VOV4.K’ho- Bơh tŭ kòp Kovid- 19 lơh bơtờp, kwang bàng mờ cau ling sền gàr tiah nhàr lơgar càr Dăk Lăk dê sùm lơh ngan sơrlèt gan ală kal ke, lời wơl dùl đah bơta kơlôi rơcăng is nàng lơh jăt niam “kơnòl broă dơ̆ lĕ bal”: Sền gàr gơnoar tờm ù tiah lơngăp lơngai tiah nhàr lơgar Dà lơgar dê mơkung rơcăng sơndră kòp bơtờp. Bơta do sơlơ lơh niam rlau tai rùp să cau ling sền gàr tiah nhàr lơgar dê tàm tiah nhàr lơgar càr Dăk Lăk.

                  Mpồl ling sền gàr tiah nhàr dà lơgar càr Dăk Lăk lòt sền, sền gàr tiah nhàr dà lơgar

Tàm bơta tơngai duh rơ ồl bè ồs bơh nhai 3 Tây Nguyên dê, tàm anih ơm gak thôn Nhạp, xã Ia Lốp, kơnhòal Ea Súp, càr Dăk Lăk, kwang bàng, cau ling pôs ling sền gàr tiah nhàr dà lơgar Ea H’leo kung gam jơh nùs lòt sền, sền gàr lơngap lơngai tiah nhàr dà lơgar, gròi sền rơcang sơndră kòp Kovid-19. Trung tá Nguyễn Thanh Tú, Phó kwang atbồ mpồl triñ sát, pôs ling sền gàr tiah nhàr dà lơgar Ea H’leo ơm gak tàm anih gak thôn Nhạp yal, geh tŭ tơngai kòp bơ tờp gơbàn uă, kòn klau gam là cau bơsram dờng tàm ƀòn dờng Hồ Chí Minh bơ tờp kòp Kovid-19 ờ geh cau tờm ơm bal. Pơ ùr tàm hìu sùm gơbàn kòp jê, mơya bi kung sùm bal mờ cau ling ba ngai mang ơm tàm tiah nhàr dà lơgar, uă nhai tàm pơn jat sùm ờ geh rê tàm hìu nàng kờñ lơh gơs kơ nòl broă geh jàu: “Kung kơlôi rơcang, rơ ngòt ngan, tài bơh oh kòn bè hơ̆ mờ ờ geh cau tờm ơm bal. Broă ơm yah ngài sau dê bè lơi, piam tàm hìu sơ nơm ing bè lơi, broă sơm kòp bè lơi, broă lam lơh bè lơi den he kung ờ git, he ờ ơm tơntềng hơ̆ den tàng kơlôi rơcang ngan. Mơya kung pal dờp jơh, kơ nòl he dê là pal lơh lài ngan, gam pal pơn jờng pơ ùr, oh kòn lơh bè lơi pơn đơl sơrlèt gan tŭ tơngai kal ke tài bơh hơ̆ là bơta kal ke bal”.

Mpồl ling sền gàr tiah nhàr dà lơgar càr Dăk Lăk lơh ngan sền gàr kơ̆ gơnoar tờm lơngap lơnga tiah nhàr dà lơgar

Hìu ơm ngài pôs đồng rlau 40 kơi sồ, mơya tài kơ nòl broă mờ Trung úy Hà Văn Tân, kwang bàng mpồl hòi jà làng bol pôs ling sền gàr tiah nhàr dà lơgar Ea Hleo geh tŭ mờr nggùl nam ờ geh rê còp hìu sơl. Trung úy Tân yal, tŭ do pơ ùr gam là F0, kòn dềt 17 nhai mơya pal pơyua hìu mò nàng ròng. Bulah kah ngan pơ ùr mờ kòn mơya bi kung gam ơm wơl pôs ling nàng lơh kơ nòl broă: “Đơs ngan là pơ ùr kung git den tàng tam pà mờ broă lơh añ dê. Añ kung kah pơ ùr, kah kòn sơl bulah ơm ờ ngài mơya geh tŭ bơ tờp kòp bè lài , tus 3 nhai ờ geh rê còp hìu. Gơ wèt mờ să tờm añ dê bơh tŭ mut tàm hìu bơsram đại họk den neh đal git nùs nhơm ai ling lơh broă den tàng pơn jờng is să tờm lơh ngan, pơn đơl pràn nàng lơh gơs niam tơl kơ nòl broă geh jàu”.

