Neh gơ gơs ờs mờng, pah tŭ tus ngai lồi poh, mpồl atbồ is gùng nhàr lơgar jrong nhàr ƀòn Đrang Phôk, xã Krông Na, kơnhoàl Buôn Đôn lòt bal mờ kwang bàng, cau ling Pôs ling sền gàr tiah nhàr dà lơgar Srêpôk lòt gròi sền, sền sơ wì tiah gùng nhàr lơgar, jrong nhàr lơgar. Ồng Y Mosk H’ra, cau geh bơngă pin dờn ƀòn dê pà git, làng bol neh ơm kis jŏ rài tàm tiah tờm bơh Brê dà lơgar Yok Đôn dê, den tàng, bal mờ sền gàr gùng nhàr lơgar, jrong nhàr lơgar, kơnòl sền gàr brê tàm tiah nhàr dà lơgar kung geh sền gròi uă ngan. Cau kra ƀòn, ală cau geh bơngă pin dờn sùm tề lam cau kơnòm să ƀòn dê lòt bal mờ ală mpồl lơh broă nàng sền gàr tơl tờm chi, tơl bă ù tàm tiah nhàr dà lơgar: “Jơh gùt làng bol bol hi jơh nùs pơgồp bal mờ Pôs ling sền gàr tiah nhàr dà lơgar Srêpôk, mpồl lơh broă tàm ƀòn, bè brê den pơgồp bal mờ Kiểm lâm Brê dà lơgar Yok Đôn nàng atbồ, sền gàr brê mờ sền gàr jrong nhàr, tiah nhàr dà lơgar. Mblàng yal bơh cau dờng tus cau dềt là pal jơh nùs sền gàr jrong nhàr lơgar, hơ̆ sồng mblàng yal cau kơnòm să in là ờ gŏ di dô gan tiah nhàr dà lơgar tus lơgar ndai”.

Tàm xã tiah nhàr dà lơgar Ia Lốp, kơnhoàl Ea Súp, 12 thôn ndrờm geh crơng gơs nam 2006 jat gùng dà Rơndap broă lơh ntrờn làng bol bơtàu tơnguh lơh sa pa bơh Ƀiñ đoàn 16- Ƀộ Quôk phòng dê tŭ do là Đoàn Kiñ tế Quôk phòng 737, Quân khu V. Bi Hà Thị Phê, ơm tàm thôn Đừng, xã Ia Lốp pà git, tus ndo sơn đờm lơh broă lơh sa tŭ gam ơruh, lòt gan 17 nam ơm kis, geh bau geh kòn, bi kung bè git nđờ nă cau neh sền tiah do là ƀòn tờm dơ̆ 2 he dê. Làng bol tàm do ndrờm git loh kơnòl he dê gơ wèt mờ dà lơgar. Sền gàr gùng nhàr dà lơgar, jrong nhàr lơgar hơ̆ là sền gàr rài kis bơh tơl hìu bơnhă, bơh tơl thôn, ƀòn dê. Tơl nă làng bol neh sền he bè jrong kis tàm ù tiah nhàr dà lơgar: “Geh bơta mblàng yal bơh ală cau ling sền gàr tiah nhàr dà lơgar bè broă sền gàr tiah nhàr dà lơgar, să tờm añ bal mờ hìu bơnhă git loh bơta do geh gơtha kuơmàng ngan gơ wèt mờ làng bol bol hi. Añ kung geh tơngkah hìu bơnhă, oh mi, kòn sau he dê sùm pơgồp bal mờ ală ling sền gàr tiah nhàr dà lơgar, ling grăp ƀòn, kwang àng xã tus bal tàm broă sền gàr tiah nhàr dà lơgar”.

