Tus tŭ do, git nđờ jơt nă cau pơgru tàm hìu bơsram kâp 3 Pleime, xã Ia Ga, kơnhoàl Chư Prông, càr Gia Lai kung ờ hềt geh tơm priă dong kờl rlau 800 tơlak đông, là bơta dong kờl lời ai cau pơgru lơh broă tàm tiah uă kal ke in. Ồng Nguyễn Thế Hùng, kwang atbồ hìu bơsram kâp 3 Pleime, xã Ia Ga, kơnhoàl Chư Prông pà git, 27 nă kwang bàng, cau pơgru bơh hìu bơsram dê gơtìp dồs priă dong kờl tàm 6 nhai, bơh nhai 7 tus nhai 12 nam 2021, mờ khà priă kờp jơh là 837 tơlak đông.

Hìu bơsram kâp 3 Pleime, xã Ia Ga, kơnhoàl Chư Prông, càr Gia Lai (rùp: Nguyễn Thảo)

Bơh bồ nam tus tŭ do, hìu bơsram neh uă dơ̆ pơyua sră tus Sở Giáo zụk mờ Đào tạo càr Gia Lai mờ Liên đoàn Lao động càr Gia Lai sền sơ wì, mơya ờ hềt geh bơsong. Geh git, jơnau bơh broă lơyài tơm priă dong kờl ai cau pơgru hìu bơsram kâp 3 Pleime in là tài bơh Sở lơyài git Kơrnuat bơh Ủy ƀan Zân tộk dê bè ring bal mat ală thôn uă kal ke tiah jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2025. Bơta do lơh gơbàn bơta ờ thàn tam gơl broă dong kờl tàm 6 nhai lồi nam 2021 ai kwang bàng, cau pơgru bơh hìu bơsram kâp 3 Pleime dê in.