VOV4.K’ho- Broă lơh “Dong kờl kơnrồ” bơh Mpồl Cữ thập đỏ ƀòn dờng Buôn Ma Thuột, càr Dăk Lăk dê lam lơh tàm ală nam do neh cèng wơl cồng nha geh kwơ ngan tŭ pơgồp bơnah dong uă hìu bơnhă brồ guh klàs bơh rƀah.

Nam 2017, bi H’Râu H’Đơk ơm tàm ƀòn Ky, sơnah ƀòn Thành Nhất, ƀòn dờng Buôn Ma Thuột, càr Dăk Lăk dê geh Mpồl Cữ thập đỏ dong kờl dùl nơm kơnrồ me. Tus tŭ do, kơnrồ me neh deh geh 2 nơm kòn. Pa do, bi H’Râu tăc kơnrồ dam geh rlau 15 tơlak đong, ai priă nàng lơh wàng ròng sur. Ai kơnrồ dra den bi jàu wơl ai hìu bơnhă kal ke ndai in ròng siam. Bi H’Râu yal: Lơh sa ngai sơlơ kơ̆ kơl jăp, nam lài, hìu bơnhă añ dan lik bơh hìu bơnhă rƀah. Bi H’Râu H’Đơk chờ hờp yal: Ưn ngài Mpồl Cữ thập đỏ ƀòn dờng pà kơnrồ ròng, tŭ do hìu bơnhă kung neh di đau sơl. Hìu bơnhă geh pơn jăt tai ròng wơl, gơ den wơl kòn, bulah kal ke kung pal pơđơl pràn sơl.

Mpồl Cữ thập đỏ ƀòn dờng Buôn Ma Thuột lòt sền broă lơh kơnrồ me

Tơnơ̆ tŭ tơngai ròng siam sền gàr niam ngan, kơnrồ bơh hìu bơnhă bi H’Phiết Niê dê ơm tàm ƀòn K’Mrơng P’rong A, xã Ea Tu, ƀòn dờng Buôn Ma Thuột kung neh deh kòn sơl. Bi H’Phiết pà gĭt: Kơnrồ do bơh dà lơgar dê ai añ in, hìu añ kal ke ngan den tàng cau ai añ in kơnrồ rê ròng, hìu añ là hìu rƀah, hìu ơm kung ờ geh, tŭ do geh dùl nơm kơnrồ, tŭ kơnrồ deh añ chờ hờp ngan, dà lơgar ai kòn den mè ròng, mè siam.

Mò Phạm Khánh Quyên, Củ tịc Mpồl Cữ thập đỏ ƀòn dờng Buôn Ma Thuột, càr Dăk Lăk pà gĭt: tàm ală nam do, mpồl neh jàu 50 nơm kơnrồ me dong ală hìu bơnhă kal ke, mìng là cau jơi bơtiàn kòn cau dùl êt nă cau lơm, geh gùng dà bơtàu tơnguh lơh sa. Broă lơh geh rề ơnàng lơh uă jăt broă lơh, tàm ală tŭ kơnrồ deh kòn, hìu dờp kơnrồ geh jàu dùl nơm kơnrồ dra ai hìu bơnhă kal ke ndai in. Nàng mpồl kơnrồ ròng geh cồng nha, Mpồl Cữ thập đỏ ƀòn dờng neh pơgồp bal mờ gah lơh sơnơm phan ròng bơyai lơh bơto pơlam bơta chài ròng siam kơnrồ ai làng bol in.

Uă hìu rƀah neh sơrlèt gan kal ke kơnòm bơh ròng kơnrồ me

Mò Phạm Khánh Quyên, đơs: Broă lơh do neh dong kờl uă ngan cau. Uă ngan là ală hìu bơnhă geh dong kờl geh ală hìu neh brồ guh gơ gơs là hìu bơnhă mờr jơh rƀah, ai bàr pe hìu bơnhă mờr jơh rƀah neh klàs bơh rƀah. Ală hìu hơ̆ tŭ do bơtàu tơnguh lơh sa niam ngan mờ mờr ndrờm bè là tơl sa tơl ngui, ờ gam kơnờm uă ir tai tàm bơta dong kờl bơh Dà lơgar dê. Cồng nha bơh broă lơh “dong kờl kơnrồ” do kung gam pơn jăt tai geh lơh sùm sơl mờ ală kâp mpồl kung gam jăt sền. Pah nhai, Mpồl Cữ thập đỏ ƀòn dờng kung neh ai kwang bàng tus nàng jăt sền jàu ai ală hìu bơnhă rƀah gam wơl in.

Cau cih Tuấn Anh- Cau mblàng Lơ Mu K’Yến