VOV4.K’ho - Nhơl chờ geh ai tàm bơta pràn bè trồ tiah, ù tiah niam Kông viên Địa cất gùt plai ù UNESCO Dăk Nông là dùl tàm 3 bơta tờm bơh broă lơh sa càr Dăk Nông dê. Den tàng, tàm broă bơ̆t bơtàu Kông viên Địa cất gùt plai ù UNESCO Dăk Nông, neh geh 3 gơl gùng nhơl chờ jăt tơl tơngu me, hơ̆ là: “Jơnau yal yau dà mờ ồs”, “Jơnau đơs crih bơh broă tam gơl” mờ “Mpong săp bơh plai ù”. Tàm broă lơh do, cau năc geh tus mờ tiah lời wơl kah yau chài rơgơi geh uă bơta mờ niam bơnĕ ngan bơh mpồl bơtiàn rơlao 40 jơi bơtiàn kòn cau ơm kis bal.

Ƀòn Pi Nao, xã Nhân Đạo, kơnhoàl Dăk Rlấp là dùl tàm 10 ƀòn geh UɃÑZ càr Dăk Nông rơwah lơh tơrlòng lài nhơl chờ mpồl bơtiàn. Tài tàm do gam geh prăp ală bơta niam chài rơgơi niam kòn cau Mnông dê.

Pơrjum cri bơyai "Bơ̆t bơtàu broă tơnguh bơtàu nhơl chờ mpồl bơtiàn pơgồp bal mờ bơta kwơ geh is bơh Kông viên địa cất gùt plai ù Dăk Nông-Bơta mùl màl broă lơh"

Broă lơh do là nàng drơng cau năc nhơl chờ tàm broă tus sền Kông viên Địa cất gùt plai ù UNESCO Dăk Nông jòi nàng git ală bơta kwơ chài rơgơi bơh làng bol kis bơh yau tàm do dê. Jăt mờ hơ̆, gah lơh broă geh gơnoar geh crơng gơs Mpồl lam sồr ơm kis, sào sa; Mpồl dròng cing mồng, tamya đơs jơnau đơs pơn đik; mpồl lơh broă ờs mờng tàñ ồi yau, tàñ sơ̆, ƀĕ tơrnờm... Ồng Điểu K’ Bang, Kwang atbồ ƀòn Pi Nao chờ hờp pà git jơnau do. “Tàm ƀòn Pi Nao bol añ geh gùng dà broă lơh bơh càr Dăk Nông là lơh broă nhơl chờ mpồl bơtiàn. Ală oh mi tàm ƀòn añ neh crơng gơs Hợp tác xã tàñ ồi yau nàng gàr broă lơh ờs mờng. Tŭ do, den geh dùl mpồl lơh broă bal nàng lơh geh broă lơh ai ală oh mi cau ùr in geh tai priă ai hìu nhă in. Mờ bơh tŭ hơ̆, kung gàr geh broă lơh ờs mờng, bơta niam chài rơgơi niam bơnĕ bơh kòn cau Mnông dê”.

                                    Phan lời wơl chài rơgơi tàm tiah Kông viên địa cất Dăk Nông

Gơl gùng nhơl chờ “Jơnau yal yau dà mờ ồs” tàm broă jòi nàng git Kông viên Địa cất gùt plai ù UNESCO Dăk Nông, cau năc geh lòt bơh ƀòn dờng Gia Nghĩa tus kơnhoàl Krông Nô-do là tiah geh trồm rơgồng bơnơm ồs dờng ngan Đông Nam Á. Tàm hơ̆, anih ơm rơlô să niam bơnĕ ngan kung là ƀòn làng bol kòn cau Mnông mờ geh ală bơta niam chài rơgơi, rài lài do jŏ jòng. Hơ̆ là “Tiah pôs đồng Nâm Nung”. Tàm tiah do kung neh geh Sở Văn hoá Thể thao mờ Zu lịc càr Dăk Nông rơwah lơh tiah tơlòng lài broă nhơl chờ mpồl bơtiàn.

