Pơn jat tai dơ̆ lùp mờ hơ jơnau lùp tàm pơrjum dơ̆ 7 bơh Quôk hội dê, drim ngai 5/06, Ƀộ trưởng Ƀộ Kông thuơng ồng Nguyễn Hồng Diên đơs loh ală jơnau tờm lơh sa mờ măi mok dong kờl tàm lơgar ờ hềt lơh geh jơnau kờñ geh ai là tài bơh priă jền mờ ală broă dong kờl gơ hòi gơ jà bơcri priă bơh lơgar ndai FDI. Mờ Ƀộ Kông thương kung lơh loh ală broă lơh nàng dong kờl mpồl lơh sa kă bro tăc phan mờ lơgar ndai tàm tơngai tus nàng kờñ ngui uă ngan rlau jơh bơta ƀuơn, bơta pràn bơh ală Hiệp địñ khat gơboh rài pa dê.

Đơs pơndŭt mpồl broă gơwèt geh broă Kông thương dê, Củ tịc Quôk hội ồng Trần Thanh Mẫn đơs nền, dơ̆ lùp mờ hơ jơnau lùp geh bơyai lơh tàm nùs nhơm duh hồl, geh kơnòl uă. Neh geh rlau 40 dơ̆ kwang bàng lùp mờ hơ jơnau lùp mờ 6 nă kwang bàng tàm pơdang bal. Ƀộ trưởng Ƀộ Kông thương neh hơ jơnau lùp sền bal là tơl làm ală broă ală kwang bàng Quôk hội dê lùp. Bơh dơ̆ lùp mờ hơ jơnau lùp, sồr Cíñ phủ, Ƀộ trưởng Ƀộ Kông thương mờ ală Ƀộ geh gơrềng lơh jat geh cồng nha ală broă lơh neh geh ai, tàm hơ̆, pơn jat tai lơh sir adat boh lam geh gơrềng tus kă bro điện tử, sền gàr cau ngui sa; lơh pràn hòi jà kă bro, rề ơnàng, lơh li la uă drà kă bro dunia pơgồp bal mờ tơnguh uă bơta niam phan bơna dê.