Tàm dơ̆ lơh broă mờ Ƀan Ƀí thư Đoàn ơruh pơnu Kộng sản Hồ Chí Minh Dà lơgar, Củ tịc Quốk hội ồng Vương Đình Huệ đơs niam broă Đoàn ơruh pơnu Dà lơgar rơwah tơngu me lơh broă nam 2023 mờ tơngu me Nhai Ơruh pơnu pơgồp bal mờ “tam gơl sồ”. Do là kơnòl kwơ màng, jal mhar, di pal mờ broă tơnguh bơtàu bal bơh rài pa dê, ai dà lơgar he tơrgùm bal jrô ơnàng tàm broă tơnguh bơtàu bal bơh dunia dê.

Bè broă Đoàn bal mờ broă ơruh pơnu, kơnòm pa tào mờ kơnòm dềt tàm tơngai tus, Củ tịc Quốk hội sồr, Đoàn ơruh pơnu Kộng sản Hồ Chí Minh Dà lơgar pal pơn jăt tai kơlôi sơnơng, lơh jăt nền nòn rơlao tai broă tơnguh bơtàu, jơnau đơng lam bơh Tổng Ƀí thư ồng Nguyễn Phú Trọng dê tàm Pơrjum dờng Đoàn gùt lơgar dơ̆ XII; ngan ngồn jơh tàm tơl kơnòl broă mùl màl. Củ tịc Quốk hội ồng Vương Đình Huệ sồr: “Đoàn ơruh pơnu Kộng sản Hồ Chí Minh pal git nền nòn rơlao tai bơngă, gơnoar mờ broă lơh bơh să tờm dê, tơnguh uă nùs nhơm git wă, kơnòl, lơh ngan sùm, bơsram sră, bơsram tàp nàng tơnguh uă bơta ngăc ngar, nùs nhơm niam kăc màng, lam lơh geh nùs nhơm kơ̆p kờñ tàm ơruh pơnu nàng lơh geh rài kah yau, lam lài tàm broă bơ̆t bơtàu mờ sền gàr Dà lơgar. Tơnguh broă tơbo bơtê rơnàng kơnòm să in bè bơta niam kăc màng, nùs nhơm niam, rài kis chài rơgơi, tơnguh uă nùs nhơm kờñ gơboh mờ dà lơgar, pơnyờ să jơi bơtiàn, tàm hơ̆ uă ngan là ròng geh nùs nhơm kơ̆p kờñ, bơ̆t bơtàu dà lơgar pas gơs, gơboh gơbài mờ git loh să tờm, kơnòl bơh să tờm dê tàm broă bơ̆t bơtàu mờ sền gàr Dà lơgar”.

Bal mờ broă tơnguh bơtàu bơh broă lơh sa mờ măi mŏk 4.0, broă lơh sa, cíñ trị, mpồl bơtiàn, ơruh pơnu gam tam gơl mhar ngan. Củ tịc Quốk hội ồng Vương Đình Huệ sồr Đoàn Ơruh pơnu pal sùm bơceh pa, tam gơl pa sùm tơngu me, gùng dà broă lơh nàng bơsong geh jơnau kờñ, jơnau kơ̆p gơn bơh ơruh pơnu dê, ai ơruh pơnu là tơngu me tờm bơceh pa ală broă lơh, bơyai lơh ală broă sùm tài bơta kwơ di pal bơh ơruh pơnu dê. Mpồl Đoàn mờ ơruh pơnu pal là ală cau dan lam lài tàm broă lơh jăt gùng dà lơh pràn broă tam gơl sồ dà lơgar; tơnguh bơtàu lơh sa sồ tàm bơta tờm bơh khoa họk mờ kông nghệ, tam gơl pa, bơceh pa.

