Lòt sền gùt dar ală gơl gùng drà tàm ù tiah ƀòn dờng Buôn Ma Thuột, càr Dăk Lăk dê, bè: Phan Chu Trinh, Lê Thánh Tông, Y Jut… ală anih ràng tăc ƀañ trung thu bơh ală mat kă bro ƀañ tiơng pơn rơ geh bơka niam, ràng tăc niam mat ngan. Jat bi Bạch Thị Bích Phượng, cau tờm anih ràng tăc ƀañ tàm gùng Lê Thánh Tông yal, nam do bi tăc gờñ bơh nggùl nhai lài mơya năc tus blơi ờ gŏ uă sơl: “Nam do năc blơi gờñ, ờ gŏ tơrgùm blơi uă. Giă priă nam do kung gơguh dùl ết sơl, bàr pe bơta ƀañ bè ƀañ bơkah ngan den tơrmù priă dùl ết sơl, ai ƀañ tăc rah rài den gơguh bàr pe rơbô dùl nơm”.

Ai jat bi Bạch Thị Sách, cau geh rlau 10 nam mờng chài tăc ƀañ trung thu tàm ƀòn dờng Buôn Ma Thuột yal, den nàng pleh bơta gơtìp gam uă ir ƀañ ờ gơtùi tăc, bi rơ̆p tăc jài, jat sền jài bơta kờñ blơi bơh năc dê nàng blơi mờ khà ƀañ ai gơ in di pal: “Khà tăc bro den kung ờ hoan geh uă năc blơi sơl, kung rah rài lơm. Jơh tềng lơi den añ blơi tai tus tềng hơ̆, añ kung ờ khin blơi uă tài bơh drà kă bro pah nam krơi is. Añ tăc geh uă den blơi wơl uă sơl, tăc ờ hoan yòm den añ kung blơi dùl ết sơl, di ờ den tăc ờ gŏ yòm”.

Ƀañ Trung thu nam do geh ràng tăc lila uă ngan bè kơl dung ơn ƀañ mờ ală bơta ƀañ. Bơdìh mờ 2 bơta ƀañ tờm là ƀañ buh mờ ƀañ lơiang mờ bơta bơkah bơh yau dê den geh uă tai bơta bơkah pa, bè: bơta bơkah tàm bát bửu, ƀào ngư, jambon xá xíu, iar buh... Bơdìh hơ̆, gam geh ală ƀañ lời ai kơnòm dềt mờ cau sa wèr in. Bơdìh mờ broă sac rơwah ƀañ trung thu tàm anih ràng tăc ƀañ tơn den tŭ do cau ngui sa geh tai ală bơta sac rơwah ƀañ tàm ală gah kă bro điện tử halà tàm ală pang internet. Bi Trần Thị Ngân, ơm tàm sơnah ƀòn Tân An, ƀòn dờng Buôn Ma Thuột pà gĭt:“Tàm drà kă bro geh uă ngan bơta ƀañ, mơya jơnau kờñ añ dê den sac rơwah blơi là pal gàr geh bơta sàng goh phan ngui sa, rùp ƀañ niam, ƀañ geh mat kă bro”.

