Tàm 11 nhai bơh nam 2022 dê, mpồl lơh broă geh gơnoar càr Kon Tum neh gŏ 83 dơ̆ lơh tìs Adat lơh broă brê bơnơm, kŭp rlau 419 khối dơm chi ală bơta, bă brê gơtìp mus là rlau 32 lồ. Tàm dơ̆ lùp bơh Hội đồng Ñân zân càr Kon Tum dê, uă kwang bàng đơs nền neh geh bơta ờ lơh kràñ tàm broă ătbồ, lơh broă ờ jơh kơnòl mờ geh tŭ là dong kờl ai bol mus kơñau brê in. Hơ tềng đăp Hội đồng Ñân zân càr, kwang đơng lam bồ Ủy ƀan Ñân zân càr Kon Tum đơs nền lời gơlik geh ală dơ̆ lơh tìs Adat lơh broă brê bơnơm tài bơh broă lơh đơng lam, sồr lơh bơh kâp ủy, gơnoar ătbồ bàr pe tiah dê ờ hềt sền gròi dipal; Kơnòl bơh bàr pe nă kwang bàng lơh broă lơh ătbồ sền gàr brê dê ờ hềt uă; gam sơl jơnau ờ lơh kràñ tàm broă ătbồ, dong kờl tu yu bal ai mpồl cau koh kơl, jun pơndiang dơm chi kơñau tìs mờ adat boh lam. Ủy ƀan Ñân zân càr rơ̆p pơn jăt tai sồr ală gah lơh broă mờ ală tiah mờ să tờm tơn là kâp kơnhoàl mờ kâp xã nàng gàr geh brê. Tơnguh tai gơnoar broă kơnòl broă bơh cau tờm brê mờ mpồl sền gàr brê dê. Tơnguh rlau tai broă lòt sền, gròi sền, ngan là tàm ală kàl lơh mìr lơh sươn.