Kòn cau Mnông kis tàm xã Nâm Nung chờ hờp ngan tŭ kơno ƀòn mờr gơs ƀòn nhơl chờ. Tài bơh tŭ do, cau năc tàm lơgar mờ lơgar bơdìh geh wă rơlao tai ală bơta chài rơgơi niam bơnĕ ngan bơh kòn cau dê. Mờ kung bơh tŭ hơ̆, làng bol làng bol gơtùi kis mờ broă nhơl chờ-broă lơh drơng ala. Kờñ geh bè hơ̆, jăt lŏ H’ Tuynh kis tàm ƀòn R’Cập, xã Nâm Nung, kơnhoàl Krông Nô, pal bơsram broă lơh, nàng tơl nă cau là dùl nă cau lam sồr lơh broă nhơl chờ. “Tàm ƀòn bol añ kung geh uă cau git tus mờ broă tàñ ồi yau, dròng cing, đơs jơnau pơn đik. Di lah geh ơdŭ bơto, añ kờñ tus bơsram nàng git mờ yal cau năc in git bè bơta niam chài rơgơi ờs mờng kòn cau añ dê. Bơh tŭ hơ̆, cau năc tàm lơgar mờ lơgar bơdìh geh git tus bơta niam chài rơgơi tàm ƀòn añ. Añ kơ̆p kờñ geh dùl ơdŭ bơto bè hơ̆ nàng ală cau in git mờ yal wơl bơta niam chài rơgơi ờs mờng kòn cau Mnông dê nàng cau năc in”.

Mò Tôn Thị Ngọc Hạnh, Phó Củ tịc UɃÑZ càr Dăk Nông pà git, tŭ Kông viên Địa cất Dăk Nông geh mŭt tàm mpồl gùt plai ù, neh geh uă ngan cau lơh sa kă bro sền gròi. Gah lơh broă geh gơnoar tàm càr do neh mờ gam geh uă broă lơh nàng prăp gàr ală bơta kwơ niam chài bơh 40 jơi bơtiàn kòn cau oh mi, hơ̆ là phan nhơl chờ niam bơnĕ ngan. “Git mờ jơnau jal mhar bal mờ kwơ màng tàm broă prăp gàr, tơnguh bơta kwơ phan lời wơl tàm tiah Kông viên Địa cất Dăk Nông, tơngai do, Mpồl atbồ Kông viên Địa cất Dăk Nông neh pơgồp bal mờ ală sở, gah lơh broă tàm càr mờ ală kơnhoàl, ƀòn dờng nàng lơh jăt dơ̆ lam sồr, bơto bơtê tơnguh jơnau git wă bè phan lời wơl địa cất mờ Kông viên Địa cất, broă sền gàr, tơnguh bơta kwơ phan lời wơl tus mờ làng bol, tàm hơ̆ uă ngan là mpồl ơruh pơnu, kơnòm pa tào. Mpồl atbồ kung pơgồp bal mờ Sở Giáo dục mờ Đào tạo, Đoàn ơruh pơnu nàng pơgồp bal ală tơngu me lam sồr do tàm ală môn bơsram, ală broă bơto bơtê di pal nàng tơnguh uă jơnau git wă ai kơnòm bơsram ală kấp in. Bơh tŭ hơ̆, lơh geh nùs nhơm pơnyờ să mờ tơnguh jơnau git wă tàm broă sền gàr, prăp gàr ală bơta kwơ phan lời wơl càr dê”.

Nhai 10 nam 2021 lài do, Học viện Cíñ trị dà lơgar Hồ Chí Minh neh bơyai lơh pơrjum cri bơyai khoa họk “Bơ̆ bơtàu broă tơnguh bơtàu nhơl chờ mpồl bơtiàn pơgồp bal mờ ală bơta kwơ bơh Kông viên địa cất gùt plai ù càr Dăk Nông-Mùl màl mờ broă lơh”. Pơrjum geh jơnau: broă kơlôi sơnơng bơ̆t bơtàu broă tơnguh bơtàu nhơl chờ mpồl bơtiàn pơgồp bal mờ ală bơta kwơ bơh Kông viên địa cất gùt plai ù càr Dăk Nông ai bơh tàm kơrnoăt prăp gàr mờ tơnguh bơtàu kơl jăp, drơng broă tơnguh bơtàu lơh sa mpồl bơtiàn càr dê là broă neh geh ai pal geh lơh mhar. Tàm broă lơh bơh Ƀan Thường vụ Tỉñ ủy Dăk Nông tàm nam 2021 lài do kung neh ai: tơnguh bơtàu nhơl chờ pơgồp bal mờ Kông viên địa cất gùt plai ù UNESCO Dăk Nông tơngai bơh nam 2021 tus 2025 là dùl tàm ală tơngu me tờm nàng lơh jăt Nghị quyết Pơrjum dờng kwang bàng ala măt Đảng ƀộ càr dơ̆ 12 dê.

Cau cih Quốc Học-Cau mblàng Ndong Brawl