Tàm xã Ia Chía, kơnhoàl Ia Grai, càr Gia Lai, Đoàn neh jàu 350 bơnah phan pà ai ală hìu bơnhă là cau lơh phan, cau lơh broă gơtìp kal ke, kơnòm dềt là làng bol kòn cau dồ ết nă cau brồ guh tàm broă bơsram sră... Tơl bơnah phan pà kờp priă 700 rơbô đong, tàm hơ̆ geh priă mat mờ ală phan ngui kwơ màng kờñ pal geh. Bơh broă lơh “Sa tềp tam pà bal, nam Đăng grài bơtàu tơnguh”, Đoàn Dà lơgar kơ̆p kờñ pơn jat tai đòm jat niam bơhiàn kờñ gơboh kòn bơnus “tàm dong kờl bal”, tam klăc bal, jơm glòm bal, tam pà bal bơh jơi bơtiàn dê. Ală kấp ƀộ đoàn pơn jat tai tus bal jơh nùs, geh tai uă broă lơh geh kwơ, lòt bal mờ ơruh pơnu, kơnòm pa tàu mờ kơnòm dềt geh rài kis kal ke, ngan là tàm tơngai Sa tềp Dà lơgar, pơgồp bơnah lơh geh tai bơta gơn kơnờm nàng ală gơ̆p bơyô ơruh pơnu, đoàn viên, cau lơh broă in pơn jat tai pơn đơl pràn lơh ngan brồ guh tàm broă lơh broă sa.

Dờp geh phan pà dong kờl bơh broă lơh dê, bi Rơ Mah Ky, ơm tàm ƀòn Kon Yố, xã Ia Chía, đơs:“Ưn ngài uă ngan ală anih lơh broă, mpồl lơh broă neh sền gròi mờ pà phan, geh gơtha uă ngan gơwèt mờ tiah do in, kơ̆p kờñ ngan geh bơta sền gròi rlau tai bơh ală kấp, ală ngàñ dê tus mờ xã tiah sar lơgar ngài, tiah kal ke uă ngan bơh kơnhoàl dê”.

Di dơ̆ do, mpồl lơh broă bơh Đoàn Ơruh pơnu Kộng sản Hồ Chí Minh Dà lơgar bal mờ Tỉñ đoàn càr Gia Lai neh tus còp, pơndờm pơnđiang mpồl ling sền gàr tiah nhàr lơgar tàm Pôs đồng ling sền gàr tiah nhàr lơgar Ia Chía, càr Gia Lai.

Gia Lai là càr dơ̆ 13 tàm khà 25 càr, ƀòn dờng mờ broă lơh “Sa tềp tam pà bal, nam Đăng grài bơtàu tơnguh” lòt gan mờ pà rlau 10 rơbô 400 bơnah phan sa tềp rơ̆p jàu ai ală cau lơh phan, cau lơh broă gơtìp gơrềng bơh broă lơh tơrmù broă lơh tơngai tơnơ̆ kòp dờng, ală cau lơh ka gơtìp uă kal ke bơta lòng tài bơh tam gơl nhơm trồ tiah mờ mpồl ling sền gàr tiah nhàr lơgar.

Kung tàm poh lài, Đoàn Ơruh pơnu Kộng sản Hồ Chí Minh Dà lơgar pơgồp bal mờ Tỉñ đoàn càr Kon Tum bơyai lơh broă lơh “Nam pa tiah nhàr lơgar- Sa tềp bồt bơlào dà lềng” di dơ̆ sa tềp Giáp Thìn 2024 tàm 2 kơnhoàl tiah nhàr lơgar Ia H’Drai mờ Sa Thầy.

