VOV4.K’ho- Poh lài, tàm dơ̆ pơrjum Mpồl đơng lam đơng pơlam giă Cíñ phủ dê, Phó Thủ tướng ồng Lê Minh Khái neh đơs sùm: Ală ƀộ, gah sơnah lơh broă, ală tiah pal jăt tàm broă gơlik geh ngan ngồn, lam lơh jăt ală broă lơh gàr kơ̆ giă tàm bơta gơtùi nàng dong bơtàu tơnguh wơl mờ bơtàu tơnguh lơh sa, gàr niam rài kis làng bol in, drơng broă lơh rơcăng sơndră kòp Kovid-19; tàm hơ̆ đơs sùm ai tơl xăng zờu drơng jơnau kờñ lơh sa, kă bro mờ rài kis làng bol in.

Jăt cau lơh ƀăo bơh Anih Jơnau đơs Việt Nam dê tàm tiah đah tô mat tơngai mŭt dà lơgar dê yal, tơnơ̆ tơngai ơm rlô sa tềp bơhiàn dà lơgar dê, xăng zờu sùm gơguh giă gam lơh gơlik uă kal ke ai làng bol mờ mpồl lơh sa kă bro tàm tiah do in. Xăng zờu gơguh giă tàm khà uă ngan rlau jơh bơh lài tus tŭ do, neh lơh uă làng bol gơlơh kơlôi rơcăng ngan bè priă tă tŭ ngui. Bi Nguyễn Trọng Thủy ơm tàm sơnah ƀòn Yên Ninh, ƀòn dờng Yên Bái, càr Yên Bái pà gĭt: Tàm tơngai kal ke do mờ xăng zờu gơguh giă uă ngan bè hơ̆ den rài kis kung kal ke tai. Mìng is priă tuh xăng lòt rê bơh să tờm añ dê kung pal jơh tai bàr pe rhiang rbô dùl nhai, ờ hềt kờp phan bơna kă bro geh gơguh jăt bal.

Uă rơndeh tàm càr Yên Bái kung pà gĭt sơl, ờ hềt tŭ lơi gơtìp gơ ơm tàm rài kis kal ke bè tŭ do. Gơrềng bơh kòp dờng Kovid-19 lơh tŭ tơngai jŏ jòng pa do, mpồl năc lòt rơndeh gơmù uă ngan, ală rơndeh pal bơsir hoàc hươr. Tơnơ̆ dơ̆ sa tềp, tàm bơta bè ờs pa, ală mpồl lơh sa kă bro pơndiang năc pơndiang phan gơn kơnờm gơtùi ai wơl đau dùl bơnah lơi, mơya pal kong wơl mờ giă xăng, zờu gơguh uă ngan bơh lài tus tŭ do.

Cau lơh ƀăo bơh Anih Jơnau đơs Việt Nam dê tàm tiah Tây Nguyên kung yal sơl, tềng đăp bơta xăng, zờu gơguh giă tàm tŭ jơnau kờñ ngui xăng zờu nàng tuh dà chi tam in bơh làng bol dê gơguh uă nisơna tài bơh gam là tơngai tờm bơh kàl prang dê, mpồl lơh broă geh gơnoar gam sơlơ lơh tai broă lơh lòt sền, jăt sền drà kă bro xăng, zờu. Ồng Ngụy Đình Phúc, Kwang ătbồ Mpồl ătbồ drà kă bro sồ 2, Kụk ătbồ drà kă bro càr Kon Tum, pà gĭt: Bơh lòt sền, den Mpồl ătbồ drà kă bro bol añ dê kung mblàng yal ală hìu ràng tăc xăng zờu in gĭt geh ală gùng dà broă lơh tàm gah kă bro. Lơh jăt jơnau sồr bè tŭ jiơ pờ mpồng, tăc phan wil tơl. Dilah bè ơm ờ tăc pal geh jơnau yal mờ sră nggal ai anih lơh broă geh gơnoar in. Bơh lòt sền tàm tơngai rềp ndo den Mpồl ătbồ drà kă bro bol añ dê ờ hềt gŏ cau lơi lơh tìs bè kă bro xăng zờu. Xăng zờu tàm ù tiah 3 kơnhoàl wil tơl drơng ai làng bol in.

