Đơs tàm dơ̆ lơh broă, Duh broă sùm Ƀan Ƀí thư mò Trương Thị Mai đơs loh, tŭ do tam lơh tàm dunia pơn jăt tai gơguh, bơta lơngăp lơngai ờ bè ờs, tam gơl trồ tiah geh uă bơta kal ke… tàm bơta pa Mpồl Cau ling yau pal pơn jăt tai dờp bồ, bơyai lơh broă bơh să tờm dê nàng gàr niam jơnau sồr bơh Đảng.

Mpồl cau ling yau pal lơh tờm cíñ trị nàng pơgồp bal tàm broă mblàng yal, lam lơh jăt gùng dà broă lơh, nùs nhơm dờng, kwơ màng bơh Đảng mờ Dà lơgar dê. Mò Trương Thị Mai sồr, pal pơn jăt tai lơh pràn broă lơh jăt Nghị quyết Pơrjum Dờng dơ̆ VII bơh Mpồl dê, 2 broă lơh pràn geh Mpồl rơwah. Pơn jăt tai rơcang lài git ală bơta, bồ tơngoh rơcang lài bơh Cau ling yau tus bal tàm broă lơh Đảng dê. Mờ pà git, ală jơnau đơs tàm dơ̆ lơh broă ngai do geh pơn jăt tai geh sền mờ bơtơl tàm Jơnau yal Nghị quyết sồ 09 dê nàng yal Ƀộ Cíñ trị, Ƀan Ƀí thư in tàm tơngai tus.