VOV4.K’ho- Tơngkah kir sơnrai 97 nam Sră ƀăo Kăc màng Việt Nam, drim ngai 21/06, tàm Hà Nội, Ƀan Tuyên giáo dà lơgar, Ƀộ Thông tin mờ Truyền thông, Mpồl cau lơh ƀăo Việt Nam, Sră ƀăo Nhân zân pơgồp bal bơyai lơh Dơ̆ lam lơh tàm pơrlòng “Lơh gơs tiah niam chài tàm ală anih lơh sră ƀăo wèt tus Tơngkah kir sơnrai 100 nam Sră ƀăo Kăc màng Việt Nam (21/06/1925- 21/06/2025).

Dơ̆ lam lơh nàng kờñ tơnguh uă bơta gĭt wă, kơnòl bơh kâp ủy, mpồl đảng, kwang đơng lam bồ anih lơh broă sră ƀăo, cau lơh ƀăo dê bè gơnoar broă, kơnòl broă, bơta kwơmàng bơh niam chài dê gơwèt mờ bơta bơtàu tơnguh dà lơgar, kung bè bơta bơtàu tơnguh bơh tơl anih lơh broă sră ƀăo dê, bơta kwơ bơh ală jơnau cih sră ƀăo dê mờ bơngă, muh mat bơh cau lơh ƀăo dê. Broă tờm là lơh gơs anih lơh broă sră ƀăo niam chài, cau lơh ƀăo niam chài, lơh gơchồl mờ lơh gơrề bơta lơh jăt, tus bal jơh nùs, lơh geh srơh tàm pơrlòng ngan ngồn mờ geh kwơ ngan nàng ală anih lơh broă sră ƀăo lơh jăt niam gơnoar broă, kơnòl broă bơh sră ƀăo kăc màng dê tàm sền gàr, lơh gơs mờ bơtàu tơnguh rài niam chài Việt Nam gơguh jak, bềng uă rài kis krơi is jơi bơtiàn dê.

Cau mblàng Lơ Mu K’Yến