh jăt ală jơnau kờñ bơtàu tơnguh kơ̆ kơl jăp jŏ jòng, tàm hơ̆ sền gròi lơh broă bal tam gơl năng lượng, bơto bơtê sồ, lơh sơnơm, broă lơh, prăp gàr li la phan kis, ătbồ trồ tiah lơh aniai...Đơs nền lơgar Việt Nam là lơgar tàm mpồl jơh nùs, rơcăng lài bơh Asean mờ Liên hợp quôk dê, Thủ tướng Cíñ phủ ồng Phạm Minh Chính đơs sùm, lơgar Việt Nam rơ̆p sùm lơh ngan bal mờ bơta geh kơnòl uă ngan rlau jơh, tă pơgồp ai broă lơh bal bơh Liên hợp quôk dê, sơlơ tus bal tàm ală broă lơh sền gàr ring lơngai, mơkung lơh ngan lơh sir niam ală kơnòl broă kơn jơ̆ kơn jŭ dunia dê geh jàu.

Kềng bơdìh dơ̆ pơrjum, ngai 07/09, Thủ tướng Cíñ phủ Việt Nam ồng Phạm Minh Chính neh geh dơ̆ tìp mờ Thủ tướng lơgar Australia ồng Anthony Albanese mờ Kwang ătbồ Mpồl kwang bàng lơgar Nga, Ƀộ trưởng Ƀộ Ngoại giao lơgar Nga ồng Sergei Lavrov.

 Mho ngai 7/9/2023, Kwang đơng lam bồ ală lơgar Asean mờ lơgar lơh broă bal neh tus bal tơn jơh Pơrjum Kwang bàng kấp dờng Asean dơ̆ 43 mờ ală Pơrjum Kwang bàng kấp dờng geh gơrềng mờ Dơ̆ jàu gơnoar broă Củ tịc Asean bơh lơgar Indonesia tus lơgar Lào in.

Tàm jơnau đơs dờp gơnoar broă Củ tịc tàm pơdar bơh Asean dê tàm nam 2024, Thủ tướng lơgar Lào ồng Sonexay Siphandone ngan ngồn yal tơngume bơh Nam Asean 2024 là “Chồl tơnguh Tàm tơrbŏ bal mờ pràn kơl dang is”, đơs ală bơta tờm, lơh lài bè bơt bơtàu tam klăc bal, ring bal mờ gơnoar broă tờm bơh Asean dê, sơlơ tơnguh bơt bơtàu mpồl bơtiàn tàm tơrbŏ bal sùm, lơh pràn is, kơ̆ kơl jăp mờ gơ dờp tềng đap ală bơta lòng, tam gơl sơr băc mhar, kal ke tàm tiah do dê. Tơnơ̆ 3 ngai lơh broă mhar mờ jơh nùs, Pơrjum kwang bàng kấp dờng Asean dơ̆ 43 mờ Pơrjum kwang bàng kấp dờng geh gơrềng neh geh cồng nha niam bơnĕ. Mang ngai 7/09/2023, Thủ tướng Cíñ phủ ồng Phạm Minh chính bal mờ Mpồl kwang bàng lơgar Việt Nam neh lik bơh lơgar Indonesia rê tàm lơgar, tơn jơh geh cồng nha dơ̆ lòt lơh broă tus bal Pơrjum Kwang bàng kấp dờng Asean dơ̆ 43 mờ ală Pơrjum Kwang bàng kấp dờng geh gơrềng.