VOV4.K’ho- Bè Anih Jơnau đơs Việt Nam neh yal, gĭt nđờ jơ̆t lồ brê kwơmàng bơh bàr Brê dà lơgar Chư Yang Sin (càr Dăk Lăk) mờ Bidoup- Núi Bà (càr Lâm Đồng dê) neh gơtìp cò tơnring tìs mờ kơrnoăt boh lam tŭ ală mpồl lơh gùng tàm rơndăp broă lơh gùng Trường Sơn Đông. Brê ờ geh kấp geh gơnăp gơnoar kĭ ai tam gơl, broă mus kơl brê ờ geh bơta jăt sền bơh cau tờm mờ anih lơh broă geh gơnoar dê. Broă gơ tơlik là mờ dùl bă brê kwơmàng dờng bè hơ̆ bơh bàr Brê dà lơgar dê gơtìp mus kơl trak jơh, bơnah dơm chi digơlan ờ gŏ dùl ê ờ tŭ neh lòt tus tiah lơi, rê tus anih lơi?

Tiah mus kơl brê nàng lơh gùng Trường Sơn Đông gơwèt ală bă brê dềt 22 mờ 26, bơnah brê bơh Brê dà lơgar Bidoup- Núi Bà, gơwèt ù tiah ătbồ bơh xã Dơng Knơh, kơnhoàl Lạc Dương, càr Lâm Đồng dê. Tàm do, dùl nơm gùng jòng rlau 3 kơi sồ neh geh lơh lòt ală bă brê tàm bơrlŭ dơm chi nha dờng mờ kơrlô kơrla, brê nha jrum dùl êt, brê nha jrum mờ ù lời gời bơh Brê dà lơgar Bidoup- Núi Bà dê. Jăt kềng gah gơl gùng do tŭ do mìng gam wơl rah rài tềl lời wơl bàr pe bơta chi brê gơtìp cò tơnring, tờ jơh nggu tờm tơn, gơtìp ù lŭ bồr tơ̆p jơh. Lòt sền tiah mus kơl brê lơh gùng do, ồng Thân Văn Hữu, Ƀí thư Đảng ủy mơkung là Củ tịc Ủy ƀan Ñân zân xã Dơng Knơh, kơnhoàl Lạc Dương, càr Lâm Đồng pà gĭt, broă cò tơnring brê nàng lơh gùng geh lơh tàm nam 2021. Ồng Thân Văn Hữu yal: Bol añ lài do kung lòt sền sùm sơl, kung gŏ mpồl lơh gùng sơl, mơya mpồl lơh gùng ờ gŏ đơs dùl dờ dùl bơr lơi mờ gơnoar ătbồ xã bè broă do kung bè yal ală gùng dà broă lơh lơh gùng. Mpồl lơh gùng ờ yal, ờ lùp mờ ờ lơh broă mờ xã. Bol añ mìng gĭt gùng do gam lơh lơm, gam lơh gùng ing. Tŭ do, kung sồr oh mi lòt sền sùm, kràñ ngan, ờ lời broă sơmờm lơh gùng do nàng sơgràm aniai brê, koh kơl dơm chi brê tìs mờ kơrnoăt boh lam.

Dùl dơm chi dờng gam wơl kềng gah gùng

 Ồng Nguyễn Lương Minh, Phó Kwang ătbồ Brê dà lơgar Bidoup- Núi Bà pà gĭt, nàng drơng rơndăp broă lơh gùng Trường Sơn Đông, Ủy ƀan Ñân zân càr Lâm Đồng neh geh kơrnoăt toh ai wơl 13 lồ 5 sàu bơh brê dê jàu ai Mpồl ătbồ rơndăp broă lơh 46 in. Jăt jơnau ai, broă lơh gùng mìng geh lơh tơnơ̆ tŭ kâp geh gơnăp gơnoar kĭ ai tam gơl brê, gơnoar ătbồ mờ gah lơh broă geh gơnoar tiah do tus ai ù lơh gùng, ai jơh dơm chi brê, jàu măt ù nàng lơh gùng. Mơya, tŭ ờ hềt lơh sir ală sră pơ àr den mpồl lơh gùng neh khăt gơboh nùs is mŭt cò tơnring ù brê. Broă do là ờ di mờ ală jơnau ai bơh kơrnoăt boh lam dà lơgar dê mờ tŭ do kung gam ờ hềt gơtùi gĭt nền khà dơm chi gơtìp mus kơl. Ồng Nguyễn Lương Minh, đơs: Tờm chi den kung geh sơl, đah Ci kụk Kiểm lâm kung gam lòt lùp khàu sơl, ngai òr, ngai ne añ kung mŭt sền nàng lơh loh bơta do sơl. Den broă do, Ủy ƀan Ñân zân càr neh sồr anih lơh broă geh gơnoar mŭt lơh broă loh làng, tơnơ̆ do geh kờp sền, hơ̆ sồng lơh loh kơnòl bơh ală gah dê lơm.      

