Dơ̆ lơh chờ sầu riêng Krông Pắk, càr Dăk Lăk dơ̆ 2 rơp lơh niam nùs nac lòt nhơl mờ broă bơyai lơh dờng rlau, uă broă lơh niam, geh kuơ rlau, do là jơnau đơs nền bơh kwang đơng lam bồ kơnhoàl Krông Pắk, càr Dăk Lăk dê tàm dơ̆ pơrjum ƀău yal bè Dơ̆ lơh chờ sầu riêng Krông Pắk, Dăk Lăk dơ̆ 2 nam 2024 geh lơh drim ngai 18/7. Mờ tơngume “Sầu riêng Krông Pắk – Bơtàu tơnguh mờ mut gơ rờm bal”, dơ̆ lơh chờ rơp geh lơh bơh ngai 31/8 tus ngai 02/9/2024.

Mò Ngô Thị Minh Trinh – Phó Củ tịc Anih duh broă làng bol kơnhoàl Krông Pắk pà git: gùt kơnhoàl tŭ do geh mờr 8 rbô lồ ù tam sầu riêng, geh 1/3 bă ù tam sầu riêng bơh gùt càr Dăk Lăk dê. Kàl sầu riêng nam do, kờp dŭ khà tơnhàu geh rlau 92 rbô tấn. Sầu riêng neh gơ gơs là chi tam tờm ngan cèng wơl priă jền lơh geh tờm ai làng bol tàm kơnhoàl in. Dơ̆ lơh chờ sầu riêng kơnhoàl Krông Pắk dơ̆ 2, geh broă bơyai lơh dờng rlau, geh lơh niam rlau, uă broă lơh geh kuơ rlau rơp pơn jat tai jờng rơ cau tam sầu riêng mờ ală cồng nha lơh sa bơh bơta plai chi do cèng wơl.