VOV4.K’ho- Mho ngai 23/9, tàm hìu lơh broă Quôk hội geh bơyai lơh tơngkah 30 nam Ngai crơng gơs Ủy ƀan sền gàr dà lơgar mờ sền gàr lơngăp lơngai bơh Quôk hội dê mờ dờp Huân cương lơh broă khà dùl.

Tus bal dơ̆ bơyai lơh tơngkah geh Củ tịc lơgar, Củ tịc Mpồl duh broă sền gàr dà lơgar mờ sền gàr lơngăp lơngai ồng Nguyễn Xuân Phúc; Củ tịc Quôk hội ồng Vương Đình Huệ. Tàm 30 nam do, Ủy ƀan sền gàr dà lơgar mờ sền gàr lơngăp lơngai neh tus bal uă tơngume tam gơl, bơ tơl sơnua boh lam nam 1992, bơt bơtàu sơnua boh nam nam 2013, ngan là ală kơrnuat bè sền gàr dà lơgar, bơt bơtàu mpồl ling, Mpồl duh broă sền gàr dà lơgar mờ sền gàr lơngăp lơngai; lam lơh ală kơnòl broă tàm gah jat sền, ală jơnau dan bơh Ủy ƀan dê bơh broă lơh jat sền geh bơta kuơ, bơta niam, gơtùi lam lơh ngan ngồn, dong Cíñ phủ, ală anih lơh broă geh gơnoar di tŭ bơsong ală bơta ờ niam tàm broă lam lơh broă lơh adat boh lam, pơgồp bơnah lơh gơlik tam gơl niam tàm gah jat sền.

Củ tịc Quôk hội ồng Vương Đình Huệ sồr tàm tơngai tus, Ủy ƀan sền gàr dà lơgar mờ sền gàr lơngăp lơngai pơn jat tai rơcang yal lài broă gơlik geh, tơnguh bơta niam broă lơh sền sơ wì, jat sền, ai tơlik jơnau đơs, jơnau dan ală broă bè broă rơndap lơh sền gàr dà lơgar, sền gàr lơngăp lơngai, ngan là ai tơlik ală jơnau git wă pa, bồ tơngoh kơlôi sơnơng pa bè sền gàr dà lơgar.

Cau mblàng K’Duẩn