Lài hơ̆, ngai sơn rờp dơ̆ jàu – dờp ling neh geh lơh tàm 30 càr, ƀòn dờng tàm gùt lơgar, git nđờ jơt rbô nă ơruh pơnu neh hô hơng lòt gùng, gàr tơl bè khà, bơta niam, lam lơh jun ling rê hờ pôs ling di tŭ tơngai, lơngăp lơngai jơh ală bơta. Nam do, gùt ƀòn dờng Hà Nội geh 1 rbô 471 nă cau cih is sră dan lòt ling. Đại tá Đào Văn Nhận, Phó Kwang đơng lam bồ mờ là kwang atbồ pơlam gùng dà Gah đơng lam ling klàng càr lơgar Hà Nội pà git, 8 jơ drim, dơ̆ jàu dờp ling dồ ròt geh lơh tàm 30 quận, kơnhoàl bơh ƀòn dờng Hà Nội dê.

Tŭ do, 3 rbô 700 nă cau lòt gùng lơh kơnòl ling klàng mờ 794 nă cau lòt lơh kơnòl kwang àng làng bol neh rơcang lòt gùng rê hờ mpồl mờ he lơh kơnòl. Tàm Thanh Hóa, bulah trồ mrềt mờ geh mìu dùl êt, mơya ờ lơh gơ rềng tus nùs nhơm hô hơng bơh rlau 3 rbô 650 nă ling pa dê. Ală tiah neh rơcang lài wil tơl ală bơta pal geh nàng dơ̆ bơyai lơh in geh lơh duh hồl, tơngac ală ling pa lòt gùng lơh kơnòl broă.