Tàm kơnhoàl tiah nhàr lơgar Ia H’ Drai, càr Kon Tum, Ƀan Ƀí thư Đoàn Ơruh pơnu Kộng sản Hồ Chí Minh Dà lơgar neh jàu pà broă lơh drơng broă lơh sa kờp priă 2 tơmàn đong dong kờl priă càn ờ sa priă cồng uă nàng đoàn viên, ơruh pơnu tàm tiah do in bơtàu tơnguh lơh sa; pà 20 bơnah phan pà ai cau lơh phan Kông ty TNHH MTV Kao Su Chư Mo Ray mờ Kông ty Kổ phần Kao su Sa Thầy in. Bi Ngô Văn Cương, Ƀí thư Đoàn Dà lơgar, Củ ñiệm Ủy ƀan Sền sơwì Đoàn Dà lơgar, pà gĭt:“Bơh ală broă lơh do nàng kờñ dong ai cau lơh broă, ơruh pơnu, cau lơh phan, cau geh rài kis kal ke in geh tŭ tơngai niam nàng rê tàm ƀòn tờm sa tềp geh ram mhŭ rlau, hìu bơnhă chờ hờp rlau tai. Tơnơ̆ dùl tơngai sa tềp den rơ̆p geh ală bơta pràn niam ngan nàng dong cau lơh broă kung bè là ơruh pơnu, cau lơh phan mờ ơruh pơnu geh rài kis kal ke lơh broă niam ngan rlau tai tŭ mờ wă rò dùl tơngai sa tềp ram mhŭ".

Tàm broă lơh “Nam pa tiah nhàr lơgar- Sa tềp bồt bơlào dà lềng” pơgồp bal mờ sền gròi sa tềp ai ơruh pơnu, cau lơh phan, cau lơh broă in geh bơyai lơh tàm xã Mô Rai, kơnhoàl Sa Thầy, Ƀan Ƀí thư Đoàn Ơruh pơnu Kộng sản Hồ Chí Minh Dà lơgar jàu pà 20 bơnah phan pà ai cau geh bơngă pin dờn tàm tiah làng bol jơi bơtiàn dồ ết nă cau in; pà 2 nơm măi tíñ, loa ntrờn làm bă tiah ai Đoàn xã Mô Rai in. Di dơ̆ sa tềp Dà lơgar bơh jơi bơtiàn dê, Ƀan Ƀí thư Đoàn Ơruh pơnu Kộng sản Hồ Chí Minh Dà lơgar bal mờ Tỉñ đoàn càr Kon Tum kung neh tus còp, gờm chờ sa tềp, pơndờm pơnđiang nùs nhơm, pà ală phan pà geh kwơ ai kwang bàng, cau ling Kwang àng xã Ia Dom mờ Pôs đồng ling sền gàr tiah nhàr lơgar Ia Dom, kơnhoàl Ia H’ Drai in.

Đơs tàm broă lơh, Ƀan Ƀí thư Đoàn Dà lơgar Ngô Văn Cương pà gĭt, broă lơh “Nam pa tiah nhàr lơgar- sa tềp bồt bơlào dà lềng” là broă lơh pah nam geh Ƀan Ƀí thư Đoàn Dà lơgar bơyai lơh tàm tơngai rềp mờ ngai Sa tềp Dà lơgar. Broă lơh nàng kờñ mblàng yal, bơto bơtê, tơnguh uă bơta gĭt wă ai đoàn viên, ơruh pơnu, kơnòm pa tàu mờ kơnòm dềt in bè bơta kwơ màng bơh tiah nhàr lơgar tàm broă bơtàu tơnguh lơh sa, mpồl bơtiàn, sền gàr lơngăp lơngai tiah nhàr lơgar bơh Dà lơgar dê; lơh jat niam nùs nhơm tàm dong kờl bal, sền gròi, dong kờl đoàn viên, ơruh pơnu, kơnòm pa tàu mờ kơnòm dềt, làng bol geh rài kis kal ke di dơ̆ sa tềp Dà lơgar. Bi Ngô Văn Cương kung sồr Lơh kơnòl broă sùm Tỉñ đoàn càr Kon Tum sồr ală kấp ƀộ đoàn tàm càr pơn jat tai mblàng yal bè broă lơh do nàng lơh gơrề uă ală broă lơh geh kwơ tàm ală ngai lồi nam mờ rcang wă rò sa tềp nam pa.