Tàm dơ̆ tìp mat, bàr Tổng Ƀí thư, Củ tịc lơgar đơs nền bơta git gơp đah Việt Nam mờ Lào là jơtài bal dờng ngan bơh bàr jơi bơtiàn, là bơta pal geh mờ là bơta pràn dờng ngan rlau jơh bơh 2 Đảng, 2 dà lơgar mờ làng bol 2 lơgar dê, pal pơn jat tai đòm jat, ngui niam, sền gàr mờ tàm pơ dờn wơl ai ală rơnàng tơnơ̆ do in. Tổng Ƀí thư, Củ tịc lơgar ồng Tô Lâm đơs nền lài do kung bè tơnơ̆ do mìng dùl lơm, bơta git gơp đah Việt Nam mờ Lào sùm là broă lài ngan tàm broă lơh mờ lơgar ndai bơh Việt Nam dê.

Tổng Ƀí thư, Củ tịc lơgar Lào đơs nền, tàm khat bơta lơi, Lào rơp bal mờ Việt Nam sùm lơh kơ̆ kơljap, sền gàr mờ sơlơ tơnguh tai bơta git gơp tam klac bal kuơmàng đah Việt Nam mờ Lào ngai sơlơ bơtàu tơnguh, lơh geh cồng nha niam, tài bơta kuơ ngan ngồn bơh làng bol tơl lơgar dê, tài ring lơngai, kơ̆ kơljap mờ bơtàu tơnguh bơh tiah do mờ dunia dê.