VOV4.K’ho- Ƀộ Nông nghiệp mờ Phát triển Nông thôn pa geh Jơnau sồr bè broă lam lơh sa tềp bơhiàn Ñâm Zần 2022. Jat hơ̆, Ƀộ Nông nghiệp mờ Phát triển Nông thôn sồr ală mpồl lơh broă gơ wèt Ƀộ mờ Sở Nông nghiệp mờ Phát triển Nông thôn ală càr, ƀòn dờng gơ wèt dà lơgar jơh nùs lam lơh ală broă lơh sền sơ wì, gròi sền drà kă bro tàm lơgar, ngan là bơta gàr kloh niam ờdo ờdă phan sa tàm ală drà bơh sơn rờp tac phan lơh gơs bơh suơn sre, anih tac bro phan sa, biap, plai chi drơng sa tềp, lơh glài ală broă lơh tìs nàng kờñ gàr bơta niam, ờdo ờdă kloh niam phan sa drơng jơnau kờñ ngui sa tàm dơ̆ sa tềp bơhiàn. Jat sền broă gơlik geh khà lơh gơlik, jơnau kờñ blơi kòi phe, phan sa pal geh tàm sa tềp nàng geh broă lơh tus bal di tŭ, ờ lời gơlik geh bơta ờ tơl phan, tơnguh khà priă; gàr lơh jat tơl jơnau kờñ ngui sa bơh làng bol dê lài mờ tŭ, tàm tŭ mờ tơnơ̆ tŭ sa tềp bơhiàn. Mờkung tơnguh broă lơh gơlik, pơndiang, tac mờ tac hờ lơgar ndai phan bơh suơn sre tàm tơngai rơcang sơndră kòp Kovid-19.

Cau mblàng K’Duẩn