Ătbồ drà kă bro càr Kon Tum lòt sền dùl hìu ràng tăc xăng zờu

Anih lơh broă Xăng zờu Kon Tum, gơwèt Kông ty Trăk ñiệm hữu hạn Một thàñ viên Xăng zờu đah tô Tây Nguyên geh uă ngan phan tăc tàm drà mờ pơgăp 60%. Ồng Võ Duy Tuấn, Kwang ătbồ Anih lơh broă Xăng zờu Kon Tum yal, kờp bal pah nhai, anih lơh broă do tăc geh pơgăp 6 rbô 500 khối xăng, zờu. Mìng is tàm nhai 01 pa do, xăng zờu tăc tàm drà gơguh tus 8 rbô khối. Bơta do pà gŏ jơnau kờñ ngui xăng, zờu mŭt tàm kàl prang dờng. Ồng Võ Duy Tuấn, đơs: Anih lơh broă bol añ dê sùm ơn prăp pơgăp 80% bơta pràn prăp, ndrờm mờ 1 rbô 860 khối. Bol añ geh jơnau sồr ală hìu ràng tăc xăng zờu pal sơlơ ai tai cau lơh broă nàng drơng làng bol mờ mpồl lơh sa kă bro in. Pal lơh jăt di tŭ jiơ pờ mpồng drà tăc phan di mờ tŭ jiơ neh cih yal mờ Sở Kông thương. Jăt sền gam jơngkah tàm anih prăp sùm mờ cih mat blơi phan di tŭ.

Poh lài, tàm dơ̆ pơrjum Mpồl đơng lam đơng pơlam giă bơh Cíñ phủ dê, Phó Thủ tướng ồng Lê Minh Khái neh đơs sùm: Ală ƀộ, gah sơnah lơh broă dà lơgar mờ ală tiah pal jăt tàm bơta gơlik geh ngan ngồn, lam lơh ală broă lơh gàr niam giă tàm bơta gơtùi nàng dong kờl bơtàu tơnguh wơl mờ bơtàu tơnguh lơh sa, gàr niam rài kis làng bol in, drơng broă lơh rơcăng sơndră kòp Kovid-19; tàm hơ̆ đơs sùm gàr tơl xăng zờu drơng jơnau kờñ lơh sa, kă bro mờ rài kis làng bol in. Mblàng sền tai bè bơta phan xăng zờu, Phó Thủ tướng đơs là, do là bơta phan pal geh, kong gơrềng uă ngan bơh giă tăc bro tàm drà dunia dê. Bơh ngai 11/01 tus ngai 21/02 pa do, giă ală bơta phan lơh gơs xăng zờu tăc bro tàm drà neh gơguh bơh 15,45 tus 20,88%, mơya giă ală bơta xăng zờu tàm lơgar mìng gơguh bơh 9,59% tus 14,04%. Bơta do tơngŏ bol he neh đơng lam giă ngăc ngar, giă gơguh ơm tàm khà “gơtùi dờp đau”, lơyah rlau mờ ală lơgar ndai tàm kơnhoàl ù tiah do.

Jơh gùt anih bơyai lơh dơ̆ pơrjum Mpồl đơng lam đơng pơlam giă bơh Cíñ phủ dê

Bulah bè hơ̆, broă giă xăng zờu tàm lơgar lơyah rlau mờ giă xăng zờu bàr pe lơgar rềp bal digơlan gơlam tus jơnau tăc bro kơñau bơta phan do. Den tàng bè hơ̆, ală anih lơh broă geh gơnoar kung kờñ pal sơlơ lòt sền, gròi sền kơryan jơnau kă bro kơñau xăng zờu gan tiah nhàr lơgar. Phó Thủ tướng ồng Lê Minh Khái sồr: Ƀộ Kông thương pơn jăt tai lam lơh jăt broă lơh gàr tơl xăng zờu drơng jơnau kờñ lơh sa, kă bro mờ rài kis làng bol in...Ală anih lơh broă geh gơnoar sơlơ lòt sền, gròi sền, bơsong tơn ală broă lơh tìs jăt jơnau cih bơh kơrnoăt boh lam dê. Phó Thủ tướng ồng Lê Minh Khái, đơs: Añ sồr jăt jơnau cih bơh kơrnoăt boh lam giă dê den bol he pal ngui jơh ală broă lơh bơh dà lơgar dê gròi sền, jăt sền nàng đơng pơlam geh cồng nha. Pơnyơu bè bơta phan lơi kờñ gàr niam den bol he pal ngui ală phan ngui gàr niam bè ală oh mi gĭt đơng pơlam giă jăt adat do geh 4 tơngume, dùl là gàr niam giă, bàr là sền swì, pe là cribơyai ring bal giă mờ puan là sền swì ală jơnau lơh gơ gơs giă. Hơ̆ sồng yal tơngĭt loh làng jơnau bè giă mơya pal song dơ pă jăt tàm bơta pơgồp bal đah ală ƀộ, gah sơnah lơh broă dà lơgar bal mờ gơ̆p.

Cau mblàng Lơ Mu K’Yến