Ƀí thư thàñ ủy ƀòn dờng Hồ Chí Minh ồng Nguyễn Văn Nên bal mờ ală kwang đơng lam bồ, lài do là kwang đơng am bồ Đảng, Dà lơgar, kwang đơng lam bồ ƀòn dờng Hồ Chí Minh, ală mpồl ling phàu crong, mpồl lơh broă, gah broă, mpồl cau, ală mpồl lơh broă mpồl bơtiàn, mpồl cribơyai broă mờ lơgar ndai ală lơgar tàm ƀòn dờng, mpồl ala mat ală càr, ƀòn dờng tiah đah Jum dà lơgar bal mờ uă ngan ală rơnàng làng bol neh kun bồ ies bồc Tổng Ƀí thư ồng Nguyễn Phú Trọng mờ bơta kah sơnđàc pơlai soh uă ngan.

Ồng Nguyễn Văn Nên cih tàm sră ƀồc geh gơl: “Bol añ sùm kah sùm rùp hìn dùl nă cau ƀuơn ngan, pơndềt să ngan, bơta pràn krơi is ngan; dùl nùs nhơm dờng; dùl nă kwang bàng đảng viên lam lài, jơh nùs dòn song, dờng màng ngan; dùl nă kwang đơng lam bồ geh nùs nhơm niam, jak chài, khin cha; dùl krơh niam pơn rơ ngan tàm bơsram, bơsram tàp jat bồ tơngoh, broă lơh, nùs nhơm mờ rài kis Wa Hồ kờñ gơboh dê. Dan bơsram is, jat krơh niam Ồng mờ ală cau lòt lài dê, dan đòm jat bơhiàn yau dồ bă di pal ngan, tam klăc bal rlau tai, pơnđơl ngan rlau tai, jơh nùs lơh ngan uă rlau tai, lơh ngan bơt bơtàu ƀòn dờng Hồ Chí Minh “Niam ngan măt sơnđan” bè Ồng kơ̆p kờñ sùm, bơto pơlam, pơgồp bơnah bal mờ jơh gùt lơgar, tài jơh gùt lơgar bơt bơtàu mờ sền gàr Dà lơgar Việt Nam ngai sơlơ niam jak, hờn chờ, pràn kơl dang, pas pràn. Dan pơyoa tus hìu bơnhă ồng Nguyễn Phú Trọng dê jơnau tam pà bal muăt jrùm uă ngan rlau jơh”.