Đơs tàm dơ̆ sơn đờm Festival bơkào Dà Làc dơ̆ 9, Phó Củ tịc lơgar mò Võ Thị Ánh Xuân đơs là, tơnơ̆ mờr 130 nam crơng gơs mờ tơnguh bơtàu, Dà Làc-ƀòn dờng rơbô bơkào ờ mìng ai gŏ bơngă là tiah tờm cíñ trị, sră nggal, lơh sa, bơta chài rơgơi càr Lâm Đồng dê, mờ gam pơgồp bal niam tàm broă tơnguh bơtàu tiah Tây Nguyên mhar mờ kơl jăp. Festival bơkào Dà Làc dơ̆ 9 là lơh chờ niam bơnĕ, geh gơrềng mùl màl, pơn jờng bơta niam krơi is Dà Làc dê mờ geh lơh pràn broă tơnguh bơtàu gah lơh sa, kă bro mờ tăc bơkào mờ lơgar bơdìh, phan geh lơh bơh broă lơh sa suơn sre neh geh dờp khà măt kă bro “Dà Làc-Pơgồp bơta crih crài bơh ù tiah niam”. Phó Củ tịc lơgar mò Võ Thị Ánh Xuân đơs: “Nghị quyết sồ 23 bơh Ƀộ Cíñ trị neh ai ƀòn dờng Dà Làc là tiah dềt đah jum Tây Nguyên dê”. Bơta do pà gŏ Đảng mờ Dà lơgar pin dờn, dờp, đơs niam broă lơh ngan, lơh pràn mờ ală cồng nha kwơ màng mờ Đảng ƀộ, gơnoar atbồ, làng bol ală kòn cau càr Lâm Đồng, ƀòn dờng Dà Làc neh lơh geh tàm tơngai do, kung bè bơta geh, bơta pràn krơi is bơh Dà Làc dê. Añ pin dờn là, tàm tơngai tus, Dà Làc – Lâm Đồng pơn jăt tai ngui niam bơta pràn bơh mpồl tam klăc dờng gùt jơi bơtiàn kòn cau, lơh geh cồng nha ală bơta geh, bơta pràn bơh Dà Làc dê, pơgồp bal di pal ngan tàm broă tơnguh bơtàu bal bơh tiah Tây Nguyên bal mờ gùt lơgar dê”.

Mờ tơngu me “Dà Làc - Ƀòn dờng poan kàl bơkào”, Festival bơkào Dà Làc dơ̆ 9 nam 2022 là broă tơrbŏ bal, ai tơngŏ, pơn jờng cau tam bơkào mờ yal geh ală bơta kwơ bè bơkào, bè ală bơta phan geh lơh bơh broă lơh sa suơn sre geh pơnrơ mờ mìng geh tàm Dà Làc dê. Tàm hơ̆, gah bơkào tàm tiah do neh mùl màl cèng geh uă priă, pơgồp bal kwơ màng tàm broă tơnguh bơtàu lơh sa mpồl bơtiàn bal càr Lâm Đồng dê.

Drà tăc biăp bơkào Dà Làc neh mùl màl pờ mpồng lơh broă tềng gah tơnao dà Xuân Hương, tơrgùm uă bơta phan geh lơh bơh broă lơh sa suơn sre mìng geh is tàm Dà Làc – Lâm Đồng nàng ràng tăc, yal tus mờ cau sền blơi in. Drà ràng hòi jà geh mờr 50 mpồl lơh broă, cau dùl nă să mờ 90 hìu ràng tăc biăp, bơkào, ce, kơphe bal mờ ală phan geh lơh bơh broă lơh sa suơn sre geh khà OCOP dê, bơta pràn bơh Dà Làc – Lâm Đồng dê. Lŏ Trần Thị Thanh Tuyền đơs: “Añ mìng lơh bè biăp, kơnuh, plai chi ală bơta phan mìng geh tàm Dà Làc bè mrĕ dờng, ƀăp kải phồng, bùm trao, kần tây, uă bơta phan ndai tai. Mpồl bơyai lơh dong kờl niam ngan, mùl màl lip ai añ in khà măt, lơh lài añ in hìu ràng tăc phan, añ mìng ai phan tus ràng tăc uă ngan. Añ kơ̆p kờñ cèng phan geh bơh lơh Dà Làc dê tus yal nàng uă cau in git tus”.