Tàm tŭ hơ̆, đah bơnah brê bơh Brê dà lơgar Chư Yang Sin dê, ală anih lơh broă geh gơnoar càr Dăk Lăk bơh sơnrờp gĭt nền, ală mpồl lơh gùng Trường Sơn Đông tàm bơnah broă Đ41 neh cò tơnring rlau 15 lồ brê lòt gan bàr bă brê dềt 1383 mờ 1402 tŭ ờ hềt geh kơrnoăt ai tam gơl jơnau kờñ ngui brê, ờ hềt lòt tơrgùm ai jơh dơm chi brê. Rlau 7 kơi sồ gùng neh lơh gơs, lòt gan uă bơta brê nha dờng ờs tơlir, brê tàm bơrlŭ, brê kơrlô kơrla. Ồng Nguyễn Quốc Hưng, Kwang ătbồ Ci kụk Kiểm lâm càr Dăk Lăk pà gĭt, ală tŭ lơh sră nggal tam gơl brê ai bơnah broă Đ41 in, rơndăp broă lơh gùng Trường Sơn Đông in, anih lơh broă geh gơnoar neh gĭt nền khà dơm chi là rlau 260 khối. Ồng Nguyễn Quốc Hưng, đơs: Lòt sền wơl bơta geh ngan brê, rơcăng ai sră nggal tam gơl jơnau kờñ ngui brê den 16,72 lồ do geh bàr pe bă brê, dơm chi. Tàm hơ̆, khà brê gĭt nền geh là 264 khối. Ờ hềt geh gùng dà tơrgùm ai jơh là tài bơh ờ hềt geh kơrnoăt lơh nền tam gơl jơnau kờñ ngui brê. Tơnơ̆ tŭ geh kơrnoăt tam gơl den broă lơh pơn jăt tai là geh lơh rơndăp broă lơh jơnau chi nàng gĭt nền khà dơm chi gơtùi tơrgùm ai jơh, nàng tăc jàu kes priă dà lơgar in.

Khà dơm chi tàm bơnah broă Đ41 là rlau 260 khối

Mờ gĭt nđờ jơ̆t lồ brê kwơmàng geh sền gàr kràñ ngan bơh 2 Brê dà lơgar, khà dơm chi ngan ngồn là ờ dùl êt ờ. Bè hơ̆ mơya, tiah lơh gùng do tŭ do jơh ală chi brê tàm gơl gùng jòng rlau 10 kơi sồ neh gơtìp mus kơl lề trak jơh. Tŭ do, mìng gam wơl tềl lời wơl bàr pe tờm chi gơtìp bồr tơ̆p ơm rềp kềng gah gùng, geh chi dờng di bàr nă cau kuar. Bơta mpồl bơtiàn sền gròi là khà dơm chi tàm gơl gùng pa lơh lòt gan brê kwơmàng gơwèt 2 Brê dà lơgar Chư Yang Sin (càr Dăk Lăk) mờ Bidoup- Núi Bà (càr Lâm Đồng) dê neh lòt tiah lơi, rê anih lơi? Mờ cau lơi pal kong kơnòl ai broă chi che dà lơgar gơtìp hoàc hươr taih?      

              Cau cih VOV Tây Nguyên- Cau mblàng Lơ Mu K’Yến