Rơlao nggùl nhai do, Festival bơkào Dà Làc dơ̆ 9 nam 2022 neh mŭt lơh mờ ờ uă broă lơh geh bơyai lơh tàm ƀòn dờng Bảo Lộc, Dà Làc mờ ală kơnhoàl rềp bal, tàm hơ̆ uă ngan tơrgùm tàm ƀòn dờng Dà Làc.

Nàng gàr di pal broă kờñ nhơl sền, ơm rơlô să ai cau năc in, ală hìu kă bro broă lơh drơng ala nhơl chờ tàm ƀòn dờng do neh bơcri priă lơh niam wơl, ai uă bơta phan nhơl chờ pa tàm broă lơh. Bal mờ broă tơnguh uă bơta niam broă lơh drơng ala, broă atbồ khà priă ală hìu kă bro, bơta lơngăp lơngai mpồl bơtiàn, ờ do ờ dă tàm gùng lòt kung geh ală anih lơh broă geh gơnoar tàm ƀòn dờng do lơh jăt. Càr Lâm Đồng tŭ do geh rơlao 3 rơbô hìu năc ơm, mờ rơlao 38 rơbô jơdŭ rơlô să, di pal mờ broă kờñ ơm ai di pơgăp 75 rơbô nă năc in tàm 1 ngai mang, tàm hơ̆, ƀòn dờng Dà Làc geh ai anih ơm dơ̆ lĕ bal rơlao 60 rơbô nă cau nă tàm 1 ngai, ờ hềt kờp ală anih ơm homestay, hìu ơm làng bol lơh. Den tàng, tàm dơ̆ geh bơyai lơh Festival bơkào Dà Làc dơ̆ 9 kung bè ală dơ̆ satềp tây, satềp he tus do, ƀòn dờng Dà Làc, càr Lâm Đồng ờ geh gơtìp bơta gal ir cau ờ tơl hìu ơm bè ală nam lài.