VOV4.K’ho- Drim ngai 06/4, hơ̆ là ngai 06/3 nam lơgar he dê, tàm hìu duh khoai Bàp sơn rờp dà lơgar Lạc Long Quân mờ hìu duh khoai Mè sơn rờp dà lơgar Âu Cơ gơ wèt tiah tềl kah yau Hìu duh khoai bơtau Hùng, ƀòn dờng Việt Trì, Đảng ƀộ, gơnoar atbồ mờ làng bol càr Phú Thọ ala mat làng bol, cau ling gùt lơgar, làng bol lơgar he tàm lơgar ndai bơyai lơh duh kah Bàp sơn rờp dà lơgar Lạc Long Quân mờ chu ñàng kah kơlôi Mè sơn rờp dà lơgar Âu Cơ.

Ală kwang bàng tus bal dơ̆ bơyai lơh duh kah Bàp sơn rờp dà lơgar Lạc Long Quân mờ Mè sơn rờp dà lơgar Âu Cơ

Dơ̆ duh kah Bàp sơn rờp dà lơgar Lạc Long Quân mờ chu ñàng Mè sơn rờp dà lơgar Âu Cơ geh lơh tàm nùs nhơm ki ngàm jat bơhiàn ờs mờng, gàr niam rơcang sơndră kòp Kovid-19. Mờ bơhiàn Hùc dà kah tô dà, kah dà kơl hề bơh Bàp sơn rờp dà lơgar dê là bơta niam bơhiàn ờs mờng jơi bơtiàn he dê.

Kwang đơng lam bồ càr Phú Thọ chu ñàng tàm dơ̆ bơyai lơh

Kah bè Bàp sơn rờp dà lơgar Lạc Long Quân mờ mè sơn rờp dà lơgar Âu Cơ neh lơh gơlik ngu rơyas jơi bơtiàn in, lơh gơlik bơnàng jă ai bơta bơtàu tơnguh bơh jơi bơtiàn dà lơgar dê in tơnơ̆ do. Kòn sau lạk hồng sùm kah ưn ngài dà kơl hề dờng màng bơh Bàp sơn rờp dà lơgar Lạc Long Quân mờ ală rơnàng lài do neh geh dà kơl hề bơt bơtau dà lơgar.

Cau mblàng K’Duẩn