VOV4.K’ho- Rlau nggùl nhai do tàm ù tiah kơnhoàl Kon Plông, càr Kon Tum neh gơlik geh gĭt nđờ jơ̆t dơ̆ tơrluh ù mờ rơngô ù. Ngan là tàm mho ngai 23/08 gơlik geh dơ̆ tơrluh ù geh bơta pràn 4,7, dờng ngan rlau jơh tàm pơgap 100 nam do. Tềng đap bơta gơlik geh kal ke ờ gơtùi gĭt lài bơh bơta trồ tiah lơh aniai do dê, broă gàr niam ờdo ờdă tơnau dơng dà hìu măy pờ tơlik ồs đèng nàng kờñ sơndră wơl mờ dơ̆ tơrluh ù tàm Kon Tum gam geh gơnoar atbồ kung bè mpồl atbồ sền gròi uă ngan.

Ù tiah kơnhoàl Kon Plông, càr Kon Tum, tiah nggùl nhai do neh gơlik geh gĭt nđờ jơ̆t dơ̆ tơrluh ù mờ rơngô ù tŭ do geh 6 broă lơh hìu măy pờ tơlik ồs đèng mờ 125 broă lơh bơtơ̆t rbòng dà. Ồng Lê Đức Tín, Phó Củ tịc Ủy ƀan Ñân zân kơnhoàl Kon Plông pà gĭt, tềng đap bơta tơrluh ù, rơngô ù gơlik geh sùm, gơlik geh kal ke, ờ gơtùi gĭt lài, gơnoar atbồ kơnhoàl neh sơlơ tơnguh broă atbồ, jat sền uă ngan rlau jơh là gơwèt mờ 2 tơnau dơng dà hìu măy pờ tơlik ồs đèng dờng, tàm hơ̆ geh: Đăk Đrinh mờ bơta pràn dơng dà rlau 248 tơlak khối mờ tơnau dơng dà hìu măy pờ tơlik ồs đèng Thượng Kon Tum mờ bơta pràn dơng dà rlau 145 tơlak khối. Ồng Lê Đức Tín đơs: Kơnhoàl sùm jat sền, gròi sền broă lơh jat broă dơng dà tiah dơlam tơnau dà bơh ală cau tờm rơndap broă lơh hìu măy pờ tơlik ồs đèng dê. Bơh jat sền, gròi sền khi lơh jat jơnau sồr bơh Dà lơgar mờ bơh càr dê, ờ dơng dà uă rlau ir jat bơta pràn bơh tơnau dơng dà dê. Bàr tai là sồr khi pal lơh mhar broă crăp ală Trạm sền gròi. Lơh tai Trạm sền gròi den geh jơnau yal tơngĭt di pal rlau. Tŭ trồ tiah lơh aniai gơlik geh dê jat broă pơlam lơh broă geh bơta pơgồp bal niam đah cau tờm rơndăp broă lơh mờ gơnoar atbồ tiah do dê bal mờ Mpồl đơng lam rcang sơndră mìu càl rơbŭt dà tih dà cò kơnhoàl dê.

Lòt sền bơta ờdo ờdă tơnau dơng dà hìu măy pờ tơlik ồs đèng Thượng Kon Tum tơnơ̆ ală dơ̆ tơrluh ù

 Geh sền là dùl tàm ală bơta tờm digơlan lơh gơlik ală dơ̆ tơrluh ù lơh gơlik geh tàm tiah kơnhoàl Kon Plông, càr Kon Tum dê, broă atbồ, mut ngui tơnau dơng dà hìu măy pờ tơlik đèng Thượng Kon Tum tŭ do gam geh lơh jat niam. Bal mờ 3 Trạm sền gròi đo was dơ̆ rơngô ù neh geh crăp, Kông ty Hìu măy pờ tơlik ồs đèng Thượng Kon Tum lơh sră pơrgon mờ Viện Vật lý địa kầu pơn jat tai crăp 3 nơm Trạm tai nàng yal tơngĭt di tŭ mờ drơng broă kơlôi sơnơng jrô bè tơrluh ù tàm tiah do dê. Mpồl lơh broă do kung ơpah cau bơto pơlam gah kờp sền wơl kấp tơrluh ù di mờ ală khà dà krơi is mờ jat jơnau kờp sền broă lơh kong jai dơ̆ tơrluh ù kấp 7. Ồng Trần Công Đàm, Kwang atbồ Kông ty Hìu măy pờ tơlik ồs đèng Thượng Kon Tum gơ wèt Kông ty Kổ phần Hìu măy pờ tơlik ồs đèng Vĩnh Sơn- Sông Hinh đơs ngan, mpồl lơh broă lơh jat niam broă pơlam lơh broă pờ ngui ală tơnau dơng dà mờ kung neh lơh jat broă lơh sơndră wơl mờ dơ̆ tơrluh ù. Ồng Trần Công Đàm, đơs: Kông ty pờ ngui tơnau dơng dà tàm hơ̆ geh khà dà tàm tơnau dà kàl dà kŏ dà cò kung bè kàl prang soăt dà lơh jat niam broă  pơlam lơh pờ ngui ală tơnau dà dơng dà tàm dà dờng Sê San dê mờ broă pơlam lơh pờ ngui broă tơnau dơng dà Thượng Kon Tum bơh Ƀộ Kông thương kĭ ring bal. Lơh jat ală broă lơh sền gròi jat di mờ Nghị địñ sồ 114 mờ ală jơnau sồr kung bè jơnau sồr ndai bơh Dà lơgar dê gơwèt mờ tiah do. Kông ty neh lơh jat broă lơh sơndră wơl mờ dơ̆ tơrluh ù nàng tŭ mờ geh dơ̆ tơrluh ù gơlik geh den kwang bàng, cau lơh broă Kông ty dê geh rcang lài mờ di tŭ lơh jat ală broă lơh sơndră wơl mờ ờ duh pal kơ̆p jơnau sồr bơh kấp hơđang dê gơlam tus bơta lơh lơyài.

Cau cih Khoa Điềm- Cau mblàng K’Hạnh