Di tàm dơ̆ do, Sở Kông thương càr Lâm Đồng pơgồp bal mờ UɃÑZ ƀòn dờng Dà Làc bơyai lơh yal anih ràng tơlik, yal mờ tăc phan geh lơh geh cih khà măt kă bro “Dà Làc – Pơgồp bơta crih crài bơh ù tiah niam”. Tus tŭ do, ƀòn dờng Dà Làc neh ai sră dờp khà măt kă bro “Dà Làc – Pơgồp bơta crih crài bơh ù tiah niam” ai 768 mpồl lơh broă, cau dùl nă să in mờ 4 mpồl phan tàm hơ̆ geh: biăp, bơkào, kơphe mờ nhơl chờ tam phan. Khà măt kă bro neh ngai sơlơ ai geh bơta niam gơwèt mờ cau ngui sa tàm lơgar mờ lơgar bơdìh, rơhời tơlik là dùl khà măt kă bro pràn. Ồng Phan Ngọc Thạch, Củ tịc Hội đồng quản trị Hợp ták xã broă lơh Drơng ala suơn sre tơrgùm bal Sunfood Dà Làc pà git: “Bol añ rơwah jơh ală bơta phan ndrờm geh jòi tiah tam loh làng, phan geh Sở Kông thương dờp pa ai tơmŭt nàng tăc ai cau ngui sa in. Bơdìh hơ̆ tai, nàng yal khà măt kă bro ai ală mpồl lơh sa kă bro bol añ neh ai geh dùl QR Code, tơrbŏ bal mờ yal ală pang yal tơngit, mờ bol añ gam tơrbŏ bal bơh taxi, hìu ñô sa tus ală hìu năc ơm nàng yal rùp rài jơh hìu cờn sunfood do tus cau năc nhơl chờ in”.

Mpồl bơyai lơh Fetival bơkào Dà Làc dơ̆ 9 nam 2022 kung neh bơyai lơh Pơrjum cri bơyai khoa họk ngui bơta kwơ khà măt kă bro ƀòn dờng Festival Bơkào Dà Làc mờ bơta niam cau Dà Làc “niam nùs, hàng bơnĕ, gơboh mờ cau năc”. Pơrjum cri bơyai neh ai uă tơngai yal, cri bơyai mờ pơgồp jơnau đơs gùt dar ală broă bè bơta kwơ khà măt kă bro ƀòn dờng Festival bơkào Dà Làc. Ồng Tôn Thiện San, Củ tịc UɃÑZ ƀòn dờng Dà Làc đơs, bơh broă lơh Festival bơkào Dà Làc, broă tam bơkào neh geh pơn jờng mờ ai tơngŏ khà măt kă bro bơkào Dà Làc là bơta pràn pal geh bơcri priă tơnguh bơtàu gah tam bơkào dê. “Tềng đăp mờ ală gùng geh tus bal bơh khoa họk ală gah lơh broă, ală sră nggal, cơng tàng khoa họk geh cri bơyai, mblàng, lơh loh gơnoar, bơta kwơ bơh khà măt kă bro ƀòn dờng Festival Bơkào Dà Làc mờ bơta niam cau Dà Làc... Bol añ pin là, tàm tơngai tus ƀòn dờng Dà Làc geh pơn jăt tai lơh geh cồng nha bơta geh, bơta pràn ƀòn dờng dê tơnguh bơtàu mhar, tơl ală bơta mờ kơl jăp, pơgồp bal tàm bơta di pal mờ broă tơnguh bơtàu bal bơh tiah Tây Nguyên bal mờ gùt lơgar dê”.

Festival bơkào Dà Làc dơ̆ 9 nam 2022 geh lơh tus ngai 31 nhai 12, mờ geh uă tơngu me broă bơyai lơh, broă lơh niam bơnĕ ai cau năc bal mờ làng bol kis tàm ƀòn dờng in tus nhơl sền. Tàm hơ̆, ală tiah ơn bơkào ris geh ai tai ơn gùt dar tiah tờm geh pơn jăt tai ơn tus jơh satềp.