VOV4.K’ho-15 ngai do tàm ù tiah kơnhoàl Kon Plông, càr Kon Tum neh gơlik geh gĭt nđờ jơ̆t dơ̆ tơrluh ù mờ rơngô ù. Ngan là tàm mho ngai 23/08 gơlik geh dơ̆ rơngô ù geh bơta pràn 4,7, dờng ngan rlau jơh tàm pơgap 100 nam do. Tềng đap bơta gơlik geh kal ke ờ gơtùi gĭt lài bơh ală bơta trồ tiah lơh aniai do dê, broă lơh gàr niam ờdo ờdă tơnau dơng dà hìu măy pờ tơlik ồs đèng, bơtơ̆t rơbòng dà nàng kờñ rcang sơndră mờ tơrluh ù tàm Kon Tum gam geh gơnoar atbồ kung bè mpồl lơh broă atbồ sền gròi uă ngan.

Trạm đo was trồ tiah dà ia mờ jat sền phan kwơ tàm dà is crăp tàm  tơnau dơng dà Thượng Kon Tum dê

Ồng Lê Đức Tín, Phó Củ tịc Ủy ƀan Ñân zân kơnhoàl Kon Plong yal, gơnoar atbồ kơnhoàl neh sơlơ tơnguh broă lơh atbồ, jat sền uă ngan rlau jơh là gơwèt mờ 2 tơnau dơng dà hìu măy pờ tơlik ồs đèng dờng, tàm hơ̆ geh: Đăk Đrinh mờ bơta pràn dơng dà rlau 248 tơlak khối mờ tơnau dơng dà hìu măy pờ tơlik ồs đèng Thượng Kon Tum mờ bơta pràn dơng dà rlau 145 tơlak khối. Bal mờ 3 trạm sền gròi đo was bơta gơlik geh tơrluh ù neh geh crăp, Kông ty Thủy điện Thượng Kon Tum lơh sră pơgron mờ Viện Vật lý địa cầu pơn jat tai crăp tai 3 trạm sền gròi tai nàng yal tơngĭt lài di tŭ mờ drơng broă kơlôi sơnơng jrô làm uă bè tơrluh ù tàm tiah do dê.

Cau mblàng K’Hạnh