VOV4.K’ho - Mìng tàm 1 poh bơh ngai 14 tus ngai 21 nhai 2, gùt ƀòn dờng neh gŏ geh rơlao 40 nă cau gơtờp kòp là cau pơgru mờ rơlao 430 nă cau là kơnòm bơsram.

Tềng đăp mờ bơta kal ke bơh kòp gơtờp, Phòng Giáo dục mờ Đào tạo ƀòn dờng Buôn Ma Thuột neh dan mờ UɃÑZ ƀòn dờng ai ơm ing lòt bơsram gơwèt mờ kơnòm bơsram jơh ală mpồl ơdŭ, ờ kờp ơdŭ 9 mờ ơdŭ 12. Jăt Phòng Giáo dục mờ Đào tạo ƀòn dờng Buôn Ma Thuột đơs, kòp kovid-19 tàm càr Dăk Lăk pơn jăt tai gơtìp kal ke mờ git nđờ rơbô nă cau gơtờp tàm 1 ngai. Tàm ală hìu bơsram, bŭ lah broă gơtìp ală cau kòp neh geh rơcang lài, mơya khà cau F0 gơguh pràn neh lơh ờ niam uă ngan tus mờ nùs nhơm cau pơgru, kơnòm bơsram, cau mè bèp kơnòm bơsram. Rơcang sơndră mờ kòp kovid-19, bơto bơsram geh cồng nha, mờ gàr niam nùs nhơm ai kơnòm bơsram, cau mè bèp kơnòm bơsram, cau pơgru in là jơnau kờñ lài ngan bơh ală hìu bơsram tŭ do dê.

Cau mblàng Ndong Brawl