VOV4.K’ho-  Ngai 14/10, tàm ƀòn dờng Yên Bái, Ƀộ Quôk phòng, Ƀan Tuyên giáo dà lơgar mờ càr Yên Bái pơgồp bal bơyai lơh dơ̆ cribơyai khoa họk kấp dà lơgar tơngkah kir sơn rai 70 nam Tam lơh pha lin Tiah đah Tô mat tơngai mŭt dà lơgar mờ tơngume: “Tam lơh pha lin Tây Bắc nam 1952- Bơta kwơ kah yau mờ jơnau bơsram mờng chài”.

Anih bơyai lơh dơ̆ pơrjum

Pơgap mờ do 70 nam, nam 1952, bơh bơta đơng lam bơh Đảng mờ Củ tịc Hồ Chí Minh dê, ling klàng mờ làng bol he tàm Tiah đah Tô mat tơngai mŭt dà lơgar mờ bơta pơgồp bal bơh ală tiah tam lơh, ală tiah jơh gùt lơgar dê neh ai geh pha lin dờng màng tàm dơ̆ tam lơh Tiah đah Tô mat tơngai mŭt dà lơgar dê. Tam lơh pha lin do là broă lơh kah yau kwơ màng, geh bơta kwơ kah yau geh gơtha tàm broă tam lơh jŏ jòng, lơh tềl dơ̆ bơtàu tơnguh pa, pơgồp bơnah ai dơ̆ tam lơh tam dră mờ bol sò tơm Tây lơh tus ai geh bơta jai pha lơh nền. Tàm dơ̆ cribơyai, rlau 90 jơnau cih tă pơgồp bal jơnau đơs neh tơrgùm lơh loh làng gơtha broă lơh kwơ màng jơh bal bè ling klàng, cíñ trị, lơh sa bơh tam lơh pha lin Tiah đah Tô mat tơngai mŭt dà lơgar dê nàng lơh geh nùs nhơm lơh ngan mờ bơta pràn pa ai dơ̆ tam lơh kwơ màng kàl mrềt nam pa 1953 – 1954, tơn jơh dơ̆ tam lơh tam dră mờ bol sò tơm Tây sơgràm phà.

VOV Tây Nguyên- Cau mblàng K’Hạnh