Nàng gàr niam gơnoar kwơ mờ bơta pràn kơl dang cau ngui sa in, mpồl lơh broă geh gơnoar gam sơlơ tơnguh lòt sền, gròi sền drà kă bro ƀañ trung thu nàng kơryan broă lơh gơlik, kă bro ƀañ ờ ngan, ƀañ blơi tìs mờ adat boh lam, ờ gĭt tiah tờm lơh gơlik ƀañ, ờ gàr geh bơta bơkah, ờ gàr geh bơta sàng goh phan ngui sa dê. Ồng Giao Thanh Tùng, Phó Kwang atbồ Kụk Atbồ drà kă bro càr Dăk Lăk pà gĭt: “Kụk Atbồ drà kă bro lam lơh ai ală mpồl atbồ drà kă bro in dơ̆ 1 là atbồ ală tiah, gĭt loh ală anih lơh sa kă bro bơh hơ̆ tơrgùm jơnau yal lòt sền bè tiah tờm lơh gơlik, phan bơna kă bro ƀañ trung thu, tiah lơh gơlik kung bè phan nhơl kơnòm dềt dê. Mờ kung mblàng yal, jờng rơ ală anih lơh gơlik phan, halà ală đại lý tăc rah rài ƀañ trung thu lơh niam, lơh jat di mờ jơnau sồr adat boh lam dê, ai ală anih kă bro lơi ờ hềt lơh jat di den lơh glài jat jơnau sồr bơh adat boh lam, dùl gah den yal loh làng tàm jơnau yal mpồl bơtiàn nàng lơh glài bal”.

Kwang atbồ Kụk Kơnòm dềt (Ƀộ Lao động- Thương ƀiñ mờ Xã hội) Đặng Hoa Nam pa geh sră nggal sồr Sở Lao động, Thương ƀiñ mờ Xã hội ală càr, ƀòn dờng đơng lam, pơgồp bal mờ ală anih lơh broă geh gơnoar mờ ală mpồl geh gơrềng gàr niam lơngăp lơngai ai kơnòm dềt in tàm dơ̆ sa tềp Trung thu nam 2023. Tàm hơ̆, sồr gàr niam lơngăp lơngai rcang sơndră ồs sa, bơr toh ai kơnòm dềt in tŭ ngui ală phan nhơl trung thu geh ală phan pơhìn ồs sa, bơr toh uă (đèng gŭ sơrmañ, đèng gŭ geh chu jrềng,  plai nôm ka gơ par ngui nhơm ƀuơn ồs sa, bơr toh...), ƀañ chu uă ir ồs lơh sàl, phăo bơkào tàm ală broă lơh tam ya đrang grài tàm hìu bơnhă mờ ală tiah mpồl bơtiàn. Gàr niam lơngap lơngai rcang sơndră ală bơta pơhìn lơh gơbàn  rềs àr, sồt să, lơh gơtìp khih gơwèt mờ ală phan nhơl. Gàr niam sàng goh phan ngui sa, rcang sơndră khih phan sa ai kơnòm dềt in gơwèt mờ ală bơta ƀañ kèo, plai chi, dà hùc mờ ală bơta phan ngui sa. Gàr niam lơngăp lơngai gơwèt mờ ală rơndeh rơndồ lòt rê tàm gùng mờ ală gơl gùng geh uă kơnòm dềt mờ làng ƀol lòt rê tàm tơngai sa tềp Trung thu.

Geh gơrềng tus kơnòl broă bơyai lơh sa tềp trung thu ai kơnòm dềt in, Thứ trưởng Ƀộ Lao động, Thương ƀiñ mờ Xã hội mò Nguyễn Thị Hà kung neh kĭ Sră nggal sồr Ủy ƀan Ñân zân ală càr, ƀòn dờng gơwèt Dà lơgar đơng lam ală Sở, ngàñ mờ Ủy ƀan Ñân zân ală kấp ai priă jền bơh kes priă dà lơgar; hòi jà tă pơgồp priă jền bơh mpồl cau, cau dùl nă să is dê nàng còp, pà phan trung thu ai kơnòm dềt in. Tàm hơ̆, sền gròi tus kơnòm dềt geh rài kis kal ke uă, kơnòm dềt gơwèt hìu bơnhă rƀah, hìu bơnhă ndrờm bè rƀah, kơnòm dềt tiah jơi bơtiàn dùl ết nă cau, tiah sar lơgar ngài, tiah nhàr lơgar, bồt bơlào, kơnòm dềt kòn đời mờ kơnòm dềt gơtìp aniai tài bơh trồ tiah lơh aniai, kòp bơtờp.