VOV4.K’ho - Tàm dơ̆ pơrjum ƀăo bè broă lơh sa mpồl bơtiàn quý II nam 2022 geh UɃÑZ càr Ninh Thuận bơyai lơh mho òr (14/07), ala măt Sở Giao thông Vận tải neh yal bè rơndăp broă geh lơh wơl gơl gùng rơndeh ồs Tháp Chàm-Dà Làc. Gơl gùng rơndeh ồs neh ai lòt bơh nam 1932 mờ gơtìp ơm ờ ai lòt tai bơh nam 1972.

Rơndăp broă lơh do jòng di pơgăp 83 kơi sồ nggùl, tàm hơ̆ gơl lòt gan càr Ninh Thuận 49 kơi sồ, mờ khà 17 anih rơndeh ồs ơm mờ anih ai cau năc in guh. Bơdìh hơ̆ tai, geh 64 nơm rơbàng, 5 nơm gùng brong mờ 16 kơi sồ geh crăp gùng sề rơn đòt. Nàng lơh jăt rơndăp broă, kờp dŭ geh tơm ntrờn ù tiah gơl lòt gan càr Ninh Thuận di pơgăp 130 lồ ù, mìng là ù lơh sa suơn sre. Kờp jơh khà priă bơcri lơh rơndăp broă di pơgăp 27 rơbô 780 tơmàn đong. Kờp dŭ rơndăp broă lơh gơl gùng rơndeh ồs do geh lơh bơh nam 2024 mờ lơh gơs, geh ai ngui mờ lơh broă bơh nam 2030.

Cau mblàng Ndong Brawl