VOV4.K’ho- Ngai do 19/08, tàm Hà Nội, Ƀộ Nông nghiệp mờ Phát triển Nông thôn pơgồp bal mờ Ƀộ Thông tin mờ Truyền thông bơyai lơh dơ̆ lam lơh “Tam gơl sồ Nông nghiệp mờ Phát triển Nông thôn” mờ yal broă lam lơh Ală jơnau yal mờ ală jơnau yal tơngĭt ai mờ atbồ mã sồ tiah tam phan.

Jat jơnau kờp dŭ lài, gùt lơgar tŭ do geh 4 tơlak 800 rơbô lồ bă ù tam phan, tàm hơ̆ geh: tờm chi sa plai, lơh kòi sre mờ tờm chi tam jŏ ngai. Tàm hơ̆, uă tiah neh geh ai mã sồ yal mat nàng gròi sền bơta lơh sa, jòi gĭt tiah tờm lơh gơlik, tơnguh uă bơta bơkah niam phan lơh geh bơh suơn sre dê, bè: kòi, phe tàm tiah Ring dà dờng Cửu Long; kơphê, plai màk tàm tiah Tây Nguyên, plai Thanh long tàm Bình Thuận; plai gơ àl tàm ală càr Hải Dương, Bắc Giang, Hưng Yên, Sơn La... Mơya, bơta sền gŏ ngan, broă lơh sa kung gam ờ uă, rah rài dùl ết mờ ờ hềt tàm tơrbŏ bal tơl làm jơnau yal tơngĭt đah cau tam phan mờ drà kă bro... Bơta geh ngan do sồr pal lơh mhar broă tam gơl sồ tàm gah broă tam phan nàng tơnguh uă cồng nha đah tam phan, drà kă bro mờ cau ngui sa.

Cau mblàng K’Hạnh