Do là dùl tàm ală hìu bơsram tiah sar lơgar ngài kal ke, geh bơyai lơh dơ̆ sơnđờm mut bơsram nam bơsram pa gờñ ngan rlau jơh càr dê. Rlau 180 nă kơnòm bơsram bơh Hìu bơsram kấp dùl Cư Pui 2, hìu bơsram thôn Ea Rớt, xã Cư Pui, kơnhoàl Krông Bông, càr Dăk Lăk dê neh tus bal dơ̆ sơnđờm mut nam bơsram pa gờñ nam bơsram 2024 – 2025. Do là dùl tàm ală hìu bơsram kal ke is ồn ngan bơh càr Dăk Lăk dê, geh glòm gùt dar bơh kơh bơnơm, gùng lòt kal ke, khà hìu bơnhă rƀah geh rlau 90%.

Klau pơgru Nguyễn Hồng Thuần, Kwang atbồ Hìu bơsram kấp dùl Cư Pui 2 pà gĭt: nam bơsram 2024-2025, hìu bơsram geh 7 ơdŭ bơsram mờ 186 nă kơnòm bơsram. Hìu bơnhă ală kơnòm dềt ơm ngài ngan mờ hìu bơsram den bơh tàm nhai 8 hìu bơsram neh pơgồp bal mờ ală kwang atbồ mpồl hòi jà, hòi jà mè bèp sền gròi broă jun oh kòn lòt tus hìu bơsram. Hìu bơsram kung neh rcang tơl làm nàng ală kơnòm dềt in geh dùl nam bơsram pa bềng lìu bơta chờ hờp mờ geh cồng nha niam.