Ngai 06/9, tàm càr lơgar Hà Nội, Tổng Ƀí thư ồng Nguyễn Phú trọng, Củ tịc Đảng Làng bol lơgar Campuchia ồng Samdech Techo Hun Sen mờ Tổng Ƀí thư Đảng Làng bol kac màng Lào, Củ tịc lơgar Lào ồng Thongloun Sisoulith neh geh dơ̆ tìp mat kâp dờng Việt Nam – Campuchia- Lào.

Do là broă geh gơtha kuơmàng ngan nàng kờñ lơh kơ̆ kơljap, sơlơ tơnguh rlau tai bơta git gơp đah 3 Đảng mờ làng bol 3 lơgar Việt Nam- Campuchia- Lào tàm tŭ tơngai ală bơta tàm dunia, tàm tiah do pơn jat tai gơlik geh kal ke mờ jơh bal 3 Đảng, 3 lơgar mut tàm tŭ tơngai bơtàu tơnguh pa. Tàm dơ̆ tìp mat, ală gah neh yal gơp in bè broă bơh tơl đảng, tơl lơgar dê, ngan là broă lơh bơt bơtàu Đảng mờ bơtàu tơnguh lơh sa- mpồl bơtiàn; cribơyai bè broă tàm dunia, tàm tiah do geh pơn rơ rềp ndo mờ ală tơngume jơh bal 3 gah sền gròi bal; sền sơ wì cồng nha lơh broă bal đah 3 Đảng, 3 lơgar tàm tơngai lài. Kwang đơng lam bồ 3 Đảng ring bal ală gùng dà ai tơlik lài dờng ngan ai bơta git gơp lơh broă bal đah 3 Đảng, 3 lơgar in tàm ală gah tài bơta kuơ bal bơh làng bol 3 lơgar dê tàm tơngai tus. 3 gah ring bal ngui niam geh cồng nha ală mpồl lơh broă gam geh tŭ do, kơlôi sơnơng lơh 2, 3 mpồl lơh broă bal pa nàng kờñ sơlơ tơnguh bơta git gơp lơh broă bal đah 3 Đảng, 3 lơgar tài bơta kuơ bơh làng bol 3 lơgar dê, tài ring lơngai, kơ̆ kơljap, lơh broă bal mờ bơtàu tơnguh tàm tiah do mờ tàm dunia.