Rlau 1 poh tơnơ̆ dơ̆ rơndeh container tơm tàm hìu làng bol lơh 3 nă cau chơt, làng bol kis jat kềng gah gùng Hồ Chí Minh tàm tiah drà 312, xã Dăk Rla, kơnhoàl Dăk Mil, càr Dăk Nông kung ờ hềt jơh nrơt dơl sơl. Mò Phạm Thị Ngọc Lan – dùl nă cau ơm kis tàm tiah do pà git, gơl gùng do niam ngan, lơh uă cau măi rơndeh ờ sền gròi, măi rơndeh mhar ngan. Bè hơ̆ den tàng mìng tàm nđờ nam do, tàm do neh geh 8 nă cau chơt, 6 nă cau gơtìp sồt să tài rềs àr gùng lòt: “Añ tac bro tàm drà neh jŏ nam, sền gŏ tiah do sùm gơlik geh rềs àr ngòt rơngơt ngan. Tŭ do añ kơp kờñ mpồl kảñ sát gùng lòt sơlơ tơnguh tai broă lòt sền, gròi sền gơl gùng ngòt rơngơt do; anih lơh broă geh gơnoar pal gờñ geh broă lơh nàng cau măi rơndeh in tơrmù khà rat măi rơndeh, crăp camera lơh glài tơnơ̆ nàng gàr lơngăp lơngai cau tac bro mờ ơm kis jat kềng gah gùng in”.

Ồng Lê Văn Hoàng – Củ tịc Anih duh broă làng bol kơnhoàl Dăk Mil, càr Dăk Nông yal, gơl gùng Hồ Chí Minh lòt gan 2 kơnhoàl geh anih gơlik geh uă dơ̆ rềs àr gùng lòt là gơl lòt gan tiah tờm xã Thuận An mờ tiah drà 312 xã Dăk Rla. Ală anih do gơlik geh ală dơ̆ rềs àr gùng lòt ngòt rơngơt ngan, lơh chơt uă cau mờ lơh aniai uă rơndeh rơndồ, phan bơna, hoàc huơr uă ngan bè priă jền. Bè broă tơn jơh ală anih gơlik geh uă dơ̆ rềs àr gùng lòt lơh roh bơta lơngap lơngai lòt rê tàm gùng do, ồng Lê Văn Hoàng đơs là, pal sơlơ tơnguh tai mblàng yal tơnguh jơnau git wă bơh cau lòt rê tàm gùng dê ờ hềt tơl mờ pal lơh niam phan bơna gùng lòt tai: “Kơnhoàl sơlơ tơnguh tai mblàng yal, tơnguh jơnau git wă làng bol dê, lơh jat kràñ cê, ngan là cau măi rơndeh bè bơta măi rat rơndeh mờ ală jơnau sồr gơ rềng tus lơngăp lơngai lòt rê tàm gùng. Mpồl lơh broă geh gơnoar pal sơlơ tơnguh tai lòt sền, sền gròi, di tŭ git gŏ ală broă lơh tìs, lơh glài kràñ jat jơnau sồr. Nàng bơsong jơh den pal bơcri priă lơh phan bơna gùng lòt. Pơn yơu bè rề ơnàng ală gơl gùng, crăp ală pơng gàr tam cah, pal lơh ring bal uă broă lơh”.

Càr Dăk Nông geh 3 gơl gùng rơndeh lòt gan là 14, 14C mờ 28. Gah lơh broă geh gơnoar càr đal git tàm ală gùng dờng mờ bàr, pe gùng càr gam geh 18 anih gơlik geh uă dơ̆ rềs àr gùng lòt, pơhìn gơlik geh rềs àr gùng lòt. Tàm 6 nhai bồ nam do, tàm càr Dăk Nông gơlik geh 57 dơ̆ rềs àr gùng lòt, lơh chơt 43 nă cau, sồt să 53 nă cau. Pơndrờm dùl tŭ bal mờ nam lài, rềs àr gùng lòt gơmù 12 dơ̆, gơmù 2 nă cau chơt, mơya gơguh 18 nă cau gơtìp sồt să. Thượng tá ồng Văn Ngọc Lập, Phó Kwang atbồ Cơldŭ kảñ sát gùng lòt Kwang àng càr Dăk Nông pà git, rềs àr gùng lòt gơmù, mơya ală dơ̆ rềs àr kơn jơ̆ gơguh uă, uă ngan gơlik geh tàm ală anih gơlik geh uă dơ̆ rềs àr gùng lòt. Nàng tơrmù ƀà rềs àr gùng lòt, mpồl kảñ sát gùng lòt sơlơ tơnguh tai broă lơh lòt sền, sền gròi, lơh glài kràñ ală broă lơh tìs: “Tàm tơngai tus, Cơldŭ kảñ sát gùng lòt pơn jat tai lam lơh lòt sền jơh ngai mang mờ lam lơh mìng dùl tơngume đo bơta noat rat ală rơndeh nac, rơndeh conatiner, rơndeh kong goa… tàm jơh gùt gơl gùng, ngan là tàm ală anih pơhìn gơlik geh rềs àr gùng lòt. Bơdìh hơ̆ tai, pơgồp bal sùm mờ kwang àng xã, mpồl lùp sền gùng lòt, mblàng yal nàng làng bol tàmt iah drà in tơnguh jơnau git wă lơh jat Adat gùng lòt ù gờl, tơrmù ƀà rềs àr gùng lòt”.

Nàng kờñ tơn jơh ală anih gơlik geh uă dơ̆ rềs àr gùng lòt, lơh roh bơta lơngăp lơngai lòt rê tàm gùng tàm ală gơl gùng dờng, gùng càr, Mpồl lơngăp lơngai lòt rê tàm gùng càr Dăk Nông neh sồr ală mpồl lơh broă geh gơnoar pơgồp bal mờ ală tiah sơlơ tơnguh tai mblàng yal tơnguh jơnau git wă lơh jat Adat gùng lòt ù gờl, lam lơh ring bal ală broă lơh mờng chài, lơh glài kràñ ală broă lơh tìs rơndap tap sèng, lơngăp lơngai lòt rê tàm gùng. Mờ kung pơn jat tai sền sơ wì, kờp sền, tă pơgồp jơnau đơs sồr Anih duh broă làng bol càr Dăk Nông, mpồl lơh sa kă bro atbồ ală gùng BOT bơcri priă lơh niam phan bơna gùng lòt, bơsong jơh ală anih gơlik geh uă dơ̆ rềs àr gùng lòt, pơhìn gơlik geh rềs àr gùng lòt tàm ală gơl gùng, ngan là tàm gùng dờng 14 (gùng Hồ Chí minh) mờ gùng dờng 28.