Kung tàm poh do, Đoàn ơruh pơnu Kộng sản Hồ Chí Minh Dà lơgar bal mờ Tổng Kông ty Bưu điện Việt Nam (Vietnam post) bơyai lơh kĭ jơnau hơ ring bal lơh broă tơngai bơh nam 2023 tus 2026 mờ ală tơngu me tơrgùm tàm broă dong kờl tam gơl sồ ai đoàn viên, ơruh pơnu in. Đơs tàm dơ̆ kĭ hơ bal, bi Bùi Quang Huy, Ƀí thư Dơ̆ dùl Đoàn ơruh pơnu Dà lơgar pà git, Đoàn ơruh pơnu Dà lơgar ai mpồl ơruh pơnu pal là mpồl cau tờm tàm broă tam gơl sồ. Den tàng, broă kĭ hơ jơnau ring bal, lơh broă bal do geh pơgồp bal tàm broă lơh pràn broă dong kờl tam gơl sồ ai đoàn viên, ơruh pơnu in: “He kĭ hơ ring bal ngai do là kĭ hơ ring bal jơh tàm 3 kấp, kấp Dà lơgar, kấp càr, kấp kơnhoàl. Bơta do lơh ală tơngu me kĭ hơ bal đah bàr gah geh mhar mŭt tàm mùl màl tơnơ̆ mờ tŭ neh kĭ. Tơnơ̆ broă lơh do, añ kơ̆p kờñ bàr gah geh lơh mùl màl jơh ală tơngu me neh kĭ mờ gơtùi kờp geh cồng nha tơngu me broă lơh jăt tơngai, bơta do dong kờl he tơnguh uă cồng nha broă pơgồp bal bơh bàr đah dê”.

Jăt jơnau ring lơh broă bal, tơngai bơh nam 2023 tus 2026, bàr gah geh tơrgùm pơgồp bal lơh ală broă dong kờl tam gơl sồ ai đoàn viên ơruh pơnu in bal mờ rơcang lài ală bơta ngăc ngar kă bro tàm tơngu me sồ, tàm hơ̆ uă ngan là ơruh pơnu kis tàm ƀòn lơgar. Ồng Nguyễn Hải Thanh, Củ tịc Mpồl duh broă tàm Tổng Kông ty Bưu điện Việt Nam pà git: “Ƀưu điện Việt Nam pơn jăt tai bal mờ Đoàn ơruh pơnu Kộng sản Hồ Chí Minh tàm ală broă lơh rài kis lơh broă sa mpồl bơtiàn, broă lơh mpồl bơtiàn bè dong kờl ờ tă priă, tơmù tă priă ală phan dong kờl, dong kờl priă ai ală bơta phan mŭt lơh broă bơh ơruh pơnu ƀòn lơgar in; pơgồp bal bơyai lơh ală broă, broă lơh ơruh pơnu geh khà dà lơgar, tơn jơh jơgloh tơmù rơƀah, rài kis lơh broă sa mpồl bơtiàn kơl jăp... pơgồp bal tàm broă bơ̆t bơtàu broă lơh jăt jơnau kờñ dà lơgar bè bơ̆t bơtàu ƀòn lơgar pa, bơ̆t bơtàu bơta gơguh jăk ƀòn drà”.

Tàm broă lơh jăt jơnau ring bal, Vietnam Post pơgồp bal mờ Đoàn ơruh pơnu Dà lơgar bơto ai mpồl ơruh pơnu tàm gùt lơgar in tơnguh uă jơnau git wă bè tam gơl sồ, mờ rơcang ală bơta ngăc ngar tờm tàm broă kă bro tàm ală tơngu me sồ bè: ngui ală phan marketing pa, jơnau git tàm dơ̆ livestream tăc phan, bơ̆t bơtàu bơta niam rùp phan di mờ jơnau kờñ marketing, atbồ mờ sền gàr cau blơi... Vietnam Post geh dong kờl đoàn viên ơruh pơnu tàm gùt lơgar pờ anih tăc phan tàm pang Kă bro điện tử Postmart.vn.