                           Trung úy Hà Văn Tân hòi điện thoại lùp còp pơ ùr mờ kòn tàm tŭ ơm rlô

Tàm tŭ mờ cau ling mpồl bal lam lơh kơ nòl broă tàm tiah nhàr dà lơgar, Trung úy Nông Văn Lợi, lơh broă tàm pôs ling sền gàr tiah nhàr dà lơgar Ia Rvê kơ no yal bèp bơ tờp kòp Kovid-19 chơt tàm càr Bình Dương tàm tơngai kòp bơ tờp gơlik geh kal ke ngan rlau jơh. Trung úy Lợi yal, klo yal bèp sang rài añ jê nùs ngan. Mơya tŭ hơ̆ kòp bơ tờp gơlik geh kal ke mờ să tờm gam lơh kơ nòl broă den tàng ờ gơtùi rê tơp ƀồc sơl: “Tŭ lơh kơ nòl broă gròi sền kòp Kovid-19, klo yal bèp sang rài tàm Bình Dương. Nùs tồr kơlôi rơcang ngan, kung gơ lơh dơrcul dùl êt sơl mơya añ geh oh mi, Mpồl đơng lam pôs ling, Gah đơng lam mpồl ling hòi điện thoại pơn dờm pơnđiang. Bal mờ hơ̆, añ lơh broă kung neh jŏ tàm mpồl ling den tàng nùs tồr kơ̆ kơljap, kung đal git broă neh gơlik geh bè hơ̆ den rê kung gơtùi dong hìu bơnhă, ai dilah ờ gơtùi rê den kung hòi điện thoại yal hìu bơnhă in git”.

2 nam do, lam lơh kơnòl broă dơ̆ lĕ bal, ală pôs ling sền gàr tiah nhàr dà lơgar tàm càr Dăk Lăk neh bơyai lơh rlau 5 rbô mpồl bal mờ mờr 33 rbô dơ̆ kwang bàng, cau ling tus bal lòt sền, gròi sền tiah nhàr dà lơgar. Mờ kung gàr sùm 9 anih gak dùl bă tiah, gròi sền rơcang sơndră kòp Kovid-19. Bơh broă lòt sền, gròi sền, mpồl ling sền gàr tiah nhàr dà lơgar neh git gŏ, kup bàn mờ lơh glài 18 broă lơh tìs bal mờ 57 nă cau lơh tìs tàm broă sền gàr lơngap lơngai tiah nhàr dà lơgar.

Jat Trung tá Nguyễn Văn An, atbồ pôs ling sền gàr tiah nhàr dà lơgar  Ia Rvê yal, lam lơh kơ nòl broă bơh gah đơng lam mpồl ling dê, pôs ling neh gròi sền, kơryan ală broă lơh mut tàm lơgar tìs mờ adat boh lam, mờ kung ờ lời kòp Kovid-19 bơ tờp uă: “Kwang bàng, cau ling bơh pôs ling dê sùm đal git kơ nòl sền gàr gơ noar tờm lơngap lơngai tiah nhàr dà lơgar gơ jat bal mờ kơ nòl broă rơcang sơndră kòp Kovid-19 mờ đal git rơcang sơndră kòp bè tam dră mờ bol sò tơm. Bè hơ̆ den tàng bol hi sùm tàm pơn jờng, bơto bơtê is nàng tơnguh jơnau git wă, nùs nhơm, kơ nòl broă bơsong tơl bơta kal ke. Bulah rài kis phan bơna tàm ală anih ga tàm tiah nhàr dà lơgar kal ke, siơ̆u siar ngan, trồ tơngai duh, hìu  ơm ing lơm. Mơya gơ wèt mờ tơl nă kwang bàng, cau ling ndrờm git kơ nòl, lơh gơs niam tơl kơ nòl broă geh jàu”.

Càr Dăk Lăk geh 7 pôs ling sền gàr tiah nhàr dà lơgar geh jàu kơ nòl broă atbồ, sền gàr rlao 1 kơi sồ gùng nhàr lơgar rềp mờ càr Mondulkiri lơgar Campuchia. Tiah nhàr dà lơgartàm Dăk Lăk geh uă gùng dềt, gùng pờ pơhìn gơlik geh bơta dô pồn gan tiah nhàr dà lơgar. Mơya mờ bơta lơh ngan bơh kwang bàng, cau ling sền gàr tiah nhàr dà lơgar  dê bal mờ bơta at tê bal tă pơgồp bơta pràn bơh gơ noar atbồ mờ làng bol dê, gơ noar tờm tàm tiah nhàr dà lơgar càr Dăk Lăk sùm geh gàr kơ̆ kơljap.

Cau mblàng K’Duẩn