Càr Dăk Lăk geh rlau 71 kơi sồ gùng nhàr dà lơgar rềp mờ lơgar Campuchia. Lơh jat Jơnau sồr sồ 1 ngai 09/01/2015 bơh Thủ tướng Cíñ phủ dê “Bè lam lơh srơh jơh gùt làng bol tus bal sền gàr gơnoar tờm ù tiah, lơngăp lơngai tiah nhàr dà lơgar tàm bơta pa”, gơnoar atbồ ală xã tiah nhàr dà lơgar neh pơgồp bal jơh nùs mờ ală pôs ling sền gàr tiah nhàr dà lơgar, ală mpồl lơh kơnòl tàm tiah nhàr dà lơgar lơh niam broă lơh sền gàr lơngăp lơngai, ring lơngai, sền gàr gơnoar tờm ù tiah, lơngăp lơngai tiah nhàr dà lơgar. Uă broă lơh bè lơngăp lơngai, ring niam neh geh lơh mờ lam lơh niam bè: “Cau kơnòm să mờ adat boh lam”, “sap ntas klèng lơngăp lơngai”, “sap klèng rơcang gàr làng bol”. Tàm ù tiah 4 xã tiah nhàr dà lơgar gơ wèt 2 kơnhoàl Buôn Đôn mờ Ea Súp tŭ do geh rlau 2 rbô 400 mpồl bal, hìu bơnhă, cau dùl nă să dan is tus bal tàm mpồl atbồ is mờr 60 kơi sồ gùng nhàr dà lơgar mờ 4 jrong nhàr lơgar. Trung tá Nguyễn Thanh Tùng, Atbồ Pôs ling sền gàr tiah nhàr dà lơgar Ea Hleo, Mpồl ling sền gàr tiah nhàr dà lơgar càr Dăk Lăk pà git, bơta pơgồp bal đah pôs ling mờ ală mpồl lơh broă cíñ trị mpồl bơtiàn, ală mpồl cau tàm thôn, ƀòn gam cèng wơl cồng nha tàm broă lơh sền gàr gơnoar tờm, sền gàr lơngăp lơngai tiah nhàr dà lơgar: “Pôs ling neh pơgồp bal mờ ală mpồl, gah broă lơh, geh ală kơrnuat gơ wèt mờ mpồl cau ùr, mpồl cau ling yau, tus bal mờ mpồl ling sền gàr tiah nhàr dà lơgar nàng lòt sền, sền gàr jrong nhàr dà lơgar. Ală thôn tàm do cih mat lài ờ geh cau tìs mờ tŭ lơi kung rơcang bal mờ mpồl ling sền gàr tiah nhàr dà lơgar kơryan, yă ală bơta cau tìs tŭ mut tàm ù tiah nhàr dà lơgar”.

Đại tá Đào Viết Hùng, Kwang atbồ Gah đơng lam Mpồl ling sền gàr tiah nhàr dà lơgar càr Dăk Lăk pà git, bal mờ “Srơh jơh gùt làng bol tus bal sền gàr gơnoar tờm ù tiah, lơngăp lơngai tiah nhàr dà lơgar tàm bơta pa”, broă lơh bơt bơtàu, lơh kơ̆ kơljap, tơnguh bơta niam broă lơh bơh ală mpồl Đảng, gơnoar atbồ mờ ală mpồl cau tàm xã tiah nhàr dà lơgar đơs bal geh lơh kơ̆ kơljap, pồ tơl mờ ngai sơlơ lơh broă geh cồng nha. Mpồl kwang bàng, đảng viên sền gàr tiah nhàr dà lơgar geh ai tus bal pơrjum tàm ală thôn, ƀòn, kwang bàng ling sền gàr tiah nhàr dà lơgar rê lơh Phó Ƀí thư ală xã gam ngui niam gơnoar broă lơh tờm tàm ală srơh, ală broă lơh, rơndap broă lơh bơtàu tơnguh lơh sa- niam chài- mpồl bơtiàn, gàr niam jơnau sồr bơtàu tơnguh lơh sa pơgồp bal mờ sền gàr dà lơgar, lơngăp lơngai tàm tiah nhàr dà lơgar: “Bol hi geh mpồl lơh broă mờ huyện ủy, ală pôs ling sền gàr tiah nhàr dà lơgar ai mpồl tus lơh broă mờ đảng ủy ală xã nàng lơh geh bơta ring bal tàm đảng bè broă lơh đơng lam bồ, pơlam, hơ̆ sồng ring bal tàm broă ngui cau lơh broă. Pơn yơu tàm broă lơh atbồ, sền gàr tiah nhàr dà lơgar den bol hi pal pơgồp niam jat Nghị địñ sồ 03 bơh Thủ tướng Cíñ phủ dê. Gơ wèt mờ srơh jơh gùt làng bol den bol hi đơs nền kờñ lơh niam den lài ngan pal tơrgùm bal mờ kâp ủy, gơnoar atbồ tàm ƀòn lơgar lơh kơ̆ kơljap anih duh broă, kuơmàng là anih duh broă Đảng. Tŭ do tàm 2 kơnhoàl tiah nhàr dà lơgar geh 38 thôn, ƀòn den bol hi ndrờm geh kwang bàng sền gàr tiah nhàr dà lơgar tus bal pơrjum mờ ală thôn, ƀòn”.

Bal mờ bơta pơn đơl pràn ờ git ơm rlô bơh ală cau ling sền gàr tiah nhàr dà lơgar dê, bơta at tê bal bơh làng bol dê neh pơgồp bơnah sền gàr kơ̆ kơljap gơnoar tờm ù tiah, sền gàr lơngăp lơngai, ring niam tàm tiah nhàr dà lơgar bơh càr Dăk Lăk dê.