VOV4.K’ho- Ủy viên Ƀộ Cíñ trị, Phó Thủ tướng Thường trựk Cíñ phủ ồng Phạm Bình Minh neh kĭ Kông điện sồ 724 bơh Thủ tướng Cíñ phủ dê bè broă gàr niam bơta rơndap tap sèng, ờdo ờdă gùng lòt tàm dơ̆ ơm rlô Ngai Sơntờm Dà lơgar 2/09. Tàm hơ̆, Thủ tướng sồr, geh gùng dà broă lơh gàr niam bơta pràn, bơta niam mờ ơdo ờdă gơwèt mờ broă lơh pơndiang năc mờ phan bơna, ngan là drơng broă pơndiang năc tàm gùng ù gờl, gùng dà mờ gùng rơndeh par tàm dơ̆ ơm rlô Ngai Sơntờm Dà lơgar 2/09 mờ broă lơh lòt rê bơh kơnòm bơsram, cau bơsram dờng dê; sồr ală mpồl lơh broă kă bro pơndiang năc; ală mpồl lơh broă bơh sơn rờp gùng lòt dờng, lơh jat niam ală jơnau sồr bơh adat boh lam dê bè rơndap tap sèng, ờdo ờdă gùng lòt; bañ lời gơlik bơta tàm jeh hăt hal lơh gơbàn gơ kòl tàm ală mblàng ơn rơndeh, hìu ga, anih ơhò ơm, bơta tàm jeh năc, pơndiang uă ir khà cau jat jơnau sồr, jun năc tìs mờ jơnau sồr. Rcang bơt bơtàu gùng dà broă lơh pơlam gùng lòt ờdo ờdă, niam, ngan là tàm gơl gùng, tiah geh bơta pơhìn gơlik uă bơta rềs àr gùng lòt, gơ kòl gùng lòt, ală gơl gùng tờm lik mờ mŭt tàm Hà Nội mờ ƀòn dờng Hồ Chí Minh.

 Kảñ sát gùng lòt jơh gùt lơgar ai uă mpồl lơh broă tàm ngai 2/09

Nàng gàr niam ờdo ờdă gùng lòt tàm dơ̆ ơm rlô Ngai Sơntờm Dà lơgar 2/09, Ủy ƀan Ñân zân càr Dăk Lăk neh đơng lam ală mpồl bè: Thanh tra gùng lòt, kảñ sát gùng lòt, kảñ sát trật tự... sơlơ tơnguh broă lơh lòt sền, sền gròi, lơh glài ală broă lơh lơh tìs gùng lòt; lơh pràn broă mblàng yal tus ală rơnàng làng bol, ngan là ală hìu bơsram nàng làng bol in lơh jat niam Adat gùng lòt ù gờl. Mơkung, lam lơh pờ ală gùng che điện thoại tơn tàm Phòng Kảñ sát giao thông Kwang àng càr dê sồ điện thoại: 0262.3692888; Sở Giao thông Vận tải Dăk Lăk geh ală sồ: 0916.107447; 0983.436091 mờ mpồl Ờdo ờdă gùng lòt càr Dăk Lăk sồ: 0914.032356, nàng dờp mờ bơsong jơnau yal bè jơnau roh rơndap bơta tap sèng, ờdo ờdă gùng lòt, lơngap lơngai gùng lòt. Ồng Bùi Văn Ngọc – Chánh Văn Phòng Mpồl ờdo ờdă gùng lòt càr Dăk Lăk pà gĭt: bơh bồ nam tus tŭ do, bơta rềs àr gùng lòt tàm Dăk Lăk gơmù ndrờm tàm jơh bal 3 broă jàu, là khà dơ̆ rềs àr gùng lòt kơn jơ̆, khà cau chơ̆t mờ sồt să. Ngan là, tàm rlau 8 nhai do, tàm ù tiah càr Dăk Lăk gơlik geh 51 dơ̆ rềs àr gùng lòt kơn jơ̆, lơh chơ̆t 112 nă, sồt să 76 nă. Pơndrờm dùl tŭ bal mờ nam lài gơmù 9 dơ̆, 11 nă cau chơ̆t mờ 35 nă cau sồt să.

Jơnau yal bơh Kông ty Kổ phần Ƀlàng ơn rơndeh Hà Nội pà gĭt, nàng kờñ drơng broă lòt rê làng bol in tàm dơ̆ ơm rlô Ngai Sơntờm Dà lơgar 2/09, Kông ty geh ai tai 580 nơm rơndeh tàm ală ƀlàng ơn rơndeh. Jàu ală ƀlàng ơn rơndeh in geh broă rơndap lơh drơng broă, rcang tơl làm phan bơna bè vé, anih tăc vé, tăc vé ai ală gơl gùng lòt ngài in mờ đơng lam ală mpồl atbồ mờ đơng lam lơh jat niam broă gàr niam rơndap tap sèng, ờdo ờdă gùng lòt, rcang sơndră ồs sa, bơrtoh, kloh niam tiah ơn rơndeh. Mơkung pơgồp bal mờ anih tờm đơng la rơndeh buýt bơh Tổng kông ty vận tải Hà Nội dê nàng tơnguh khà rơndeh pơndiang mờ dơ̆ lòt rơndeh buýt nàng drơng broă di tŭ năc tus ƀlàng ơn rơndeh mŭt tàm dơlam ƀòn dờng dê. Jat Kông ty kổ phần Ƀlàng ơn rơndeh Hà Nội, khà năc lòt rê tàm dơ̆ ơm rlô Ngai Sơntờm Dà lơgar 2/09 gơguh uă, tàm bàr pe  tơngai geh bơta gơguh nisơna bè mpồl năc lòt mŭt tàm mho ngai 31/08 mờ ngai 1/09; mpồl năc rê geh tơrgùm uă ngan tàm ngai 4/09/2022.

Cau mblàng K’Hạnh